8 Noyabr – Zəfər Günü Azərbaycan xalqının yaddaşına qürur, fədakarlıq və milli həmrəylik rəmzi kimi həkk olunmuş əlamətdar tarixdir. Bu gün yalnız hərbi Qələbənin deyil, həm də xalqımızın sarsılmaz iradəsinin, doğma torpaqlara bağlılığının və uzun illər davam edən ədalət mübarizəsinin təntənəsidir. Azərbaycan tarixinin şanlı səhifəsinə çevrilən bu Qələbə dövlətimizin gücünü, xalqımızın birliyini və ordumuzun qəhrəmanlığını bütün dünyaya nümayiş etdirdi. Zəfər Gününün əhəmiyyətini daha dərindən anlamaq üçün Vətən müharibəsi dövründə baş verən hadisələrə, Azərbaycan xalqının keçirdiyi hisslərə və dövlət başçısının çıxışlarının cəmiyyətdə yaratdığı mənəvi təsirə nəzər salmaq lazımdır. Prezident, Müzəffər Ali Baş Komandan İlham Əliyevin müharibə dövründəki nitqləri və xalqa müraciətləri həmin günlərin salnaməsinin mühüm tərkib hissəsidir. Bu çıxışlar xalqın haqq mübarizəsinin mahiyyətini ifadə edir, cəmiyyətdə inamı və qələbə əzmini gücləndirirdi.
2020-ci il sentyabrın 27-də Ermənistan silahlı qüvvələrinin genişmiqyaslı hərbi təxribatlarına cavab olaraq Azərbaycan Ordusunun əks-hücum əməliyyatına başlaması ölkəmizin müasir tarixində yeni mərhələnin başlanğıcı oldu. Təxminən otuz il davam edən işğalın yaratdığı ağrı və həsrət xalqımızın yaddaşında dərin iz buraxmışdı. Doğma yurdlarından didərgin düşmüş insanların torpaq nisgili, şəhid ailələrinin kədəri və hər bir azərbaycanlının qəlbində yaşayan azadlıq arzusu Qələbəyə gedən yolun mənəvi əsasını təşkil edirdi. Belə bir dövrdə dövlət başçısının xalqa müraciətləri xüsusi əhəmiyyət daşıyırdı. Prezident İlham Əliyevin çıxışları cəbhədə baş verən hadisələr haqqında məlumat verməklə yanaşı, xalqın mübarizə ruhunu yüksəldir, ölkə daxilində həmrəyliyin qorunmasına xidmət edirdi. Onun fikirləri cəmiyyətə aydın bir mesaj çatdırırdı: Azərbaycan öz ərazi bütövlüyünün bərpası məqsədindən dönməyəcək, dövlət və xalq qarşıya qoyulan tarixi vəzifənin yerinə yetirilməsi üçün bir amal ətrafında birləşəcək. Müharibə dövründə Cənab Prezidentin yerli və xarici media nümayəndələrinə verdiyi müsahibələr də diqqətəlayiq idi. Bu müsahibələr vasitəsilə Azərbaycanın mövqeyi beynəlxalq ictimaiyyətə çatdırılır, ölkəmizin tarixi həqiqətləri və beynəlxalq hüquqa əsaslanan tələbləri diqqətə təqdim edilirdi. Beləliklə, mübarizə yalnız döyüş meydanında deyil, informasiya və diplomatiya sahəsində də davam edirdi. Cənab Prezidentin çıxışlarının cəmiyyət tərəfindən geniş dəstək görməsi, ilk növbədə, xalqın öz dövlətinə, ordusuna və Qələbə əzminə olan inamı ilə bağlı idi. Həmin günlərdə hər bir uğurlu əməliyyat, hər bir azad edilən yaşayış məntəqəsi Azərbaycan ailələrində sevinc və ümid yaradırdı. İnsanlar cəbhədən gələn xəbərləri böyük həyəcanla izləyir, əsgərlərimizin uğurlarını öz uğurları kimi qəbul edirdilər. Bu mənəvi birlik Vətən müharibəsinin ən mühüm xüsusiyyətlərindən biri idi. 2020-ci il sentyabrın 27-də başlayan Vətən müharibəsi 44 gün davam etdi. Bu müddət ərzində Azərbaycan Ordusu böyük qəhrəmanlıq və peşəkarlıq nümayiş etdirərək bir sıra şəhər, kənd və strateji yüksəklikləri işğaldan azad etdi. Əsgər və zabitlərimizin döyüş meydanında göstərdiyi şücaət xalqımızın azadlıq iradəsinin real təcəssümünə çevrildi.
