Azərbaycan ilə İslam Əməkdaşlıq Təşkilatı arasında əlaqələr müzakirə olunub

Azərbaycan ilə İslam Əməkdaşlıq Təşkilatı arasında əlaqələr müzakirə olunub

Martın 6-da Azərbaycanın xarici işlər naziri Elmar Məmmədyarov ölkəmizdə səfərdə olan İslam Əməkdaşlıq Təşkilatının (İƏT) baş katibi İyad bin Amin Mədəni ilə görüşüb.
Xarici İşlər Nazirliyinin mətbuat xidmətindən AzərTAc-a bildirilib ki, Elmar Məmmədyarov Azərbaycanın İƏT ilə siyasi, iqtisadi və humanitar sahələrdə əməkdaşlığının daha da inkişaf etdirilməsində maraqlı olduğunu söyləyib.
İyad bin Amin Mədəni fəal üzv kimi Azərbaycanın İƏT-in fəaliyyətinin dəstəklənməsində oynadığı vacib rolun və təşkilatın inkişafına verdiyi töhfənin yüksək qiymətləndirildiyini bildirib.
Elmar Məmmədyarov Ermənistan-Azərbaycan, Dağlıq Qarabağ münaqişəsi məsələsində Azərbaycanın haqlı mövqeyini dəstəklədiyinə görə İƏT-ə təşəkkürünü ifadə edib.
Görüşdə davamlı inkişafa xidmət edən layihələrin icrası və digər beynəlxalq təşkilatlar ilə əməkdaşlıq məsələləri ətrafında fikir mübadiləsi aparılıb.