Azərbaycan xalqının tarixində elə müqəddəs dəyərlər var ki, onlar zaman keçdikcə öz əhəmiyyətini daha da artırır, milli kimliyimizin və dövlətçilik ənənələrimizin ayrılmaz hissəsinə çevrilir. Azərbaycan Respublikasının Dövlət Bayrağı da xalqımızın ən böyük mənəvi sərvətlərindən, milli qürur və şərəf rəmzlərindən biridir. Hər il noyabrın 9-da qeyd olunan Dövlət Bayrağı Günü Azərbaycan xalqının azadlıq, müstəqillik və suverenlik uğrunda apardığı mübarizənin tarixi əhəmiyyətini bir daha xatırladır.

Azərbaycan Respublikasının üçrəngli Dövlət Bayrağı ilk dəfə 1918-ci il noyabrın 9-da Azərbaycan Xalq Cümhuriyyəti hökumətinin qərarı ilə qəbul edilmişdir. Bu tarixi hadisə xalqımızın dövlətçilik salnaməsində mühüm mərhələ olmaqla yanaşı, milli istiqlal ideyalarının təntənəsi idi. Şərqdə ilk demokratik respublikalardan biri olan Azərbaycan Xalq Cümhuriyyəti qısa müddət ərzində dövlət atributlarının formalaşdırılması, milli ideologiyanın möhkəmləndirilməsi və müstəqil dövlətçilik ənənələrinin yaradılması istiqamətində mühüm addımlar atmışdır. Üçrəngli bayrağımız həmin dövrdə xalqımızın azadlıq arzusunun, milli özünüdərkinin və gələcəyə inamının ifadəsinə çevrilmişdir.

Bayrağımızın üzərindəki üç rəng dərin fəlsəfi və ideoloji məna daşıyır. Mavi rəng türk mənşəyimizi və türkçülük ideyalarını, qırmızı rəng müasirliyi, inkişafı və demokratik dəyərləri, yaşıl rəng isə İslam sivilizasiyasına mənsubluğumuzu ifadə edir. Ağ aypara və səkkizguşəli ulduz isə dövlət bayrağımızın milli-mənəvi məzmununu tamamlayır. Bu rənglər və rəmzlər Azərbaycan xalqının tarixi keçmişini, mənəvi dünyasını və müasir inkişaf istiqamətlərini özündə birləşdirir.

Azərbaycan Xalq Cümhuriyyətinin 1920-ci ildə süqutundan sonra üçrəngli bayrağımız dövlət atributu kimi fəaliyyətini dayandırsa da, xalqımızın yaddaşından heç vaxt silinməmişdir. Müstəqillik ideyalarına sadiq qalan ziyalılarımız, milli düşüncəli insanlarımız və vətənpərvər qüvvələrimiz bu bayrağı azadlığın və milli varlığın müqəddəs rəmzi kimi qoruyub saxlamışlar. Beləliklə, üçrəngli bayrağımız onilliklər boyu xalqımızın müstəqillik arzusunun ifadəsi olaraq yaşamışdır.

1990-cı il noyabrın 17-də Ümummilli Lider Heydər Əliyevin rəhbərliyi ilə Naxçıvan Muxtar Respublikası Ali Məclisinin sessiyasında üçrəngli bayrağımız dövlət bayrağı kimi qəbul edilmişdir. Bu tarixi qərar Azərbaycanın müstəqilliyə doğru irəlilədiyi mürəkkəb bir dövrdə böyük siyasi və mənəvi əhəmiyyət daşıyırdı. Ümummilli Lider Heydər Əliyevin qətiyyətli mövqeyi və milli dövlətçilik ideyalarına sadiqliyi sayəsində xalqımızın tarixi rəmzi yenidən dövlətçilik həyatına qaytarılmışdır. Sonradan üçrəngli bayrağımız Azərbaycan Respublikasının dövlət bayrağı kimi təsdiq edilmiş və Konstitusiyamızda öz əksini tapmışdır.

Müstəqil Azərbaycanın dövlətçilik tarixində Prezident İlham Əliyevin rəhbərliyi ilə üçrəngli bayrağımızın beynəlxalq nüfuzunun yüksəldilməsi, dövlət rəmzlərinə hörmətin gücləndirilməsi və milli qürur hissinin möhkəmləndirilməsi istiqamətində mühüm işlər görülmüşdür. Dövlət başçısının siyasi iradəsi, həyata keçirilən ardıcıl siyasət və Azərbaycanın artan beynəlxalq nüfuzu bayrağımızın dünyanın müxtəlif ölkələrində, beynəlxalq təşkilatların qarşısında və mötəbər tədbirlərdə qürurla dalğalanmasına şərait yaratmışdır.

2009-cu il noyabrın 17-də Prezident İlham Əliyevin imzaladığı sərəncamla noyabrın 9-u Azərbaycan Respublikasının Dövlət Bayrağı Günü kimi təsis edilmişdir. Bu qərar üçrəngli bayrağımızın tarixi və mənəvi əhəmiyyətinə verilən yüksək qiymətin ifadəsi olmuşdur. Həmin tarixdən etibarən Dövlət Bayrağı Günü ölkəmizdə geniş şəkildə qeyd edilir, müxtəlif tədbirlər, mərasimlər və maarifləndirici layihələr həyata keçirilir.

