Azərbaycanın dövlətçilik tarixində elə müqəddəs və uca tarixlər var ki, onlar xalqımızın yaddaşında əbədi həkk olunub. Həmin tarixlərdən biri də hər il böyük qürur, sevgi və ehtiramla qeyd olunan 9 Noyabr – Dövlət Bayrağı Günüdür. Üçrəngli bayrağımız sadəcə dövlət atributu deyil, həm də xalqımızın azadlıq iradəsinin, suverenliyinin, keçmişdən gələn mübarizə əzminin və parlaq gələcəyə olan inamının ən ali ifadəsidir. Azərbaycanın üçrəngli bayrağının tarixi XX əsrin əvvəllərinə – Şərkdə ilk demokratik respublika olan Azərbaycan Xalq Cümhuriyyətinin yaranması dövrünə gedib çıxır. 1918-ci il noyabrın 9-da Azərbaycan Xalq Cümhuriyyəti Nazirlər Şurası üçrəngli bayrağın milli bayraq kimi qəbul edilməsi haqqında qərar imzaladı. Cümhuriyyət banilərinin irəli sürdüyü bu bayraq qısa ömürlü olsa da, xalqımızın azadlıq idealının simvoluna çevrildi. Cümhuriyyət qurucularından biri olan Əli bəy Hüseynzadənin ideyası əsasında formalaşan bu bayraq xalqımızın milli kimliyini və gələcək hədəflərini özündə birləşdirirdi.

Sovet işğalı illərində bu müqəddəs bayrağın dalğalanması qadağan edilsə də, onun ideyası xalqın qəlbində yaşamağa davam etdi. 1990-cı il noyabrın 17-də ulu öndər Heydər Əliyevin təşəbbüsü ilə Naxçıvan Muxtar Respublikasının Ali Məclisində AXC-nin üçrəngli bayrağı Naxçıvanın muxtariyyət bayrağı olaraq qəbul edildi və yenidən rəsmi olaraq dalğalandı. Bu tarixi addım Azərbaycanın ümumi istiqlal mübarizəsində mühüm dönüş nöqtəsi oldu.

Bayrağımızın hər bir rəngi və üzərindəki simvollar dərin fəlsəfi, tarixi və ideoloji məna daşıyır. Mavi rəng türkçülüyü, türk xalqlarının birliyini və zəngin mədəniyyətini təmsil edir. Eyni zamanda, səmada sülhün, əmin-amanlığın və sonsuzluğun simvoludur. Qırmızı rəng müasir cəmiyyət quruculuğunu, demokratiyanı, inkişafı və azadlıq uğrunda tökülən qanların – qəhrəmanlığın rəmzidir. Yaşıl rəng İslam sivilizasiyasını, dinə və mənəvi dəyərlərə bağlılığı, eləcə də təbiətin yenilənməsini və bolluğu simvolizə edir. Aypara İslam dininin rəmzi olmaqla yanaşı, Şərq mədəniyyəti ilə bağları göstərir. Səkkizguşəli ulduz isə ərəb əlifbasında "Azərbaycan" sözünün yazılışına əsaslanır və tarixdəki səkkiz türk xalqını özündə birləşdirir.

Azərbaycan Respublikasının Prezidenti İlham Əliyevin 17 noyabr 2009-cu il tarixli Sərəncamı ilə hər il noyabrın 9-u ölkəmizdə Dövlət Bayrağı Günü kimi təsis edilmişdir. Bu addım xalqımızın milli dəyərlərə, dövlətçilik tarixinə olan sədaqətinin və hörmətinin bariz nümunəsidir. Həmin il Bakıda – Dövlət Bayrağı Meydanının yaradılması və dünyanın ən hündür bayraq dirəklərindən birində üçrəngli bayrağımızın əzəmətlə dalğalanması hər bir azərbaycanlının qəlbində böyük coşğu və iftixar hissi oyatdı. 9 Noyabr Dövlət Bayrağı Gününün Azərbaycan tarixində xüsusi, təkrarolunmaz bir məqamı da vardır. Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində qazanılan möhtəşəm Zəfərdən dərhal sonra – 2020-ci il noyabrın 8-də qədim mədəniyyət mərkəzimiz olan Şuşa şəhəri işğaldan azad edildi. Cəmi bir gün sonra, 9 Noyabr 2020-ci il tarixində Azərbaycan bayrağı işğaldan azad olunan bütün torpaqlarımızda, xüsusilə də Zəfərin rəmzinə çevrilən Şuşada ucaldıldı. Bu, sadəcə bir ərazi bütövlüyünün bərpası deyil, həm də əyilməz milli qürurumuzun təntənəsi idi. Bu gün üçrəngli bayrağımız suverenliyimizin bərqərar olduğu Xankəndidə, Xocalıda, Laçında, Kəlbəcərdə və digər doğma torpaqlarımızda əzəmətlə dalğalanmaqdadır.

Üçrəngli bayrağımız şəhidlərimizin qanı ilə suvarılmış, xalqımızın qəhrəmanlıq salnaməsinə qızıl hərflərlə yazılmışdır. Bayrağa sayğı və ehtiram – Vətənə, torpağa, dövlətə sədaqətin ən ali göstəricisidir. Bu gün hər bir Azərbaycan vətəndaşı harada yaşamasından asılı olmayaraq, üçrəngli bayrağımıza baxanda qürur duyur. Azərbaycan Bayrağı Günü xalqımızın birliyinin, əbədi müstəqilliyinin və sarsılmaz iradəsinin əbədi təntənəsidir. Qoy hər zaman göylərimizdə azadlıq rəmzimiz – üçrəngli bayrağımız dalğalansın!

Vüsar İsmayılov

Yeni Azərbaycan Partiyası Binəqədi rayon təşkilatının sədri