YAP Sədrinin müavini: Azərbaycanda bütün siyasi qüvvələr siyasi etika, siyasi davranış normalarına uyğun fəaliyyət göstərməlidir

Bakı:

21 °C

78 %

5 m/s

AZ RU EN

Ana səhifə / Siyasət / YAP Sədrinin müavini: Azərbaycanda bütün siyasi qüvvələr siyasi etika, siyasi davranış normalarına uyğun fəaliyyət göstərməlidir

YAP Sədrinin müavini: Azərbaycanda bütün siyasi qüvvələr siyasi etika, siyasi davranış normalarına uyğun fəaliyyət göstərməlidir

29.01.2019 [09:52]

“Müxalifətçilər öz niyyətlərinə çata bilməyəndə mənəvi terror alətindən istifadə etməyə çalışırlar. Biz hakimiyyət və iqtidar partiyası olaraq hər hansı siyasi partiyanın, təşkilatın mitinqlər keçirməsinə və ya öz fikirlərini ifadə etməsinə etiraz etmirik. Bu, Azərbaycanda formalaşmış demokratiyanın ümumi qayəsinə uyğundur. Onlar mitinq keçirmək üçün müraciət edəndə icazə verilir, mitinqlərini də keçirirlər. Ətraflarına topladıqları insanların sayı, ümumiyyətlə, sosial dayaqları da məlumdur. Amma bizi narahat edən onların müxalifətçilik adı altında tamamilə başqa fikir və ideyalara xidmət etməsidir, Azərbaycanın dövlətçiliyinə qarşı müxalifətdə olmasıdır”. Bu fikirləri Baş nazirin müavini, YAP Sədrinin müavini-İcra katibi Əli Əhmədov jurnalistlərə açıqlamasında deyib.
Əli Əhmədov bildirib ki, müxalifətçilik yeni, fərqli ideyanın, fərqli bir təfəkkürün ortaya qoyulmasından başqa bir şey deyil. Onun sözlərinə görə, insanlar ortaya qoyulan həmin ideyaya münasibətlərini bildirəcəklər və seçkilər zamanı ayrı-ayrı ideyalara və ya o ideyaları həyata keçirən insanlara səs verəcəklər: “Azərbaycanda prezident seçkiləri 2018-ci ilin aprel ayında keçirilib. Azərbaycan xalqının, seçicilərin mütləq əksəriyyətinin dəstəyi ilə cənab İlham Əliyev yenidən böyük səs çoxluğu ilə Azərbaycan Prezidenti seçildi. Hesab edirəm ki, əgər müxalifət var idisə və onların fərqli ideyaları var idisə, bu ideyaları həmin vaxt irəli sürməli, seçkilərdə öz fikirlərini ortaya qoymalı idilər. Amma seçkilərdən bir il keçməmiş onların hansısa tələblərlə peyda olması, əslində, nə demokratiya normalarına uyğun gəlir, nə də müxalifətçilik anlayışı ilə bir araya sığır. Bəs əsl məqsəd nədir? Əsl məqsəd Azərbaycanda sabitliyi, əmin-amanlığı, dincliyi pozmaq, normal inkişafın qarşısını almağa cəhd göstərməkdir”.
YAP Sədrinin müavini qeyd edib ki, Azərbaycan sürətlə inkişaf edir, Azərbaycanın iqtisadiyyatı inkişaf edir, siması dəyişir, infrastrukturu yenilənir: “Bakı şəhəri başda olmaqla Azərbaycanın bütün bölgələri son illər ərzində ciddi şəkildə dəyişib. Azərbaycan sözün həqiqi mənasında gənc dövlətlər arasında ən uğurlu dövlətlərdən biridir. Bütün beynəlxalq reytinqlərdə Azərbaycanın mövqeyi həm yüksəkdir, həm də bu yüksəlmə prosesi ildən-ilə irəliləyir və Azərbaycanın nüfuzu da artır. Belə olan halda Azərbaycandakı inkişafın qarşısını almağa cəhd göstərməyin mənası nədir? Hesab edirəm ki, bu, Azərbaycan xalqına və dövlətçiliyinə qarşı çıxmaqdan başqa bir şey deyil. Çox təəssüf hissi ilə qeyd edirəm ki, müxalifətçilər öz niyyətlərinə çata bilməyəndə mənəvi terror alətindən istifadə etməyə çalışırlar. İndi onlar sosial şəbəkələrdən də bu məqsədlə istifadə edirlər. Biz sosial şəbəkələrdən kimlərinsə istifadə etməsindən narahat deyilik. Amma çox təəssüf hissi ilə qeyd etmək lazım gəlir ki, onlar sosial şəbəkəni bir mənəvi terror alətinə, bir mənəviyyatsızlıq alətinə çevirməyə çalışır və bu cür istifadə edirlər. Bizim narazılığımız bununla əlaqədardır. Bizim etirazımız bu cəhdlərə qarşıdır”.
Əli Əhmədov deyib ki, Azərbaycanda bütün siyasi qüvvələr siyasi etika, siyasi davranış normaları ilə fəaliyyət göstərməlidirlər: “Kimisə hədəfə almaq, kimisə təhqir etmək və ya mənəvi terrora məruz qoymaq yolverilməzdir və biz qəti şəkildə buna etirazımızı bildiririk. Eyni zamanda, siyasətlə məşğul olan bütün qüvvələri çağırırıq ki, onlar siyasi məkanı bu cür ləkələyənlərə qarşı çıxsınlar”.
“Milli şura” adlanan qurumun yanvarın 19-da keçirdiyi mitinqə münasibət bildirən YAP Sədrinin müavini qeyd edib ki, Azərbaycan cəmiyyəti mənəvi dəyərləri itirmiş insanların arxasınca getməyəcək. Onun sözlərinə görə, siyasətlə siyasi davranış, siyasi ləyaqət normaları çərçivəsində məşğul olmaq olar: “Bu mənada, mitinqlər, yaxud hansısa aksiyalar bu normalar çərçivəsində keçirilərsə, biz buna etiraz etmərik. Tənqid etmək müxalifətin təbii hüququdur. Amma tənqidi təhqirlə, söyüşlə əvəz etmək yaramazlıqdır. Təbii ki, belələri bu cür davranışları ilə hansı mənəvi keyfiyyətlərə sahib olduqlarını göstərirlər”.
Əli Əhmədovun fikrincə, yanvarın 19-da keçirilən mitinq insanların müxalifətin ideyalarını dəstəkləmədiyini bir daha göstərdi: “Sayca keçən dəfəki mitinqdən bir qədər çox insanın iştirak etməsini əldə rəhbər tutaraq, bundan bir silah kimi istifadə edərək özlərini “qəhrəman” kimi təqdim etmələrinə baxmayaraq, əslində, 10 milyonluq Azərbaycan cəmiyyətinin çox kiçik bir hissəsinin təşkilatçıların çağırışlarına cavab verərək mitinqə gəlməsi ondan xəbər verir ki, onlar sosial dayaqlarını tamamilə itiriblər. Bu da təbiidir, çünki yüksək mənəvi dəyərlərə malik Azərbaycan cəmiyyəti mənəvi dəyərlərini itirmiş insanların arxasınca gedə bilməz, getmir və getməyəcək”.

Paylaş:

Baxılıb: 536 dəfə