Ağdam – Zəfərimizin ağ səhifəsi

Ağdam – Zəfərimizin ağ səhifəsi

 

Tarixin yaddaşına qürur, qəhrəmanlıq və yenidən doğuluş günü kimi həkk olunan 20 noyabr Azərbaycan xalqı üçün xüsusi məna daşıyır. Bu tarix Ağdam şəhərinin işğaldan azad edildiyi, doğma yurdun yenidən Azərbaycanın suveren həyatına qovuşduğu gündür. Ağdam Şəhəri Günü xalqımızın tarixi ədalətə inamının, milli birliyinin və dövlətimizin gücünün təntənəsidir.

Ağdam Qarabağın qədim yaşayış məskənlərindən, zəngin tarixi-mədəni irsə malik şəhərlərindən biridir. XVIII əsrdə əsası qoyulan şəhər uzun illər ərzində Qarabağın mühüm iqtisadi, mədəni və ictimai mərkəzlərindən biri kimi tanınıb. Pənah xanın imarəti, türbələr, məscidlər və digər tarixi abidələr Ağdamın zəngin keçmişindən xəbər verir. Bu torpaq özünün mərd, zəhmətkeş və qonaqpərvər insanları ilə də Azərbaycanın ictimai həyatında xüsusi yer tutub.

1993-cü il iyulun 23-də Ağdam şəhəri Ermənistan silahlı qüvvələri tərəfindən işğal edildi. İşğal illərində şəhər və rayonun yaşayış məntəqələri dağıntılara məruz qaldı, tarixi-mədəni irsə ciddi ziyan vuruldu, yüz minlərlə insan doğma yurd-yuvasından didərgin düşdü. Bir zamanlar həyatın qaynayıb-daşdığı Ağdam xarabalığa çevrildi. Lakin ağdamlıların qəlbində doğma torpağa qayıtmaq ümidi heç vaxt sönmədi.

2020-ci il sentyabrın 27-də başlayan Vətən müharibəsi Azərbaycan xalqının iradəsini və ordumuzun qüdrətini bütün dünyaya nümayiş etdirdi. Müzəffər Ali Baş Komandan, ölkə Prezidenti cənab İlham Əliyevin rəhbərliyi ilə Azərbaycan Ordusu 44 gün ərzində tarixi Zəfər qazandı. Xalqımızın birliyi, əsgər və zabitlərimizin qəhrəmanlığı, şəhidlərimizin canı və qazilərimizin fədakarlığı sayəsində torpaqlarımızın azadlığı təmin olundu.

2020-ci il noyabrın 10-da imzalanmış üçtərəfli bəyanata əsasən, Ağdam rayonunun işğal altında qalan hissəsi noyabrın 20-də Azərbaycana təhvil verildi. Beləliklə, Ağdam uzun illər davam edən işğaldan azad olundu. Bu hadisə əlavə insan tələfatının qarşısının alınması baxımından da mühüm əhəmiyyət daşıyırdı. Həmin gün Ağdamın tarixində yeni mərhələnin başlanğıcı oldu. Prezident İlham Əliyev 2020-ci il noyabrın 23-də Ağdam şəhərinə səfəri zamanı burada Azərbaycan bayrağını ucaltdı.

Prezident İlham Əliyevin 2023-cü il 31 iyul tarixli Sərəncamı ilə 20 noyabr Ağdam Şəhəri Günü kimi təsis edildi. Bu qərar tarixi Qələbənin əbədiləşdirilməsi, Ağdamın azad olunmasının əhəmiyyətinin gələcək nəsillərə çatdırılması baxımından mühüm addımdır. Hər il qeyd olunan bu gün həm də şəhidlərimizin xatirəsinə ehtiram, qazilərimizin fədakarlığına minnətdarlıq ifadəsidir.

Bu gün Ağdamda genişmiqyaslı bərpa və quruculuq işləri həyata keçirilir. Müasir yol və nəqliyyat infrastrukturu qurulur, yaşayış məhəllələri, sosial obyektlər, təhsil və səhiyyə müəssisələri, istehsal sahələri yaradılır. Ağdam Sənaye Parkı, yeni infrastruktur layihələri və şəhərin Baş Planı bölgənin iqtisadi potensialının dirçəldilməsinə xidmət edir. Eyni zamanda, tarixi-mədəni abidələrin bərpası və ərazilərin minalardan təmizlənməsi istiqamətində mühüm işlər görülür.

Böyük Qayıdış Proqramı Ağdamın gələcəyində yeni səhifə açır. Doğma yurdlarına qayıdan sakinlər şəhərin həyatına yenidən nəfəs verir, evlərdə işıqlar yanır, küçələrdə həyat canlanır. Ağdamın yenidən qurulması təkcə bir şəhərin bərpası deyil, həm də uzun illər yurd həsrəti çəkən insanların arzularının gerçəkləşməsidir. Bu proses dövlətimizin gücünü, xalqımızın qurub-yaratmaq əzmini nümayiş etdirir. 4 oktyabr 2022-ci ildə ölkə başçısı cənab İlham Əliyevin Ağdam rayonuna növbəti səfəri həm şəhər mərkəzinin, həm də kəndlərin bərpası istiqamətində  mühüm infrastruktur, turizm və mədəniyyət obyektlərinin təməlqoyma və açılış mərasimləri ilə əlamətdar oldu.

20 noyabr – Ağdam Şəhəri Günü hər bir azərbaycanlıya Vətən sevgisini, milli həmrəyliyi və tarixi yaddaşı xatırladır. Ağdamın keçmişi ilə qürur duyur, bu gününü böyük sevinc və iftixarla qarşılayırıq. Yenidən qurulan Ağdam gələcəkdə Qarabağın ən gözəl, müasir və inkişaf etmiş şəhərlərindən birinə çevriləcəkdir.

Qadir İbrahimov

YAP Culfa rayon təşkilatının sədri