Azərbaycanın Polşadakı səfirliyində ADA Universitetinin bir qrup tələbəsi ilə görüş keçirilib.
Səfirlikdən AZƏRTAC-a bildiriblər ki, görüşdə ADA Universitetinin psixoloqu Zöhrə Məlikova və 14 tələbə iştirak edib.
Səfir Həsən Həsənov tələbələri maraqlandıran sualları cavablandırıb. O, Azərbaycanın dövlətçilik ənənələri, xarici siyasəti haqqında danışıb. Eyni zamanda, Azərbaycan-Polşa münasibətləri, hər iki ölkənin tarixində xüsusi xidmətləri olmuş şəxslər, səfirliyin fəaliyyəti, təşkil olunan silsilə tədbirlər, qurulan xatirə lövhələri, abidələr və ölkəmiz haqqında polyak dilində nəşr olunan kitablar barədə məlumat verib.
Səfir ölkəmizin təbliği istiqamətində fəaliyyətin uğurla aparılmasında gənclərin rolunun mühüm olduğunu vurğulayıb. Bildirib ki, buna görə də gənclərimiz vətənpərvər olmalı, Azərbaycanın tarixini, mədəniyyətini, ədəbiyyatını və dilini öyrənməli, ölkəmizin maraqlarının müdafiəsində fəal iştirak etməlidirlər.