Yeni Azərbaycan Partiyasında (YAP) yaradılan komissiyalar yanvar ayından fəaliyyətə başlayacaq. “Media forum” saytına açıqlama verən Yeni Azərbaycan Partiyası İcra katibinin müavini, millət vəkili Siyavuş Novruzov belə deyib. O bildirib ki, komissiyaların əsasnaməsi hazırlanır: “Əsasnamələr üzərində iş başa çatandan sonra təsdiqlənəcək və komissiyalar fəaliyyətə başlayacaq”.
Siyavuş Novruzov qeyd edib ki, komissiya üzvləri müxtəlif sahələrdə çalışan ekspertlərdən ibarət olacaq: “Komissiyalar fəaliyyət göstərdikləri sahələrdə vəziyyəti izləyəcək, araşdıracaq və təkliflərlə çıxış edəcəklər”.
Noyabrın 7-də Yeni Azərbaycan Partiyasının İdarə Heyəti 12 komissiyanın yaradılması barədə qərar qəbul edib:
İqtisadi məsələlər üzrə komissiya - sədr Eldar İbrahimov (Milli Məclisin Aqrar siyasət komitəsinin sədri),
Sosial məsələlər üzrə komissiya - sədr Zahid Qaralov (YAP Səbail rayon təşkilatının sədri),
Humanitar məsələlər üzrə komissiya - sədr Yusif Hümbətov (“Azərsutikinti” ASC-nin sədri),
Elm və təhsil üzrə komissiya - sədr Abel Məhərrəmov (Deputat, BDU-nun rektoru),
Gənclər, idman və mədəniyyət komissiyası - sədr Vaqif Əliyev (mədəniyyət və turizm nazirinin müavini),
Ailə və qadın məsələləri üzrə komissiya - sədr Nurlana Əliyeva (YAP Qadınlar Şurasının sədri),
Regional inkişaf üzrə komissiya - sədr Arif Rəhimzadə (Milli Məclisin Regional məsələlər komitəsinin sədri),
Beynəlxalq əlaqələr üzrə komissiya - sədr Bahar Muradova (Milli Məclisin sədr müavini),
Partiyalararası əlaqələr və dialoq komissiyası - sədr Əli Həsənov (Prezident Administrasiyasının İctimai-siyasi məsələlər şöbəsinin müdiri),
Mətbuat və ictimai əlaqələr üzrə komissiya - sədr Nizami Xudiyev (Sabiq deputat, YAP Siyasi Şurasının və İdarə Heyətinin üzvü),
Mədəniyyətlərarası dialoq və inteqrasiya komissiyası - sədr Mixail Zabelin (Milli Məclisin deputatı),
Partiyadaxili inkişaf və intizam komissiyası - sədr Kərim Kərimov (YAP İdarə Heyətinin üzvü).