Dünən Bakı Ali Neft Məktəbində (BANM) “Yataqların işlənməsinin və dənizdə və quruda karbohidrogenlərin hasilatının müasir texnologiyaları” mövzusunda beynəlxalq seminar öz işinə başlayıb. Seminar “Əsrin müqaviləsi”nin imzalanmasının 20-ci ildönümünə həsr olunmuş tədbirlər çərçivəsində keçirilir. Bakı Ali Neft Məktəbinin rektoru Elmar Qasımov seminarı açaraq tədbirin Ümummilli lider Heydər Əliyevin müəllifi olduğu neft strategiyasının təntənəsi olan “Əsrin müqaviləsi”nin 20-ci ildönümünə həsr olunduğunu qeyd edib. Rektorun sözlərinə görə, hazırda Prezident İlham Əliyev neft strategiyasını uğurla həyata keçirir.
O bildirib ki, seminar Azərbaycan Respublikası Dövlət Neft Şirkətinin dəstəyi ilə Böyük Britaniyanın “Confidence Capital ltd.” Şirkəti ilə birlikdə keçirilir. Məqsəd Azərbaycanın neft-qaz yataqlarının işlənməsində, o cümlədən, quruda və dənizdə karbohidrogenlərin hasilatı sahəsində əldə etdiyi təcrübənin xarici ölkələrin mütəxəssisləri arasında yayılmasıdır.
Seminarın məşğələlərini BANM-in Neft-qaz mühəndisliyi kafedrasının müdiri, professor Arif Məmmədzadə və Böyük Britaniyadan dəvət olunmuş mütəxəssis Hernan De Kaso aparacaq. Dinləyiciləri isə Azərbaycanın, Rusiyanın və Ukraynanın neft-qaz sektorunun mütəxəssisləridirlər. Oktyabrın 8-9-da seminarın iştirakçıları üçün neft-qaz yataqlarının ümumi xarakteristikaları, yataqların işlənməsinin tənzimlənməsi, neftveriminin artırılması üsulları, neft-qaz hasilatı texnologiyaları və s. məsələlər üzrə məruzələr təqdim olunacaq.
Oktyabrın 10-11-də isə tədbirin iştirakçıları üçün “Neft Daşları”na texniki səfər təşkil olunacaq və seminar 2 gün ərzində orada öz işini davam etdirəcək.
N.BAYRAMLI