Azərbaycan xalqının milli qürurunu, dövlətçilik ənənələrini, azadlıq və istiqlal arzularını özündə təcəssüm etdirən üçrəngli bayrağımız xalqımızın ən müqəddəs dövlətçilik rəmzlərindən biridir. Bu bayraq sadəcə üç rəngdən ibarət olan bir parça deyil. O, xalqımızın əsrlər boyu qoruyub saxladığı milli kimliyinin, müstəqillik uğrunda apardığı mübarizənin, qəhrəmanlığının və sarsılmaz iradəsinin ifadəsidir. Üçrəngli bayrağımızın hər dalğalanışı tariximizin şanlı səhifələrini, xalqımızın azadlıq eşqini və gələcəyə olan inamını xatırladır.

     Azərbaycanın üçrəngli Dövlət Bayrağının tarixi XX əsrin əvvəllərinə, xalqımızın milli oyanış və dövlət müstəqilliyi uğrunda mübarizə dövrünə təsadüf edir. 1918-ci il mayın 28-də Azərbaycan Xalq Cümhuriyyətinin yaradılması ilə xalqımız Şərqdə ilk demokratik respublikalardan birini quraraq tarixə mühüm töhfə verdi. Həmin dövrdə milli dövlətçilik ideyalarının rəmzinə çevrilən üçrəngli bayrağımız 1918-ci il noyabrın 9-da Azərbaycan Xalq Cümhuriyyəti hökumətinin qərarı ilə qəbul edildi. Bayrağımızın mavi, qırmızı və yaşıl rəngləri xalqımızın milli düşüncəsini, müasirlik arzularını və mənəvi dəyərlərini özündə birləşdirdi. Mavi rəng türkçülüyü, qırmızı rəng müasirliyi, inkişafı və demokratik dəyərləri, yaşıl rəng isə İslam mədəniyyətinə və mənəvi irsimizə bağlılığı ifadə edir. Bayrağın mərkəzində yerləşən ağ aypara və səkkizguşəli ulduz isə onun tarixi və milli rəmzi mahiyyətini tamamlayır. Lakin Azərbaycan Xalq Cümhuriyyətinin süqutu ilə bayrağımızın dövlət rəmzi kimi dalğalanmasına son qoyuldu. Buna baxmayaraq, xalqımız üçrəngli bayrağını heç vaxt unutmadı. O, nəsillərin yaddaşında müstəqilliyin, azadlığın və milli birliyin müqəddəs nişanəsi kimi yaşadı. Azərbaycan xalqının müstəqillik arzusu heç vaxt sönmədi. 1990-cı il noyabrın 17-də Naxçıvan Muxtar Respublikası Ali Məclisinin iclasında ümummilli lider Heydər Əliyevin təşəbbüsü ilə üçrəngli bayrağımız yenidən qaldırıldı. Bu tarixi hadisə milli dövlətçilik ənənələrinin bərpası istiqamətində mühüm addım oldu. 1991-ci il fevralın 5-də Azərbaycan Respublikasının Ali Soveti üçrəngli bayrağımızı dövlət bayrağı kimi yenidən qəbul etdi. Beləliklə, uzun illər xalqımızın qəlbində yaşayan istiqlal rəmzi yenidən dövlət müstəqilliyimizin əsas atributlarından birinə çevrildi. 1991-ci il oktyabrın 18-də Azərbaycanın dövlət müstəqilliyinin bərpası ilə üçrəngli bayrağımız müstəqil dövlətimizin suverenliyini və milli iradəsini təcəssüm etdirməyə başladı.