Noyabrın 8-də Şuşa şəhərinin azad edilməsi isə müharibənin taleyində həlledici mərhələ oldu. Qarabağın mədəniyyət paytaxtı hesab edilən Şuşanın azadlığı Azərbaycan xalqı üçün yalnız hərbi uğur deyildi. Bu hadisə milli kimliyimizin, mədəni irsimizin və tarixi yaddaşımızın bərpası baxımından da böyük əhəmiyyət daşıyırdı. Şuşanın azad edilməsi xəbəri ölkədə böyük sevinc doğurdu və Qələbəyə inamı daha da möhkəmləndirdi. Məhz bu səbəbdən 8 Noyabr Azərbaycan xalqının yaddaşında xüsusi yer tutur. Prezident İlham Əliyevin 2020-ci il dekabrın 3-də imzaladığı Sərəncama əsasən, hər il noyabrın 8-i ölkəmizdə Zəfər Günü kimi qeyd olunur. Bu qərar tarixi Qələbənin əbədiləşdirilməsi, xalqımızın milli qürurunun yaşadılması və gələcək nəsillərə çatdırılması baxımından mühüm əhəmiyyət daşıyır. Vətən müharibəsi sübut etdi ki, xalqın birliyi, dövlətin qətiyyətli mövqeyi və ordunun döyüş hazırlığı ümumi məqsədə çatmaqda mühüm rol oynayır. Qazanılan Qələbə uzun illər davam edən işğala son qoyulması və Azərbaycanın ərazi bütövlüyünün bərpası istiqamətində tarixi nəticə oldu. Bu nəticənin arxasında əsgər və zabitlərimizin fədakarlığı, xalqımızın mənəvi dəstəyi və dövlətimizin ardıcıl siyasəti dayanırdı. Vətən müharibəsi dövründə Prezident İlham Əliyevin çıxışlarının diqqətlə izlənilməsi həmin günlərin ictimai həyatının mühüm xüsusiyyətlərindən biri idi. İnsanlar dövlət başçısının müraciətlərində yalnız cəbhədəki vəziyyətlə bağlı məlumatları deyil, həm də gələcəyə dair inam və qətiyyət ifadəsini görürdülər. Bu çıxışlar müharibənin gedişini, Azərbaycanın qarşıya qoyduğu məqsədləri və əldə olunan nəticələrin əhəmiyyətini anlamağa kömək edirdi. 2020-ci il dekabrın 10-da Bakıda keçirilən Zəfər paradında Prezident İlham Əliyevin səsləndirdiyi fikirlər də Qələbənin mənəvi və siyasi mahiyyətini əks etdirirdi. Dövlət başçısı Qələbənin əldə edilməsində milli ruhun, hərbçilərin qəhrəmanlığının və xalqın birliyinin rolunu vurğulayırdı. Bu mesajlar bir daha göstərirdi ki, tarixi uğurlar yalnız maddi imkanlarla deyil, eyni zamanda, güclü iradə, vətənpərvərlik və ümumi məqsəd ətrafında birləşmək bacarığı ilə əldə edilir. Cənab Prezidentin müharibə dövründəki nitq və çıxışlarının əhəmiyyəti onların təkcə həmin günlərlə məhdudlaşmamasındadır. Bu çıxışlar gələcək nəsillər üçün də tarixi mənbə, vətənpərvərlik nümunəsi və dövlətçilik dərsi kimi əhəmiyyət daşıyır. Onlarda Azərbaycanın öz haqqını müdafiə etmək əzmi, milli birliyin gücü və müstəqil dövlət kimi qətiyyətli mövqeyi öz əksini tapır.
