Si Cinpin: Çin enerji, yaşıl sənaye və rəqəmsal iqtisadiyyat sahələrində üç əsas əməkdaşlıq platforması yaradacaq

Bakı:

11 °C

93 %

3 m/s

AZ RU EN

Ana səhifə / Dünya / Si Cinpin: Çin enerji, yaşıl sənaye və rəqəmsal iqtisadiyyat sahələrində üç əsas əməkdaşlıq platforması yaradacaq

Si Cinpin: Çin enerji, yaşıl sənaye və rəqəmsal iqtisadiyyat sahələrində üç əsas əməkdaşlıq platforması yaradacaq

01.09.2025 [21:19]

Çin enerji, yaşıl sənaye və rəqəmsal iqtisadiyyat sahələrində üç əsas əməkdaşlıq platforması, həmçinin elmi və texnoloji innovasiyalar, ali və peşə təhsili sektorlarında üç mərkəz yaradacaq.

AZƏRTAC Sinxua agentliyinə istinadla xəbər verir ki, bu təşəbbüslərlə Şanxay Əməkdaşlıq Təşkilatı Dövlət Başçıları Şurasının 25-ci iclasında Çin Xalq Respublikasının (ÇXR) Sədri Si Cinpin çıxış edib. O qeyd edib ki, qarşıdakı beş il ərzində Çin 10 milyon kVt-dan çox yeni günəş və külək enerjisi layihələrində digər ölkələrlə əməkdaşlığa hazırdır.

Si Cinpinin sözlərinə görə, Çin Süni İntellekt üzrə Əməkdaşlıq Mərkəzinin yaradılmasında da bütün tərəflərlə əməkdaşlığa hazırdır. Bundan əlavə, Çinin Sədri bütün tərəflərin Beidou naviqasiya sistemindən geniş istifadə etməsini alqışlayıb və ölkələri Beynəlxalq Ay Tədqiqat Stansiyasının yaradılmasına qoşulmağa dəvət edib. O, həmçinin ŞƏT-ə üzv dövlətləri təşkilatın təsis missiyasına sadiq qalmağa, daha qətiyyətli və praktik tədbirlərlə onun sağlam və davamlı inkişafına kömək etməyə çağırıb. Çin liderinin fikrincə, təşkilata üzv dövlətlər fikir ayrılıqlarını bir kənara qoyaraq ortaq nöqtələr axtarmalı, qarşılıqlı fayda və “qazan-qazan” nəticələrini, açıqlıq və inklüzivliyi müdafiə etməli, ədalətli olmalı, real nəticələrə və yüksək səmərəliliyə can atmalıdır.

ÇXR Sədri əlavə edib: “ŞƏT-ə üzv dövlətlərin hamısı dost və tərəfdaşdır. Onlar fikir ayrılıqlarına hörmətlə yanaşmalı, strateji təmasları davam etdirməli, konsensus yaratmalı, həmrəylik və əməkdaşlığı inkişaf etdirməlidir. Eyni zamanda, bu dövlətlər öz bazarlarının güclü tərəflərindən və iqtisadi tamamlayıcılıqlarından istifadə etməli, ticarət və investisiyaların asanlaşdırılmasını təkmilləşdirməlidir.

ÇXR Sədri ən qısa zamanda ŞƏT İnkişaf Bankının yaradılmasının vacibliyini də vurğulayıb. ŞƏT-in real addımlarla daha yaxşı inkişafını təmin etmək üçün Si Cinpin bu il ərzində digər üzv dövlətlərə 2 milyard yuan (təxminən 281 milyon ABŞ dolları) qrant verəcəyini, qarşıdakı üç il ərzində isə təşkilatın Banklararası Konsorsiumuna üzv banklara əlavə 10 milyard yuan kredit ayıracağını bildirib.

Bundan əlavə, Çin ehtiyacı olan üzv dövlətlərdə 100 “kiçik və əlverişli” dolanışıq layihəsi həyata keçirməyi planlaşdırır. Növbəti beş il ərzində Çin həmin ölkələrdə 10 min insan resursu üçün təlim imkanları təqdim edəcək. Pekinin ŞƏT-ə üzv digər dövlətlərə investisiya fondu 84 milyard ABŞ dollarını, illik ikitərəfli ticarəti isə 500 milyard ABŞ dollarını ötüb.

Si Cinpin bildirib: “Çin öz inkişafını hər zaman ŞƏT-in inkişafı və üzv dövlətlərin xalqlarının daha yaxşı həyata can atması ilə əlaqələndirir”.

Paylaş:

Baxılıb: 392 dəfə