“Azərbaycanda meymunçiçəyi virusu qeydə alınmayıb”.
Bunu “Report”a açıqlamasında səhiyyə naziri Teymur Musayev bildirib.
Onun sözlərinə görə, Səhiyyə Nazirliyi mütəmadi olaraq meymunçiçəyi ilə bağlı açıqlamalarla çıxış edir: “Rəsmi olaraq bəyan edirəm ki, indiyədək Azərbaycanda meymunçiçəyi qeydə alınmayıb”.
“Azərbaycana meymunçiçəyi ilə bağlı testlər və dərmanlar gətiriləcək” - deyə Teymur Musayev bildirib.
Onun sözlərinə görə, Azərbaycan səhiyyəsi istənilən epidemik və pandemik çağırışlara cavab verməyə hazırdır: “Meymunçiçəyi ilə əlaqədar bütün lazımi qabaqlayıcı tədbirlər görülüb. Ümumdünya Səhiyyə Təşkilatı tərəfindən ölkəmizə bu günlərdə testlər gətiriləcək. Eyni zamanda meymunçiçəyinin müalicəsi üçün lazım olan və qeydiyyatdan keçmiş bütün dərman preparatları çox qısa müddətdə ölkəmizə gətiriləcək”.