Bununla yanaşı, Zəfərin qazanılmasında əsas qəhrəmanların Azərbaycan əsgər və zabitləri olduğunu xüsusi vurğulamaq lazımdır. Onların cəbhədə göstərdiyi igidlik, şəhidlərimizin Vətən uğrunda canlarından keçməsi və qazilərimizin fədakarlığı bu tarixin ən müqəddəs səhifələridir. Dövlət başçısının çıxışlarında hərbçilərin xidmətinə verilən qiymət də xalqın bu qəhrəmanlara olan ehtiramı ilə səsləşirdi. 8 Noyabr – Zəfər Günü hər bir azərbaycanlı üçün tarixi yaddaş, milli qürur və məsuliyyət günüdür. Bu tarix bizə xatırladır ki, Vətən sevgisi yalnız sözlə ifadə olunmur; o, əməl, fədakarlıq, birlik və məsuliyyət tələb edir. Şəhidlərimizin xatirəsini yaşatmaq, qazilərimizə ehtiram göstərmək, dövlətimizin inkişafına töhfə vermək və gənc nəsli vətənpərvərlik ruhunda tərbiyə etmək hər birimizin mənəvi borcudur. Məktəblərdə Zəfər Gününə həsr olunan tədbirlərin, dəyirmi masaların və maarifləndirici söhbətlərin keçirilməsi də bu baxımdan mühüm əhəmiyyət daşıyır. Şagirdlər tarixi hadisələri öyrənməklə yanaşı, milli birliyin, dövlət müstəqilliyinin və sülhün dəyərini daha yaxşı anlayırlar. Prezident İlham Əliyevin müharibə dövründəki çıxışlarının təhlili isə onlara həmin günlərin siyasi və ictimai mənzərəsini anlamaq, tarixi hadisələrə daha dərindən yanaşmaq imkanı verir. Qələbənin qorunması və gələcək uğurların əldə edilməsi üçün ölkəmizin inkişafı, təhsilin keyfiyyətinin yüksəldilməsi, gənclərin bilikli və məsuliyyətli vətəndaşlar kimi yetişməsi xüsusi əhəmiyyət daşıyır. Çünki müasir dövrdə vətənpərvərlik yalnız keçmişlə fəxr etmək deyil, həm də bu gün ölkənin tərəqqisi naminə çalışmaqdır. Cənab Prezident İlham Əliyevin Vətən müharibəsi dövründəki nitq və çıxışları Azərbaycan xalqının tarixi Qələbəyə gedən yolunun mühüm tərkib hissəsidir. Bu çıxışlar xalqın mübarizə əzmini, dövlətə və orduya inamını, milli birliyini ifadə edirdi. Onların cəmiyyət tərəfindən geniş dəstəklənməsi isə Azərbaycan xalqının öz tarixi məqsədi ətrafında birləşməsinin göstəricilərindən biri oldu.
44 günlük Vətən müharibəsində qazanılan Qələbə sübut etdi ki, xalqın iradəsi, ordunun qəhrəmanlığı və dövlətin qətiyyətli mövqeyi tarixin gedişində mühüm dəyişikliklərə səbəb ola bilər. 8 Noyabr – Zəfər Günü bu həqiqətin ən parlaq ifadəsidir. Bu gün Zəfər tariximizi vərəqləyərkən şəhidlərimizin müqəddəs xatirəsini ehtiramla yad edir, qazilərimizin fədakarlığını minnətdarlıqla xatırlayır və gələcək nəsillərə bu tarixi düzgün çatdırmağın vacibliyini dərk edirik. Zəfər yalnız keçmişdə qazanılmış Qələbə deyil, həm də gələcəyə inam, milli həmrəylik və müstəqil dövlətimizin inkişafı naminə məsuliyyət deməkdir.
Zəfər Günümüz mübarək! Qarabağ Azərbaycandır!
Çinarə Məmmədova
YAP Naxçıvan şəhər təşkilatı üzrə ƏPT sədri,
Naxçıvan şəhər 13 saylı tam orta məktəbin direktor müavini, partiya fəalı
