​25 Oktyabr Azərbaycanın zəfər salnaməsində müstəsna yeri olan, milli qürurumuzun və dövlətçilik iradəmizin təntənəsini təcəssüm etdirən tarixi bir gündür. Müzəffər Ali Baş Komandan cənab İlham Əliyevin vurğuladığı kimi, Zəngəzur mahalının bu qədim yaşayış məskəninə öz əsl sahiblərinin qayıtması və şəhərin azad edilməsi 44 günlük Vətən müharibəsinin gedişatında strateji dönüş nöqtəsi olmuş, Şuşaya və Böyük Qələbəmizə gedən yolu ardına qədər açmışdır. Qubadlı əməliyyatı xüsusi peşəkarlıq, yüksək taktik hazırlıq və fədakarlıq tələb edirdi. Rəşadətli Ordumuz ilk növbədə şəhərə hakim olan strateji yüksəklikləri, Xanlıq, Padar, Sarıyataq kəndlərini azad edərək oktyabrın 25-də şəhəri düşməndən tam təmizlədi. Bu unikal hərbi uğur dövlətimiz tərəfindən yüksək qiymətləndirilmiş, döyüşlərdə şəxsi igidlik göstərmiş 15 min 189 hərbi qulluqçu "Qubadlının azad olunmasına görə" medalı ilə təltif edilmişdir. Dövlət başçımızın 31 iyul 2023-cü il tarixli Sərəncamı ilə 25 oktyabrın Qubadlı şəhəri günü kimi təsbit olunması, eləcə də 2020-ci il dekabrın 23-də Ali Baş Komandanın Qubadlıda şanlı bayrağımızı ucaltması şanlı tariximizin əbədiləşdirilməsinin parlaq rəmzidir.

​Qubadlı rayonu əsrlər boyu zəngin kənd təsərrüfatı ənənələrinə, 13 min 160 hektarlıq meşə zolağına, təbii dərman bitkilərinə və bərəkətli torpaqlara malik strateji coğrafiya olmuşdur. İşğala qədər rayonun təsərrüfat fəaliyyətinin əsasını təşkil edən əkinçilik, heyvandarlıq, xüsusilə tütünçülük, üzümçülük və bostançılıq bütövlükdə respublika iqtisadiyyatında mühüm yer tuturdu. Otuz ilə yaxın davam edən barbarlıq və vandalizm dövründə rayonun bütün sosial infrastrukturu dağıdılmış, kommunikasiya xətləri məhv edilmişdir. Ermənistanın Cenevrə Konvensiyasının tələblərini kobud şəkildə pozaraq yalnız Xanlıq kəndində qanunsuz qəsəbə salması və xaricdən gətirilən erməniləri orada məskunlaşdırması işğalçı siyasətin tərkib hissəsi idi. Lakin bu gün həmin bərəkətli torpaqlar öz qanuni sahiblərini bağrına basaraq yenidən dirçəlir.

​ Böyük Qayıdış konsepsiyasına uyğun olaraq, hazırda Qubadlı rayonunda modern infrastrukturun qurulması və yaşayış məskənlərinin bərpası istiqamətində irimiqyaslı layihələr həyata keçirilir. Bu çərçivədə Mahruzlu və Zilanlı kəndlərinin yenidən qurulması, müasir "ağıllı kənd" standartlarına uyğun layihələndirilməsi doğma ocaqlarına qayıdacaq sakinlərimiz üçün yüksək həyat keyfiyyəti və davamlı məşğulluq imkanları vəd edir. Ölkə rəhbərinin azad edilmiş ərazilərə ardıcıl səfərləri, o cümlədən Qubadlıya səfəri zamanı "Zabuxçay" və "Bərgüşadçay" su anbarlarının layihələri ilə tanış olması, "Azərişıq" ASC-nin 35 kilovoltluq yarımstansiyasının və Rəqəmsal İdarəetmə Mərkəzinin təməlini qoyması bölgənin su və enerji təminatının, eləcə də kənd təsərrüfatı potensialının bərpası üçün etibarlı bünövrə yaradıb. Bu strateji addımlar Qubadlı şəhərinin və bütövlükdə rayonun yaxın gələcəkdə regionun ən müasir, ekoloji cəhətdən təmiz və iqtisadi baxımdan dayanıqlı mərkəzlərindən birinə çevriləcəyini tam əminliklə söyləməyə əsas verir.

​Nəticə etibarilə, Qubadlı şəhəri günü keçmişin nisgilinə vurulan yekun sonluq, müstəqil Azərbaycanın iqtisadi və hərbi qüdrətinin, xalq-iqtidar birliyinin parlaq təzahürüdür. Bu gün Qubadlı səmasında dalğalanan üçrəngli dövlət bayrağımız əbədi suverenliyimizin, milli ləyaqətimizin və qurub-yaratmaq eşqimizin sarsılmaz rəmzidir. Müzəffər Ali Baş Komandanın rəhbərliyi ilə həyata keçirilən bu möhtəşəm dirçəliş salnaməsi Azərbaycan dövlətinin yenilməz gücünü və gələcəyə inamlı addımlarını bütün dünyaya bir daha nümayiş etdirir.

Zahir Qəhrəmanov

YAP Şirvan şəhər təşkilatının sədri