Səyyad Mirzəyev

YAP Ağdam rayon təşkilatının əməkdaşı 

8 Noyabr – Zəfər Günü xalqımızın tarixinə gücün, milli iradənin, siyasi qətiyyətin və hərbi qüdrətin təntənəsi kimi yazılıb. Bu şanlı Qələbə yalnız döyüş meydanında qazanılan hərbi uğur deyil, eyni zamanda uzun illər ərzində həyata keçirilən məqsədyönlü dövlət siyasətinin, iqtisadi inkişafın, müasir ordu quruculuğunun və milli müdafiə potensialının formalaşdırılmasının məntiqi nəticəsidir. Zəfərə aparan yolda Azərbaycanın hərbi sənaye kompleksinin inkişafı, müdafiə qabiliyyətinin gücləndirilməsi və müasir texnologiyaların orduya tətbiqi mühüm rol oynayıb. Müasir dünyada dövlətlərin təhlükəsizliyi yalnız hərbi qüvvələrin say və imkanları ilə ölçülmür. Müdafiə sənayesinin inkişaf səviyyəsi, texnoloji müstəqillik, yerli istehsal imkanları və innovativ həllərin tətbiqi milli təhlükəsizliyin əsas göstəricilərinə çevrilib. Bu baxımdan Azərbaycanın hərbi sənaye kompleksinin inkişaf strategiyası ölkənin müdafiə qüdrətinin möhkəmləndirilməsi ilə yanaşı, iqtisadi və elmi-texnoloji potensialının genişləndirilməsi baxımından da xüsusi əhəmiyyət daşıyır. 44 günlük Vətən müharibəsi Azərbaycanın hərbi qüdrətini, ordumuzun döyüş hazırlığını və müasir müharibə texnologiyalarından istifadə bacarığını bütün dünyaya nümayiş etdirdi. 2020-ci il sentyabrın 27-də başlayan və noyabrın 8-də Şuşanın azad edilməsi ilə tarixi dönüş nöqtəsinə çatan hərbi əməliyyatlar Azərbaycanın müdafiə strategiyasının nə qədər düzgün əsaslar üzərində qurulduğunu təsdiqlədi. Bu Qələbənin əldə olunmasında xalqımızın birliyi, əsgər və zabitlərimizin qəhrəmanlığı, Ali Baş Komandanın qətiyyətli rəhbərliyi ilə yanaşı, ordunun müasir silah və texnika ilə təchiz olunması da mühüm amillərdən biri idi. Şanlı Azərbaycan Ordusunun müharibə zamanı nümayiş etdirdiyi əməliyyat imkanları ölkəmizin hərbi-texniki modernləşmə istiqamətində həyata keçirdiyi siyasətin nəticələrini ortaya qoydu.

Lakin Zəfərdən sonra da müdafiə qabiliyyətinin gücləndirilməsi dövlət siyasətinin prioritet istiqamətlərindən biri olaraq qaldı.

Azərbaycanın hərbi sənaye kompleksinin inkişaf strategiyasının əsas istiqamətlərindən biri daxili istehsal imkanlarının genişləndirilməsi və ordunun ehtiyaclarının mümkün qədər yerli məhsullar hesabına təmin edilməsidir. Bu yanaşma ölkənin xarici təchizat bazarlarından asılılığının azaldılması, müdafiə sənayesində dayanıqlı istehsal sisteminin yaradılması və milli təhlükəsizlik maraqlarının qorunması baxımından xüsusi əhəmiyyət kəsb edir.

Prezident Cənab İlham Əliyev hərbi sənaye kompleksinin inkişafına daim xüsusi diqqət yetirir və bu sahənin ölkənin ümumi iqtisadi potensialının mühüm tərkib hissəsi olduğunu vurğulayır. Bu strategiyanın həyata keçirilməsi nəticəsində Azərbaycanda müxtəlif təyinatlı hərbi məhsulların istehsalı genişlənib. Silah-sursat, hərbi təyinatlı avadanlıqlar, mühafizə vasitələri, pilotsuz sistemlər və digər müdafiə məhsullarının yerli istehsalı ölkənin hərbi-texniki imkanlarını artırır. Burada əsas məqsəd yalnız mövcud ehtiyacları qarşılamaq deyil, eyni zamanda gələcəyin müharibə və təhlükəsizlik çağırışlarına uyğun istehsal infrastrukturu formalaşdırmaqdır. Hərbi sənayenin inkişafı yalnız yeni silah və texnikanın istehsalı ilə məhdudlaşmır. Bu sahədə proqram təminatlarının hazırlanması, elektron komponentlərin istehsalı, müasir rabitə sistemlərinin təkmilləşdirilməsi, texniki xidmət və təmir imkanlarının genişləndirilməsi də strateji prioritetlər sırasındadır.