Ötən il Qarabağ Universitetinin təşkilati fəaliyyətlərinin həyata keçirilməsi məqsədilə Prezidentin ehtiyat fondundan 10 milyon manat maliyyə dəstəyi ayrılıb. Bununla yanaşı, Xankəndi şəhərində aparılan abadlıq və bərpa-quruculuq işlərinin davam etdirilməsi üçün əlavə 8 milyon manat vəsait sərf olunub.

AZƏRTAC xəbər verir ki, bu barədə məlumat Milli Məclisin İqtisadi siyasət, sənaye və sahibkarlıq komitəsinin bugünkü iclasında müzakirəyə çıxarılan “Azərbaycan Respublikasının 2024-cü il dövlət büdcəsinin icrası barədə illik hesabat”da öz əksini tapıb.

Hesabatda Prezidentin ehtiyat fondundan ayrılmış vəsaitlərin təyinatı ilə bağlı məlumatlar yer alıb. Sənəddə bildirilir ki, ümumilikdə 2024-cü ildə Prezidentin ehtiyat fondundan istifadə olunan vəsaitin məbləği 244,8 milyon manat təşkil edib. Bu vəsait müxtəlif sahələr üzrə zəruri layihələrin maliyyələşdirilməsinə yönəldilib.