Səyyad Mirzəyev
YAP Ağdam rayon təşkilatının əməkdaşı
Azərbaycan Prezidenti İlham Əliyevin Şuşanın azad olunmasından sonra Ulu Öndər Heydər Əliyevin məzarını ziyarət edərkən səsləndirdiyi fikirlər xalqımızın yaddaşında dərin iz buraxan tarixi və mənəvi hadisələrdən biridir. Dövlət başçısının “Xoşbəxt adamam ki, ata vəsiyyətini yerinə yetirdim. Şuşanı azad etdik!” sözləri təkcə böyük hərbi Qələbənin ifadəsi deyil, həm də uzun illər xalqımızın qəlbində yaşatdığı milli arzunun gerçəkləşməsinin rəmzidir. Şuşanın azad edilməsi Azərbaycan tarixinin ən şanlı səhifələrindən biri olmaqla, dövlətimizin gücünü, xalqımızın birliyini və ordumuzun qəhrəmanlığını bütün dünyaya nümayiş etdirdi. Bu Qələbə illərlə davam edən işğala son qoymaqla yanaşı, milli qürurumuzun, tarixi ədalətin və ərazi bütövlüyümüzün bərpası istiqamətində həlledici mərhələ oldu. Prezident İlham Əliyevin rəhbərliyi ilə Azərbaycan Ordusunun həyata keçirdiyi hərbi əməliyyatlar xalqımızın əzmini və mübarizə iradəsini parlaq şəkildə ortaya qoydu. Dövlət başçısının çıxışında diqqət çəkən əsas məqamlardan biri Ulu Öndər Heydər Əliyevin siyasi irsinə və ata vəsiyyətinə sədaqət məsələsidir. Heydər Əliyev Azərbaycanın müstəqil dövlət kimi möhkəmlənməsi, milli birliyin qorunması və ərazi bütövlüyümüzün təmin olunması istiqamətində mühüm tarixi xidmətlər göstərmişdir. Şuşanın azad edilməsi isə onun arzularının və xalqımızın illərlə gözlədiyi böyük ümidin gerçəkləşməsi kimi xüsusi məna daşıyır.Prezident İlham Əliyevin şəhidlərimizin və Ulu Öndərin ruhunun şad olduğunu vurğulaması Qələbənin mənəvi mahiyyətini bir daha ön plana çəkir. Çünki bu zəfərin arxasında Vətən uğrunda canından keçən qəhrəman şəhidlərimizin qanı, qazilərimizin fədakarlığı, əsgər və zabitlərimizin misilsiz şücaəti dayanır. Onların qəhrəmanlığı Azərbaycan xalqının azadlıq və torpaq sevgisinin ən böyük təcəssümüdür. “Gözün aydın olsun Azərbaycan! Gözünüz aydın olsun dünya azərbaycanlıları!” müraciəti isə yalnız ölkə daxilində deyil, dünyanın müxtəlif guşələrində yaşayan milyonlarla soydaşımızın sevincini ifadə edirdi. Bu sözlər milli həmrəyliyin, ortaq tarixi yaddaşın və Azərbaycançılıq ideyasının təntənəsinə çevrildi.
Bu gün Şuşa Azərbaycanın suverenliyinin, milli qürurunun və sarsılmaz iradəsinin rəmzi kimi xüsusi yer tutur. Prezident İlham Əliyevin həmin tarixi çıxışı isə gələcək nəsillərə ötürüləcək mühüm mənəvi mesajdır: xalq öz tarixinə, torpağına və milli dəyərlərinə sahib çıxdıqda ən böyük məqsədlərinə nail ola bilər. Şuşanın azadlığı Azərbaycan dövlətçiliyinin gücünü, xalqımızın birliyini və Zəfər tariximizin əbədiliyini təcəssüm etdirir.
