Elmə və insanlığa həsr olunan ömür

Bakı:

11 °C

66 %

2 m/s

Əlaqə

AZ RU EN

Ana səhifə / Arxiv / Elmə və insanlığa həsr olunan ömür

Elmə və insanlığa həsr olunan ömür

14.04.2026 [11:17]

Hər il 15 aprel tarixində Azərbaycan xalqı görkəmli alim, akademik Zərifə Əliyevanın xatirəsini böyük hörmətlə yad edir. Onun həyat yolu yalnız bir alim kimi deyil, həm də yüksək mənəviyyata sahib bir insan kimi hər kəs üçün nümunədir.

Zərifə xanım gənc yaşlarından elmə böyük maraq göstərmiş və həyatını tibb sahəsinə həsr etmişdir. O, həkimlik peşəsini seçərək insanlara kömək etməyi özünə məqsəd qoymuşdu. Təhsilini uğurla başa vurduqdan sonra oftalmologiya sahəsində fəaliyyət göstərməyə başlamışdır.

Onun bilik və bacarığı qısa müddətdə diqqət çəkmiş, buna görə də o, Azərbaycan Dövlət Həkimləri Təkmilləşdirmə İnstitutunun göz xəstəlikləri kafedrasına dosent vəzifəsinə dəvət olunmuşdur. Burada o, həm həkim kimi çalışmış, həm də gənc mütəxəssislərin yetişməsində mühüm rol oynamışdır.

Zərifə Əliyevanın əsas xidmətlərindən biri göz xəstəliklərinin araşdırılması və onların qarşısının alınması istiqamətində gördüyü işlərdir. O, xüsusilə peşə ilə bağlı yaranan göz problemlərini dərindən öyrənmiş və bu sahədə yeni yanaşmalar irəli sürmüşdür.

Onun apardığı tədqiqatlar nəticəsində bir çox xəstəliklərin erkən mərhələdə aşkarlanması və müalicəsi mümkün olmuşdur. Yazdığı elmi əsərlər və yetişdirdiyi tələbələr bu gün də onun elmi irsinin yaşadığını göstərir.

Zərifə xanım yalnız alim kimi deyil, həm də ailəsinə bağlı, qayğıkeş bir insan kimi tanınırdı. O, ümummilli lider Heydər Əliyevin həyat yoldaşı olmuşdur. Bu ailə Azərbaycan üçün nümunəvi ailələrdən biri hesab olunur.

Ulu öndər Heydər Əliyev Zərifə xanım haqqında danışarkən onu yüksək insani keyfiyyətlərə malik bir şəxsiyyət kimi xarakterizə edirdi. O bildirirdi ki, Zərifə Əliyeva həm alim kimi, həm də insan kimi çox zəngin daxili aləmə sahib idi və ailəsində hər zaman sevgi və səmimiyyət mühiti yaradıb.

Azərbaycan Respublikasının Prezidenti İlham Əliyev də çıxışlarında anası haqqında böyük qürurla danışır. O vurğulayır ki, Zərifə Əliyeva öz həyatı ilə insanlara nümunə olub, elmə və xalqa sədaqətlə xidmət edib. Onun fikrincə, Zərifə xanımın irsi bu gün də yaşayır və gələcək nəsillər üçün örnəkdir.

Zərifə Əliyevanın həyatı sadəcə bir alim ömrü deyil, həm də insanlara xidmətin, zəhmətin və yüksək mənəviyyatın təcəssümüdür. Onun gördüyü işlər və qoyduğu irs Azərbaycan tibb elminin inkişafında mühüm yer tutur.

15 aprel – onun anım günü – bizə bir daha xatırladır ki, belə şəxsiyyətlər heç vaxt unudulmur və daim hörmətlə yad edilir.

Sahib Şükürov

YAP Göyçay rayon təşkilatının sədri

Paylaş:

Baxılıb: 55 dəfə