Qubadlı şəhərinin işğaldan azad edilməsi Azərbaycan tarixinin ən mühüm hadisələrindən biri, xalqımızın iradəsinin, əzminin və Vətən sevgisinin təntənəsidir. Uzun illər doğma yurdlarından ayrı düşən qubadlılıların öz torpaqlarına qayıtmaq arzusu 2020-ci ildə Vətən müharibəsində qazanılan tarixi Qələbə ilə gerçəyə çevrildi.

         1993-cü il avqustun 31-də Ermənistan silahlı qüvvələri tərəfindən işğal edilən Qubadlı rayonu uzun illər ərzində ağır dağıntılara və talanlara məruz qaldı. Doğma yurdlarından didərgin düşən minlərlə insanın qəlbində bir gün öz evlərinə qayıtmaq ümidi yaşayırdı. Azərbaycan xalqı heç vaxt torpaqlarının işğalı ilə barışmadı, dövlətimiz isə ərazi bütövlüyümüzün bərpasını daim əsas məqsədlərindən biri kimi müəyyənləşdirdi. 2020-ci il sentyabrın 27-də başlayan Vətən müharibəsi Azərbaycanın haqq mübarizəsinin həlledici mərhələsinə çevrildi. Azərbaycan Ordusunun qəhrəmanlığı, hərbçilərimizin yüksək döyüş ruhu, peşəkarlığı və Ali Baş Komandan İlham Əliyevin rəhbərliyi ilə həyata keçirilən uğurlu hərbi əməliyyatlar nəticəsində işğal altında olan torpaqlarımız bir-birinin ardınca azad edildi. Oktyabrın 25-də Qubadlı şəhərinin azad olunması bu mübarizənin mühüm mərhələlərindən biri oldu və Azərbaycanın tarixi Zəfərinə gedən yolu daha da yaxınlaşdırdı. Qubadlının azad edilməsi yalnız hərbi uğur deyil, həm də milli qürurumuzun, tarixi ədalətin və xalqımızın sarsılmaz birliyinin təzahürü idi. Bu hadisə Azərbaycan əsgərinin gücünü, torpağına bağlılığını və Vətən naminə hər cür fədakarlığa hazır olduğunu bir daha nümayiş etdirdi. Cənab Prezident, Müzəffər Ali Baş Komandan İlham Əliyevin Qubadlının azad olunması ilə bağlı səsləndirdiyi fikirlər bu tarixi hadisənin xalqımız üçün daşıdığı böyük mənanı ifadə edir: “Qubadlıya öz sahibləri qayıdıb. Qubadlının işğaldan azad edilməsi tarixi hadisə idi. Oktyabrın 25-də Qubadlı şəhərinin azad edilməsi bizim qələbəmizi yaxınlaşdırdı”. Bu sözlər doğma torpaqlarına qovuşmaq həsrəti ilə yaşayan insanların sevincini, Azərbaycan dövlətinin qətiyyətini və xalqımızın Zəfərə olan inamını əks etdirir. Qubadlı öz coğrafi mövqeyi və strateji əhəmiyyəti ilə yanaşı, Azərbaycanın zəngin tarixi-mədəni irsinin bir parçası kimi də xüsusi dəyərə malikdir. Rayonun azad olunması bölgədə təhlükəsizliyin möhkəmləndirilməsi, dövlət suverenliyinin təmin edilməsi və işğaldan azad edilmiş ərazilərdə genişmiqyaslı bərpa işlərinin aparılması baxımından mühüm əhəmiyyət daşıyır.

         Bu gün Qubadlıda həyata keçirilən quruculuq tədbirləri, infrastrukturun yenilənməsi, yaşayış məntəqələrinin bərpası və keçmiş məcburi köçkünlərin doğma torpaqlarına qayıdışı bölgənin gələcək inkişafı üçün yeni imkanlar yaradır. Uzun illər yurd həsrəti ilə yaşayan insanların öz evlərinə dönməsi, doğma torpaqlarında yeni həyata başlaması Böyük Qayıdışın ən mühüm mənəvi nəticələrindəndir. Bu qayıdış yalnız insanların yaşayış yerlərinə dönməsi deyil, həm də milli yaddaşın, ənənələrin və doğma yurda bağlılığın yenidən canlanmasıdır. Qubadlının azadlığı Azərbaycan xalqının tarixində heç vaxt unudulmayacaq hadisələrdəndir. Bu Zəfər sübut etdi ki, xalqın birliyi, dövlətin qətiyyəti və ordunun qüdrəti qarşıya qoyulan ən mühüm məqsədlərə çatmaq üçün əsas amillərdir. Qubadlı uğrunda döyüşlərdə canından keçən şəhidlərimizin əziz xatirəsi xalqımızın qəlbində daim yaşayacaq, qazilərimizin fədakarlığı isə gələcək nəsillər üçün Vətənə sədaqət nümunəsi olacaq. Oktyabrın 25-i hər bir azərbaycanlı üçün doğma torpağa qayıdışın, ədalətin bərpasının və milli qürurun rəmzidir. Qubadlıya öz sahiblərinin qayıtması Azərbaycanın tarixi Zəfərinin mahiyyətini, torpaqlarımızın əsl sahibinin Azərbaycan xalqı olduğunu və milli iradəmizin sarsılmazlığını bir daha təsdiqləyir.

Cəmilə Hüseynova

YAP Naxçıvan şəhər təşkilatı “Nəsirəddin Tusi 21” ünvanında yerləşən ərazi partiya təşkilatının sədri,

YAP Naxçıvan şəhər təşkilatının fəal üzvü