Mansur Quliyev

YAP Ağdam rayon təşkilatının sədri

Azərbaycan xalqının tarixinə qızıl hərflərlə yazılmış 25 oktyabr 2020-ci il ölkəmizin ərazi bütövlüyünün bərpası yolunda mühüm mərhələlərdən biri kimi yaddaşlarda yaşayır. Həmin gün Müzəffər Azərbaycan Ordusunun qəhrəmanlığı, əsgər və zabitlərimizin misilsiz şücaəti, xalqımızın sarsılmaz iradəsi nəticəsində Qubadlı şəhəri Ermənistanın işğalından azad edildi. Bu tarixi hadisə yalnız bir şəhərin azadlığı deyil, həm də uzun illər doğma yurd həsrəti ilə yaşayan insanların qayıdış ümidlərinin gerçəkləşməsinə doğru atılmış mühüm addım idi.

Prezident, Müzəffər Ali Baş Komandan İlham Əliyevin Qubadlının azad edilməsinin tarixi əhəmiyyətini ifadə edən “Qubadlıya öz sahibləri qayıdıb. Qubadlının işğaldan azad edilməsi tarixi hadisə idi. Oktyabrın 25-də Qubadlı şəhərinin azad edilməsi bizim qələbəmizi yaxınlaşdırdı” fikirləri bu günün mahiyyətini, xalqımızın qələbə əzmini və tarixi ədalətin bərpasını dolğun şəkildə ifadə edir.

Qubadlının azadlığı – Zəfərə aparan yolun mühüm mərhələsi

44 günlük Vətən müharibəsi Azərbaycan xalqının milli birliyini, dövlətimizin gücünü və ordumuzun döyüş qabiliyyətini bütün dünyaya nümayiş etdirdi. Müzəffər Ali Baş Komandan İlham Əliyevin rəhbərliyi ilə Azərbaycan Ordusu hər gün yeni uğurlara imza ataraq torpaqlarımızı işğaldan azad etdi. Cəbrayıl və Zəngilan istiqamətlərində əldə edilən nailiyyətlərdən sonra Qubadlı uğrunda gedən döyüşlər də müharibənin gedişində mühüm yer tutdu.

2020-ci il oktyabrın 25-də Qubadlı şəhərinin azad edilməsi hərbi-strateji baxımdan əhəmiyyətli hadisə idi. Prezident İlham Əliyevin də vurğuladığı kimi, bu qələbə Azərbaycanın ümumi Zəfərini yaxınlaşdırdı. Qubadlının azad olunmasından sonra Laçın istiqamətində irəliləyiş üçün imkanlar genişləndi, Azərbaycan Ordusunun qarşısında yeni strateji hədəflər açıldı. Noyabrın 8-də Şuşanın azad edilməsi, noyabrın 10-da isə Ermənistanın kapitulyasiyasını təsdiqləyən üçtərəfli Bəyanatın imzalanması ilə Vətən müharibəsi Azərbaycanın tarixi Qələbəsi ilə başa çatdı.

Qubadlı uğrunda döyüşlərdə qəhrəmanlıq göstərən hərbçilərimizin, canlarını Vətən uğrunda fəda edən şəhidlərimizin fədakarlığı heç vaxt unudulmayacaq. Onların qanı və canı bahasına azad edilən hər qarış torpaq xalqımız üçün müqəddəsdir. Bu gün Qubadlı Şəhəri Gününü qeyd edərkən şəhidlərimizin əziz xatirəsini dərin ehtiramla yad edir, qazilərimizə minnətdarlığımızı bildirir, Vətən müharibəsinin bütün iştirakçılarının qarşısında baş əyirik.

“Qubadlıya öz sahibləri qayıdıb” – tarixi ədalətin təntənəsi

Prezident İlham Əliyevin səsləndirdiyi “Qubadlıya öz sahibləri qayıdıb” ifadəsi xüsusi məna daşıyır. Bu sözlər uzun illər doğma torpaqlarından ayrı düşmüş insanların ağrı-acısını, yurd həsrətini və nəhayət, azadlıq sevincini özündə birləşdirir. İşğal dövründə Qubadlı sakinləri öz doğma evlərindən, ata-baba ocaqlarından uzaqda yaşamağa məcbur olsalar da, torpaqlarına qayıtmaq ümidini heç vaxt itirmədilər.

Azərbaycan dövləti və xalqı bu tarixi ədalətsizliklə barışmadı. Ulu Öndər Heydər Əliyevin müəyyən etdiyi dövlətçilik xətti, Prezident İlham Əliyevin qətiyyətli siyasəti və Azərbaycan Ordusunun gücü ölkəmizin ərazi bütövlüyünün bərpasını təmin etdi. 44 günlük Vətən müharibəsi sübut etdi ki, Azərbaycan xalqının iradəsini sındırmaq, onun torpaqlarına bağlılığını zəiflətmək mümkün deyil.

