ATƏT-in Bakıdakı layihə əlaqələndiricisinə Fövqəladə Hallar Nazirliyinin fəaliyyəti barədə məlumat verilib

ATƏT-in Bakıdakı layihə əlaqələndiricisinə Fövqəladə Hallar Nazirliyinin fəaliyyəti barədə məlumat verilib

Dekabrın 5-də Azərbaycan Respublikasının fövqəladə hallar naziri Kəmaləddin Heydərov ATƏT-in Bakıdakı layihə əlaqələndiricisi Aleksis Şahtaxtinski ilə görüşüb.
Fövqəladə Hallar Nazirliyinin (FHN) mətbuat xidmətindən AzərTAc-a bildiriblər ki, Kəmaləddin Heydərov ölkəmizdə fövqəladə halların qarşısının alınması və nəticələrinin aradan qaldırılması sahəsində görülən işlər barədə ətraflı məlumat verib. Nazir FHN-in ATƏT ilə əməkdaşlığı çərçivəsində fövqəladə halların idarə olunması, həmçinin ətraf mühit və təhlükəsizlik üzrə layihələrin perspektivlərindən bəhs edib.
Görüşə görə təşəkkürünü bildirən Aleksis Şahtaxtinski vurğulayıb ki, Azərbaycanda fəaliyyəti dövründə ATƏT-in təşəbbüsü ilə həyata keçirilən layihələr üzrə nazirliklə uğurlu əməkdaşlığın davam etdirilməsi üçün səylərini əsirgəməyəcək.
Görüşdə qarşılıqlı maraq doğuran bir sıra məsələlərə dair geniş fikir mübadiləsi aparılıb.