Müasir Azərbaycan tarixinin ən görkəmli siması olan dahi şəxsiyyət Heydər Əliyevin həyat və fəaliyyətinin öyrənilməsinə həsr edilən “Ulu öndər Heydər Əliyev müstəqil Azərbaycanın memarı və qurucusudur” və “Ümummilli lider Heydər Əliyevin ideyaları müasir Azərbaycanın sosial-iqtisadi inkişafının təminatçısıdır” mövzularındakı açıq dərslərdə Ağstafa məktəbliləri yüksək fəallıq nümayiş etdirirlər.
Rayon Təhsil şöbəsindən AzərTAc-a bildiriblər ki, Heydər Əliyev Mərkəzində tarix müəllimi Sədayə Bilalova tərəfindən keçirilən növbəti açıq dərsdə Həsənsu və Aşağı Kəsəmən kənd tam orta məktəblərinin XI sinif şagirdləri iştirak ediblər.
Dərs prosesində şagirdlərə Ümummilli liderin həyat və fəaliyyəti haqqında geniş məlumat verilib, bugünkü müstəqil dövlətimizin qorunub saxlanılmasında və inkişaf etdirilməsində Ulu öndərin əvəzsiz xidmətləri qeyd olunub.
Açıq dərsdə Ümummilli lider haqqında sənədli film də nümayiş etdirilib.