8 Noyabr – Şuşa Şəhəri Günü Azərbaycan xalqının tarixində xüsusi əhəmiyyətə malik olan, milli qürur və qəhrəmanlıq salnaməmizi əks etdirən əlamətdar günlərdən biridir. Bu tarix xalqımızın əsrlər boyu qoruyub saxladığı Vətən sevgisinin, torpaq uğrunda mübarizə əzminin və sarsılmaz iradəsinin təntənəsidir. Qarabağın tacı, Azərbaycanın mədəniyyət paytaxtı Şuşanın azadlığa qovuşması dövlətçilik tariximizin ən şanlı səhifələrindən biri kimi yaddaşlara həkk olunub.
Şuşa şəhəri əsrlər boyu Azərbaycanın ictimai-siyasi, iqtisadi və mədəni həyatında mühüm rol oynayıb. XVIII əsrdə Pənahəli xan tərəfindən əsası qoyulan şəhər qısa müddət ərzində Qarabağ xanlığının mühüm siyasi və mədəni mərkəzinə çevrilib. Özünəməxsus memarlığı, təbii gözəlliyi, tarixi abidələri və zəngin mədəni irsi ilə seçilən Şuşa Azərbaycan xalqının milli kimliyinin formalaşmasında mühüm yer tutub. Bu şəhər dahi şəxsiyyətlərin, görkəmli şairlərin, bəstəkarların, xanəndələrin və sənətkarların yetişdiyi müqəddəs məkandır. Molla Pənah Vaqif, Xurşidbanu Natəvan, Üzeyir Hacıbəyli, Bülbül və digər görkəmli şəxsiyyətlərin adı Şuşanın mədəniyyət tarixini daha da zənginləşdirib.
1992-ci il mayın 8-də Şuşa şəhərinin Ermənistan silahlı qüvvələri tərəfindən işğal edilməsi Azərbaycan xalqının yaddaşında ağır bir faciə kimi qaldı. İşğal dövründə şəhərin tarixi və mədəni irsinə ciddi ziyan vuruldu, yaşayış məntəqələri dağıdıldı, milli-mənəvi sərvətlərimiz təhlükə ilə üzləşdi. Lakin Azərbaycan xalqı heç vaxt Şuşanın işğalı ilə barışmadı, bu qədim şəhərin yenidən azadlığa qovuşacağına inamını itirmədi.
2020-ci il sentyabrın 27-də başlayan Vətən müharibəsi Azərbaycanın ərazi bütövlüyünün bərpası istiqamətində tarixi mərhələyə çevrildi. Müzəffər Ali Baş Komandan, Prezident İlham Əliyevin rəhbərliyi ilə Azərbaycan Ordusu böyük qəhrəmanlıq və peşəkarlıq nümayiş etdirərək torpaqlarımızı işğaldan azad etdi. Noyabrın 8-də Şuşa şəhərinin azad edilməsi isə müharibənin gedişində həlledici hadisə oldu. Şəhərin mürəkkəb dağlıq relyefi və strateji mövqeyi nəzərə alınaraq həyata keçirilən əməliyyat Azərbaycan əsgərinin yüksək döyüş hazırlığını, cəsarətini və Vətənə bağlılığını bütün dünyaya nümayiş etdirdi.
Şuşanın azad olunması ilə Azərbaycan xalqı uzun illər davam edən həsrətinə son qoydu. Bu möhtəşəm qələbə ölkəmizin hərbi-siyasi qüdrətini, xalqımızın birliyini və dövlətimizin qətiyyətini təsdiqlədi. 2020-ci il noyabrın 8-də əldə olunan tarixi Zəfər münasibətilə noyabrın 8-i Azərbaycanda Zəfər Günü kimi qeyd olunur. Şuşanın azad edilməsi isə bu qələbənin ən mühüm və rəmzi hadisələrindən biri olaraq tarixə düşüb.
Şuşanın dirçəlişi həm də Böyük Qayıdış prosesinin mühüm tərkib hissəsidir. Uzun illər doğma yurdlarından ayrı düşmüş insanların öz evlərinə qayıtması, şəhərin yenidən canlanması tarixi ədalətin bərpasının real təzahürüdür. Bu proses Azərbaycanın gələcək inkişafı, işğaldan azad edilmiş ərazilərin sosial-iqtisadi potensialının reallaşdırılması baxımından da böyük əhəmiyyət daşıyır.
8 Noyabr – Şuşa Şəhəri Günü münasibətilə şəhidlərimizin əziz xatirəsini dərin ehtiramla yad edir, qazilərimizin qəhrəmanlığını və fədakarlığını yüksək qiymətləndiririk. Şuşanın azadlığı uğrunda canından keçən hər bir Vətən övladının adı xalqımızın yaddaşında əbədi yaşayacaq.
Nazim Bünyatov
YAP Aöcabədi rayon təşkilatının sədr müavini
