Bakı-Kiyev-Bakı sərnişin qatarı və Bakı-Dnepr birbaşa vaqonunun hərəkəti dayandırılır

Bakı-Kiyev-Bakı sərnişin qatarı və Bakı-Dnepr birbaşa vaqonunun hərəkəti dayandırılır

Ukraynanın Nazirlər Kabinetinin müvafiq qərarına əsasən, koronavirus (COVID-19) infeksiyasının ölkə ərazisində yayılmasının qarşısının alınması məqsədilə martın 17-si saat 00:01-dən etibarən bütün beynəlxalq sərnişin qatarlarının hərəkəti müvəqqəti dayandırılır.

“Azərbaycan Dəmir Yolları” QSC-nin Mətbuat katibliyi şöbəsindən AZƏRTAC-a bildirilib ki, bununla əlaqədar olaraq, Bakıdan martın 21-də 369/370 nömrəli Bakı-Kiyev-Bakı sərnişin qatarı və tərkibində hərəkət edən Bakı-Dnepr birbaşa vaqonunun hərəkəti xüsusi göstərişədək dayandırılır. Bakıdan martın 14-də yola düşən Bakı-Kiyev-Bakı sərnişin qatarı isə Xarkov-sərnişin stansiyasınadək hərəkət edib. Qatar geriyə Xarkov-sərnişin stansiyasından martın 16-da yerli vaxtla saat 15:30-da yola düşməklə Rusiya ərazisinə təhvil veriləcək və öz hərəkət cədvəli üzrə Bakıya qaytarılacaq.