Qubadlı bu gün təkcə azad edilmiş şəhər deyil, həm də milli yaddaşımızın, tarixi kimliyimizin və doğma yurda sədaqətimizin rəmzidir. Burada dalğalanan üçrəngli Azərbaycan Bayrağı dövlət suverenliyimizin, milli qürurumuzun və xalqımızın yenilməzliyinin təcəssümüdür.

Qubadlıda yeni həyatın başlanğıcı

Qələbənin əsl mənası azad edilmiş torpaqlarda həyatın yenidən qurulması, insanların təhlükəsiz və layiqli yaşayışının təmin edilməsidir. Bu gün Qarabağ və Şərqi Zəngəzurda həyata keçirilən bərpa və quruculuq işləri Azərbaycanın gələcəyə hesablanmış inkişaf strategiyasının mühüm istiqamətidir. Qubadlıda da infrastrukturun bərpası, ərazinin minalardan təmizlənməsi və şəhərin gələcək inkişafının planlaşdırılması istiqamətində tədbirlər görülür.

Azərbaycan dövlətinin qarşıya qoyduğu əsas məqsəd işğaldan azad edilmiş əraziləri yenidən qurmaq, iqtisadi potensialını bərpa etmək, müasir yaşayış və sosial infrastruktur yaratmaq, keçmiş məcburi köçkünlərin doğma torpaqlarına təhlükəsiz və ləyaqətli qayıdışını təmin etməkdir. Bu proses Böyük Qayıdış proqramının əsas məzmununu təşkil edir.

Əminliklə demək olar ki, Qubadlıda görülən işlər gələcəkdə şəhərin sosial-iqtisadi inkişafına, bölgənin imkanlarının genişlənməsinə və doğma yurdla insanların bağlarının daha da möhkəmlənməsinə xidmət edəcək. Qubadlı öz tarixi simasını yenidən qazanmalı, burada həyat canlanmalı, gələcək nəsillər öz ata-baba yurdlarında böyüməlidirlər.

Prezident İlham Əliyevin 2023-cü il iyulun 31-də imzaladığı Sərəncamla oktyabrın 25-nin Qubadlı Şəhəri Günü kimi təsis edilməsi də bu tarixi hadisənin milli yaddaşımızda əbədiləşdirilməsi baxımından mühüm əhəmiyyət daşıyır. Hər il qeyd edilən bu gün şəhidlərimizin xatirəsinə ehtiramın, qazilərimizə minnətdarlığın və xalqımızın Qələbə sevincinin ifadəsidir.

Zəfərdən Böyük Qayıdışa doğru

Qubadlının azad edilməsi bir daha göstərdi ki, dövlətin gücü, xalqın birliyi və ordunun qəhrəmanlığı qarşıya qoyulan ən mühüm tarixi vəzifələrin həyata keçirilməsində həlledici rol oynayır. Bu Qələbə Azərbaycan xalqının öz torpaqlarına sahib çıxmaq əzmini, müstəqil dövlətimizin suveren hüquqlarını bərpa etmək iradəsini nümayiş etdirdi.

Bu gün hər bir azərbaycanlı Qubadlı Şəhəri Gününü qürur hissi ilə qeyd edir. Çünki Qubadlının azadlığı bütövlükdə Azərbaycanın Zəfər tarixinin ayrılmaz hissəsidir. Bu tarix bizə Vətən sevgisinin, milli həmrəyliyin və dövlətə sədaqətin nə qədər böyük gücə malik olduğunu xatırladır.

Qubadlı Şəhəri Günü gənc nəslin vətənpərvərlik ruhunda tərbiyəsi, tarixi həqiqətlərin gələcək nəsillərə çatdırılması və Zəfər salnaməmizin təbliği baxımından xüsusi əhəmiyyət daşıyır. Biz şəhidlərimizin əziz xatirəsini yaşatmalı, qazilərimizin fədakarlığını unutmamalı, Müzəffər Ordumuzun qəhrəmanlığını daim uca tutmalıyıq.

25 Oktyabr – Qubadlı Şəhəri Günü xalqımızın yaddaşında azadlığın, qayıdışın və tarixi ədalətin təntənəsi kimi yaşayacaq. Qubadlıya öz sahibləri qayıdıb və bu qayıdış Azərbaycanın gücünün, birliyinin və sarsılmaz iradəsinin rəmzidir.

Qubadlı azaddır, Azərbaycan bütövdür! Qarabağ və Şərqi Zəngəzurda həyatın yenidən qurulması, Böyük Qayıdışın davam etməsi və doğma torpaqlarımızın inkişafı Azərbaycanın gələcək uğurlarının mühüm təminatıdır.