Mahaçqalada Dağıstanın görkəmli ictimai və siyasi xadimi Maqomedsalam Umaxanovun xatirəsinə həsr edilmiş boks üzrə XI beynəlxalq turnir keçiriləcək. Turnirdə birinci yerləri tutan idmançılara beynəlxalq dərəcəli idman ustası adı veriləcək. Yarışlarda Azərbaycan, Almaniya, çin, Hindistan, İsrail, İtaliya, Estoniya, Latviya, Belarus, Qazaxıstan, Ukrayna, Ermənistan, Rusiya və Bolqarıstan komandaları iştirak edəcəklər.
Azərbaycan Boks Federasiyasının baş katibi İsa Əsgərov bildirib ki, turnirdə ölkəmizi seçmə komandanın ikinci heyətinə daxil olan idmançılar - İlkin Ağayev (54 kq), Famil Süleymanov (57 kq), Ruslan Qasımov (60 kq), Rahib Bəylərov (75 kq), Hafiz İsgəndərov (81 kq) və Elçin İsmayılov (91 kq-dan çox) təmsil edəcəklər.
Komanda ilə birlikdə məşqçi Elbrus Rzayev və AİBA versiyası üzrə beynəlxalq dərəcəli hakim Ravil Yenikeyev də beynəlxalq turnirə gedəcəklər.