Strateji tərəfdaşlıq modeli

Bakı:

20°C

88%

7m/s

Əlaqə

AZ RU EN

Ana səhifə / Arxiv / Strateji tərəfdaşlıq modeli

Strateji tərəfdaşlıq modeli

21.10.2025 [15:14]

Mansur Quliyev

YAP Ağdam rayon təşkilatının sədri

Prezident İlham Əliyevin 18 oktyabr 2025-ci ildə Qazaxıstanın “Kazinform” informasiya agentliyinə verdiyi müsahibə iki qardaş ölkə – Azərbaycan və Qazaxıstan arasında möhkəm siyasi, iqtisadi və mənəvi birliyin növbəti təzahürü oldu. Dövlət başçımızın müsahibəsində səsləndirdiyi fikirlər bu gün regionda və bütövlükdə türk dünyasında formalaşan yeni geosiyasi reallıqları, qarşılıqlı etimad və strateji tərəfdaşlıq üzərində qurulan münasibətlərin dərin mahiyyətini bir daha nümayiş etdirdi. Azərbaycan ilə Qazaxıstan əlaqələri tarixən ortaq köklərə, dil, din və mədəniyyət birliyinə əsaslanır. Ulu öndər Heydər Əliyevin və Qazaxıstanın görkəmli lideri Nursultan Nazarbayevin yaratdığı dostluq və əməkdaşlıq təməli bu gün Prezident İlham Əliyev və Prezident Kasım-Jomart Tokayev tərəfindən müasir tələblərə uyğun şəkildə inkişaf etdirilir. Bu gün iki ölkə arasındakı münasibətlər təkcə diplomatik səviyyədə deyil, eyni zamanda siyasi etimad, qarşılıqlı dəstək və qardaşlıq prinsipləri üzərində möhkəm şəkildə qurulub. Prezident İlham Əliyevin “Kazinform” agentliyinə müsahibəsində vurğuladığı kimi, Azərbaycan ilə Qazaxıstanın siyasi əlaqələri hazırda ən yüksək mərhələsinə çatıb. İki ölkə beynəlxalq təşkilatlar çərçivəsində bir-birinin mövqeyini dəstəkləyir, Türk Dövlətləri Təşkilatı (TDT), BMT, İslam Əməkdaşlıq Təşkilatı və Qoşulmama Hərəkatında ortaq maraqları müdafiə edir. Bu qarşılıqlı həmrəylik regionda sülhün, sabitliyin və dayanıqlı inkişafın təminatına çevrilib.

Xüsusilə Türk Dövlətləri Təşkilatı çərçivəsində əməkdaşlığımızın dərinləşməsi xalqlarımızı daha da yaxınlaşdırır. Bu birliyin formalaşmasında Azərbaycan və Qazaxıstan liderlərinin şəxsi dostluq münasibətləri və strateji baxışları mühüm rol oynayır. Hər iki dövlət türk dünyasının güclənməsi, enerji, nəqliyyat, kommunikasiya, humanitar və mədəni əlaqələrin genişlənməsi istiqamətində eyni hədəflərə xidmət edir. Bu gün Azərbaycan və Qazaxıstan arasında həyata keçirilən enerji və nəqliyyat layihələri – Xəzər dənizi vasitəsilə daşımaların genişləndirilməsi, Orta Dəhliz və Transxəzər nəqliyyat marşrutu kimi təşəbbüslər təkcə iki ölkənin deyil, bütün regionun iqtisadi inteqrasiyasına mühüm töhfə verir. Prezident İlham Əliyevin müsahibəsində qeyd etdiyi kimi, bu əməkdaşlıq təkcə iqtisadi deyil, həm də strateji təhlükəsizlik baxımından böyük əhəmiyyət daşıyır. Ən əsası isə, Azərbaycan ilə Qazaxıstan münasibətlərini fərqləndirən amil dostluq və etimaddır. Bu münasibətlər müvəqqəti maraqlara deyil, xalqlarımızın qardaşlıq bağlarına söykənir. Qazaxıstan daim Azərbaycanın ərazi bütövlüyünü və suverenliyini dəstəkləyib, postmüharibə dövründə azad edilmiş ərazilərin bərpasında da real töhfələr verib. Bu, qardaşlığın, qarşılıqlı hörmət və səmimiyyətin bariz nümunəsidir. Prezident İlham Əliyevin “Kazinform”a verdiyi müsahibə bir daha göstərdi ki, Azərbaycan-Qazaxıstan münasibətləri gələcəyə hesablanmış strateji tərəfdaşlıq modeli üzərində qurulub. Bu münasibətlərin əsas dayaqları – ortaq tarix, mədəni yaxınlıq, siyasi etimad və liderlərimizin uzaqgörən siyasətidir. Bu gün Azərbaycan ilə Qazaxıstan yalnız iki müstəqil dövlət kimi deyil, həm də türk dünyasının iki dayağı kimi çıxış edir. Bu birlik regionda sülhün, sabitliyin və inkişafın əsas təminatçısıdır. Prezident İlham Əliyevin müsahibəsində səsləndirdiyi fikirlər bu reallığı bir daha təsdiqlədi: Azərbaycan ilə Qazaxıstan arasındakı siyasi əlaqələr hazırda ən yüksək səviyyədədir və qarşılıqlı etimad üzərində möhkəm şəkildə dayanır.

Paylaş:

Baxılıb: 261 dəfə