Prosesi “masaya” keçirmək üçün...

Bakı:

10 °C

93 %

7 m/s

Əlaqə

AZ RU EN

Ana səhifə / Analitik / Prosesi “masaya” keçirmək üçün...

Prosesi “masaya” keçirmək üçün...

16.02.2024 [10:42]

ABŞ ilk növbədə Ukraynaya silah göndərməyi dayandırmalıdır

BMT Təhlükəsizlik Şurasının fevralın 12-də keçirilən iclasında əsas mövzu Rusiya-Ukrayna müharibəsi oldu. İclasda Rusiyaya qarşı sərt tədbirlərin görülməsini dəstəkləyən ölkələrlə yanaşı, şimal qonşumuzu müdafiə edənlər də tapıldı. Toplantıda Çinin BMT-dəki daimi nümayəndəsi Rusiyanı dəstəkləyərək Qərbi Ukraynanı “silahla doldurmamağa” çağırıb. O, ABŞ və Avropaya Minsk razılaşmalarının həyata keçirilməsinin zəruriliyini də xatırladıb.

“Ukraynanı silahlandırmağı dayandırın!”

Çinin BMT-dəki daimi nümayəndəsi Zanq Yunun sözlərinə görə, münaqişənin diplomatik yolla həllinə nail olmaq üçün ABŞ ilk növbədə Ukraynaya silah göndərməyi dayandırmalıdır: “Bəzi ölkələr ocağa yanacaq tökməyə dərhal son verməli və beynəlxalq ictimaiyyətin diplomatik səylərinə xələl gətirməyi dayandırmalıdır”. Aydındır ki, “bəzi ölkələr” dedikdə Çin nümayəndəsi ilk növbədə Birləşmiş Ştatları nəzərdə tutur.

Tamamilə anlaşılandır ki, Çinin bu mövqeyi Kremlin münaqişənin diplomatik həllinə maraq göstərdiyi bir zamanda səslənir. Ukrayna isə öz növbəsində Rusiya qoşunlarının nəzarətində olan ərazilərini geri qaytarmaq üçün növbəti əks-hücum əməliyyatına başlamağı planlaşdırır. Yeni hərbi əməliyyatlara başlamaq üçünsə Kiyevin xaricdən əlavə maliyyə dəstəyinə ehtiyacı var. Analitiklər bildirirlər ki, Çin rəsmi olaraq Rusiyaya hərbi dəstək vermir, lakin bu ölkənin maliyyə yardımı Kremlə silah istehsal etməyə və hərbi ehtiyacları ödəməyə imkan verir.

Sözügedən tədbirdə Çin münaqişə tərəflərini 2014-cü ildə əldə olunmuş Minsk razılaşmasını qarşılıqlı surətdə həyata keçirməyə çağırıb. “Bir ölkənin təhlükəsizliyi digər dövlətlərin təhlükəsizliyini riskə atmaq hesabına təmin edilə bilməz və hərbi qrupların gücləndirilməsi, hətta genişləndirilməsi fonunda regional təhlükəsizlik, sülh mövcud ola bilməz. Bütün ölkələrin təhlükəsizlik maraqları bərabərdir”, - deyə Çinin BMT-dəki daimi nümayəndəsi Zanq Yun bildirib.

Çin rəsmisi eyni zamanda NATO-nu da kəskin tənqid edib: “İndiki zamanda NATO təzyiq, böhtan və birtərəfli sanksiyalarla məşğul olmalı deyil, alyans mübahisələrin həllində dialoq və məsləhətləşmələrə, bir sözlə, münaqişənin siyasi yolla həllinə doğru aparan istiqamətə üstünlük verməlidir. NATO ümumiyyətlə mümkün qədər az güc tətbiq etməlidir. Bu təşkilat güc mifindən ayılmalı və dayanmalıdır. Təəssüf ki, NATO əksini edir, qarşısındakını müharibə ilə hədələyir, zorakı tələblər irəli sürür”.

Kiyev xarici yardımdan asılı vəziyyətdə

Bu arada ABŞ Senatı Ukrayna, İsrail və Tayvana yardım paketlərini nəzərdə tutan 95,3 milyard dollarlıq xarici maliyyələşdirməyə dair qanun layihəsini təsdiqləyib. CNN xəbər verir ki, senatorlar Ukraynaya 60,06 milyard dollar məbləğində əlavə yardımın ayrılması məsələsinə bir daha baxacaqlar. Lakin ekspertlər bildirirlər ki, Ukraynanın itirdiyi əraziləri geri qaytarması üçün ölkəyə maliyyə yardımlarının ayrılması çox vacibdir.

“Qərbin hərbi yardımları olmasa, Ukraynanın 2025-ci ildə irimiqyaslı hücum əməliyyatlarını uğurla həyata keçirmək şansı optimist diapazonun xaricindədir. Bu da öz növbəsində Ukrayna və onun müttəfiqləri üçün fərqli uzunmüddətli strategiya qurmağı tələb edir”, - bu sözləri Karnegi Fondunun Rusiya-Avrasiya Proqramının direktoru Eygen Rumer məsələyə dair açıqlamasında dilə gətirib. “Beləliklə, Qərb Rusiya-Ukrayna müharibəsinin uzanmasında maraqlı kimi görünür”, - deyən direktor fikrini belə tamamlayıb.

Murad Köhnəqala

Paylaş:

Baxılıb: 642 dəfə