     Üçrəngli bayrağımızın tarixində ən möhtəşəm səhifələrdən biri 2020-ci ildə Vətən müharibəsi zamanı yazıldı. Azərbaycan Ordusunun qəhrəmanlığı, xalqımızın birliyi, dövlətimizin qətiyyətli siyasəti və Ali Baş Komandanın rəhbərliyi ilə torpaqlarımızın işğaldan azad edilməsi milli tariximizin şanlı Zəfərinə çevrildi. 44 gün davam edən Vətən müharibəsində Azərbaycan əsgəri yalnız torpaqlarımızı azad etmədi, həm də üçrəngli bayrağımızın müqəddəsliyini bütün dünyaya nümayiş etdirdi. İşğaldan azad edilən ərazilərdə bayrağımızın dalğalanması milyonlarla azərbaycanlının illərlə gözlədiyi arzunun gerçəkləşməsi idi. Şuşada, Cəbrayılda, Füzulidə, Zəngilanda, Qubadlıda, Ağdamda və digər azad edilmiş ərazilərimizdə üçrəngli bayrağımızın yüksəlməsi xalqımıza unudulmaz sevinc və qürur yaşatdı. 2020-ci il dekabrın 10-da Bakıda keçirilən Zəfər paradında üçrəngli bayrağımızın əzəmətlə dalğalanması Azərbaycan dövlətinin gücünü, xalqımızın birliyini və ordumuzun qüdrətini nümayiş etdirdi. 2023-cü il sentyabrın 20-də həyata keçirilmiş antiterror tədbirlərindən sonra Azərbaycanın bütün suveren ərazilərində dövlət suverenliyinin bərpası ölkəmizin tarixində yeni mərhələnin başlanğıcı oldu. Üçrəngli bayrağımızın Xankəndidə və digər ərazilərimizdə dalğalanması dövlətimizin suverenliyinin və ərazi bütövlüyünün rəmzinə çevrildi.

     Bu gün bayrağımızın hər bir qarış torpağımızda dalğalanması xalqımızın mübarizəsinin, şəhidlərimizin qanı bahasına qazanılmış Zəfərin və milli birliyimizin təntənəsidir. Azərbaycan bayrağı şəhidlərimizin müqəddəs əmanətidir. Bu bayrağın dalğalanması uğrunda canından keçən qəhrəmanlarımızın xatirəsi xalqımızın yaddaşında əbədi yaşayacaqdır. Onların göstərdiyi igidlik, Vətən sevgisi və fədakarlıq gələcək nəsillər üçün əsl qəhrəmanlıq məktəbidir. Hər bir azərbaycanlı bilməlidir ki, bayrağa hörmət dövlətə, Vətənə və milli dəyərlərə hörmət deməkdir. Dövlət bayrağımızın qorunması, onun ucalığının daim saxlanılması hər bir vətəndaşın mənəvi borcudur. Bu gün məktəblərdə, dövlət müəssisələrində, hərbi hissələrdə, şəhər və kəndlərimizdə üçrəngli bayrağımızın dalğalanması müstəqilliyimizin gündəlik təcəssümüdür. Xüsusilə gənc nəslin milli rəmzlərimizə hörmət ruhunda tərbiyə olunması dövlətçilik ənənələrimizin gələcək nəsillərə ötürülməsi baxımından mühüm əhəmiyyət daşıyır.

     Azərbaycanın üçrəngli Dövlət Bayrağı keçmişimizin şanlı tarixini, bu günümüzün qüdrətini və gələcəyimizin parlaq ümidlərini özündə birləşdirən əbədi istiqlal rəmzidir. O, xalqımızın azadlıq mübarizəsinin, milli birliyinin, dövlət müstəqilliyinin və tarixi Zəfərinin simvoludur. Bu gün üçrəngli bayrağımız dünyanın müxtəlif ölkələrində yaşayan milyonlarla azərbaycanlının qəlbində eyni qürur və sevgi ilə dalğalanır. Harada yaşamasından asılı olmayaraq, hər bir azərbaycanlı üçün bu bayraq Vətənin, doğma torpağın və milli kimliyin müqəddəs nişanəsidir. Bayrağımızın ucalığı xalqımızın ucalığı, onun əzəməti dövlətimizin qüdrəti, onun əbədi dalğalanması isə müstəqilliyimizin davamlılığı deməkdir.

Qoy üçrəngli bayrağımız hər zaman zirvələrdə dalğalansın! Qoy onun kölgəsində yaşayan xalqımız daim sülh, əmin-amanlıq və firavanlıq içində yaşasın! Bayrağımız daim uca, Azərbaycanımız əbədi müstəqil olsun!

Yaşasın müstəqil Azərbaycan! Yaşasın üçrəngli bayrağımız!

Göyərçin Səfərova

Yeni Azərbaycan Partiyası Naxçıvan şəhər təşkilatının fəalı,

Naxçıvan Dövlət Universitetinin tələbəsi