Azərbaycan xalqının tarix boyu formalaşdırdığı milli-mənəvi dəyərlər, zəngin mədəni irs və dövlətçilik ənənələri milli həmrəyliyin möhkəmlənməsində mühüm rol oynamışdır. Xalqımızı vahid amal ətrafında birləşdirən əsas ideoloji dayaqlardan biri də azərbaycançılıq məfkurəsidir. Bu məfkurə milli mənsubiyyətindən, dilindən, dini etiqadından və yaşadığı coğrafiyadan asılı olmayaraq, hər bir azərbaycanlını Vətənə bağlılıq, dövlətə sədaqət və ümumi milli maraqlar ətrafında birləşdirir.

Azərbaycançılıq ideologiyasının formalaşması və dövlət siyasəti səviyyəsində möhkəmlənməsi Ümummilli Lider Heydər Əliyevin adı ilə sıx bağlıdır. Ulu Öndər ölkəmizdə milli birliyin təmin olunmasını, cəmiyyətdə qarşılıqlı hörmət və həmrəyliyin gücləndirilməsini dövlətçiliyin əsas şərtlərindən biri hesab edirdi. Onun uzaqgörən siyasəti nəticəsində müxtəlif dünyagörüşünə, dini və etnik mənsubiyyətə malik insanların vahid Azərbaycan dövləti ətrafında birləşməsi üçün möhkəm ideoloji əsaslar yaradıldı.

Milli həmrəylik yalnız eyni torpaqda yaşamaq deyil, eyni dəyərləri bölüşmək, dövlətin gələcəyi üçün məsuliyyət daşımaq və çətin anlarda bir-birinə dəstək olmaq deməkdir. Azərbaycan xalqı tarixinin müxtəlif mərhələlərində nümayiş etdirdiyi birlik və həmrəylik sayəsində mühüm sınaqlardan uğurla çıxmışdır. Bu birlik ölkəmizdə ictimai-siyasi sabitliyin qorunmasında, milli maraqların müdafiəsində və dövlət müstəqilliyinin möhkəmləndirilməsində mühüm amilə çevrilmişdir.

Azərbaycançılıq məfkurəsinin mühüm ifadələrindən biri də dövlət rəmzlərimizə, xüsusilə üçrəngli bayrağımıza olan münasibətdir. Dövlət bayrağımız xalqımızın milli kimliyini, tarixi yaddaşını və müstəqillik iradəsini təcəssüm etdirir. Dünyanın müxtəlif ölkələrində yaşayan soydaşlarımız üçün də üçrəngli bayrağımız Vətənlə mənəvi bağlılığın, milli mənsubiyyətin və ortaq dəyərlərin rəmzidir. Bayrağımızın dalğalandığı hər bir məkanda Azərbaycan xalqının birliyi və milli ruhu öz əksini tapır.

Bu gün Prezident İlham Əliyevin rəhbərliyi ilə həyata keçirilən siyasət nəticəsində milli həmrəylik və azərbaycançılıq ideyaları yeni məzmun qazanır. Azərbaycanın ərazi bütövlüyünün və suverenliyinin tam bərpası xalqımızın birlik və həmrəylik gücünün tarixi təzahürüdür. Vətən müharibəsi zamanı nümayiş etdirilən xalq-ordu birliyi, ölkə daxilində və xaricində yaşayan azərbaycanlıların vahid mövqedən çıxış etməsi milli həmrəyliyin nə qədər böyük gücə malik olduğunu bir daha sübut etdi.

Azərbaycançılıq ideologiyasının yaşadılması və gələcək nəsillərə ötürülməsi xüsusi əhəmiyyət daşıyır. Gənclərin milli tariximizi, dilimizi, mədəniyyətimizi və dövlətçilik ənənələrimizi dərindən öyrənməsi, Vətənə bağlılıq ruhunda yetişməsi bu istiqamətdə qarşıda duran əsas vəzifələrdəndir. Eyni zamanda, dünyanın müxtəlif ölkələrində fəaliyyət göstərən Azərbaycan diaspor təşkilatlarının milli maraqlarımızın müdafiəsi naminə birgə fəaliyyəti də ümumxalq həmrəyliyinin möhkəmlənməsinə xidmət edir.

Milli həmrəylik və azərbaycançılıq məfkurəsi Azərbaycanın güclü gələcəyinin əsas ideoloji dayaqlarındandır. Bu dəyərlər xalqımızın milli kimliyini qorumaqla yanaşı, dövlətimizin müstəqilliyinin, suverenliyinin və beynəlxalq nüfuzunun daha da möhkəmlənməsinə xidmət edir. Üçrəngli bayrağımız altında birləşən xalqımızın ortaq məqsədi güclü, müstəqil və inkişaf edən Azərbaycan dövlətini gələcək nəsillərə əmanət etməkdir. Çünki milli birlik dövlətin gücü, həmrəylik xalqın dayağı, azərbaycançılıq isə bizi birləşdirən ümummilli məfkurədir.

Aynur  Quliyeva

YAP  Şahbuz  rayon  Ayrınc  ərazi partiya təşkilatının müavini,  Ayrınc kənd tam orta məktəbinin müəllimi