Dövlət bayrağımızın ucaldılması və qorunması müstəqil Azərbaycanın dövlətçilik siyasətində xüsusi yer tutur. Bakıda Dövlət Bayrağı Meydanının yaradılması, nəhəng üçrəngli bayrağımızın ucaldılması və Dövlət Bayrağı Muzeyinin fəaliyyət göstərməsi bu istiqamətdə atılmış mühüm addımlardandır. Dövlət Bayrağı Meydanı təkcə paytaxtımızın görkəmli məkanlarından biri deyil, həm də Azərbaycan xalqının milli birliyinin, dövlət müstəqilliyinin və tarixi qələbələrinin rəmzidir.

2020-ci ildə Vətən müharibəsində qazanılmış tarixi Zəfər üçrəngli bayrağımızın mənəvi dəyərini daha da yüksəltdi. Azərbaycan Ordusunun qəhrəmanlığı, xalqımızın birliyi və dövlətimizin qətiyyətli siyasəti nəticəsində torpaqlarımızın işğalına son qoyuldu. Uzun illər həsrətində olduğumuz doğma torpaqlarımızda Azərbaycan bayrağı yenidən ucaldıldı. Şuşada, Cəbrayılda, Füzulidə, Zəngilanda, Qubadlıda, Kəlbəcərdə və digər azad edilmiş ərazilərimizdə dalğalanan üçrəngli bayrağımız xalqımızın tarixi ədalətin bərpasına olan inamının təntənəsinə çevrildi.

2023-cü ilin sentyabrında Azərbaycanın suverenliyinin bütün ölkə ərazisində tam bərpa olunması dövlətçilik tariximizin mühüm hadisələrindən biri oldu. Xankəndidə və digər ərazilərimizdə Dövlət Bayrağımızın ucaldılması Azərbaycanın ərazi bütövlüyünün və suverenliyinin rəmzi ifadəsinə çevrildi. Bu hadisələr bir daha sübut etdi ki, Azərbaycan xalqı öz milli dəyərlərinə, tarixi torpaqlarına və dövlət müstəqilliyinə sarsılmaz bağlıdır.

Bu gün işğaldan azad edilmiş ərazilərdə genişmiqyaslı bərpa və quruculuq işləri həyata keçirilir. Yeni yaşayış məntəqələri salınır, yollar, tunellər, körpülər, məktəblər, xəstəxanalar və digər infrastruktur obyektləri inşa edilir. Böyük Qayıdış proqramı çərçivəsində keçmiş məcburi köçkünlərin doğma yurdlarına qayıdışı təmin olunur. Bu quruculuq prosesinin hər bir mərhələsində dalğalanan üçrəngli bayrağımız dövlətimizin gücünü, xalqımızın əzmini və gələcəyə olan inamını nümayiş etdirir.

Dövlət Bayrağı Günü, eyni zamanda, gənc nəslin vətənpərvərlik ruhunda tərbiyəsi baxımından xüsusi əhəmiyyətə malikdir. Gənclərimiz bayrağımızın tarixini, onun daşıdığı mənanı və uğrunda mübarizə aparan qəhrəmanlarımızın fədakarlığını dərindən bilməlidirlər. Məktəblərdə, ali təhsil müəssisələrində, mədəniyyət ocaqlarında keçirilən tədbirlər milli rəmzlərimizə hörmətin formalaşmasına xidmət edir. Çünki dövlət bayrağına sevgi, əslində, Vətənə, xalqa və müstəqil dövlətə olan sevginin təzahürüdür.

Üçrəngli bayrağımızın hər dalğalanışında Azərbaycanın tarixi, xalqımızın mübarizə əzmi, şəhidlərimizin müqəddəs xatirəsi və qazilərimizin qəhrəmanlığı yaşayır. Bu bayraq müstəqilliyimizin əldə olunması və qorunması uğrunda canından keçmiş insanların xatirəsini özündə yaşadan müqəddəs dövlət rəmzidir. Onun qarşısında hər bir Azərbaycan vətəndaşı məsuliyyət hiss etməli, dövlətimizin inkişafına və möhkəmlənməsinə öz töhfəsini verməlidir.

Bu gün Azərbaycan bayrağı beynəlxalq arenada müstəqil, güclü və suveren dövlətin rəmzi kimi tanınır. İdmançılarımız beynəlxalq yarışlarda qələbə qazandıqda, diplomatlarımız ölkəmizi mötəbər tribunalarından təmsil etdikdə, hərbçilərimiz dövlətimizin təhlükəsizliyini qoruduqda üçrəngli bayrağımız xalqımızın qürur mənbəyinə çevrilir. Bayrağımızın yüksəldilməsi hər bir azərbaycanlının qəlbində sevinc, fəxarət və milli birlik hissi yaradır.

Nəticə etibarilə, 9 Noyabr – Dövlət Bayrağı Günü yalnız təqvimdə qeyd olunan əlamətdar tarix deyil. Bu gün müstəqilliyimizin, milli kimliyimizin, dövlətçilik ənənələrimizin və xalqımızın tarixi iradəsinin təntənəsidir. Üçrəngli bayrağımız keçmişimizlə gələcəyimizi birləşdirən, milli birliyimizi möhkəmləndirən və dövlətimizin suverenliyini ifadə edən müqəddəs rəmzdir.

Hər birimiz bu bayrağın ucalığını qorumağı, onun şərəfini daim yüksəltməyi özümüzə vətəndaşlıq borcu bilməliyik. Çünki bayraq yalnız dövlətin atributu deyil, həm də xalqın qüruru, azadlığın ifadəsi və gələcək nəsillərə ötürülən milli əmanətdir.

Yaşasın müstəqil Azərbaycan! Yaşasın xalqımızın qürur mənbəyi olan üçrəngli Dövlət Bayrağımız!

Xəyyam Vəliyev,

YAP Gədəbəy rayon təşkilatının əməkdaşı