Bu gün Bakıda bədii gimnastika üzrə 25-ci Avropa Çempionatı start götürəcək

Bakı:

13 °C

94 %

6 m/s

Əlaqə

AZ RU EN

Ana səhifə / İdman / Bu gün Bakıda bədii gimnastika üzrə 25-ci Avropa Çempionatı start götürəcək

Bu gün Bakıda bədii gimnastika üzrə 25-ci Avropa Çempionatı start götürəcək

15.05.2009 [14:04]

Bu gün Bakıda start götürəcək bədii gimnastika üzrə 25-ci Avropa çempionatı ilə əlaqədar dünən mətbuat konfransı keçirilib. Lent.az-ın məlumatına görə, tədbirdə çıxış edən Avropa Gimnastika İttifaqının (UEG) prezidenti Dmitrios Dimitropulos yarışa hazırlıq işlərinin yüksək səviyyədə aparıldığını bildirib. O, Azərbaycanın idmanın bədii gimnastika növündə qısa müddətdə dünyada aparıcı ölkələr sırasında yer almağa müvəffəq olduğunu bildirib: “5-6 il öncə Azərbaycanda kimi güclü gimnast adlandırmaq olardı? Heç kimi. Azərbaycan Gimnastika Federasiyasının yeni rəhbərliyi sayəsində qısa müddətdə ən güclü ölkələr sırasına daxil olmağı bacarmısınız. Son illər ölkənizdə bədii gimnastika növündə sıçrayışlı inkişaf baş verib. Avropa Gimnastika İttifaqının prezidenti kimi Azərbaycanı ən güclülər sırasında görmək mənim üçün çox xoş bir duyğudur. Buna görə federasiyanızın prezidenti Mehriban xanım Əliyevaya böyük təşəkkür edirəm. Azərbaycanın artıq dünya ölkələri arasında ilk 5-likdə olması sensasiyadır, böyük uğurdur. İndi siz gimnastlarınızın qızıl, gümüş və bürünc medallar uğrunda mübarizəsindən danışırsınız. Artıq böyük təcrübəyə malik Almaniya, İsveçrə və İspaniya kimi ölkələr sizinlə mübarizə aparır, sizin gimnastlarınızın səviyyəsinə çatmaq haqda düşünürlər”.
UEG-in bədii gimnastika üzrə Texniki Komitəsinin rəhbəri Hayde Bruneder də təşkilati məsələlərdən razılığını ifadə edib. O, Azərbaycanın digər ölkələrlə müqayisədə qonaqpərvərliyi və səmimiliyi ilə daha çox diqqət çəkdiyini vurğulayıb.
Azərbaycan Gimnastika Federasiyasının (AGF) vitse-prezidenti Altay Həsənov bədii gimnastlarımızın Avropa çempionatına hazır olduqlarını bildirib. O, yeganə problemin gimnastlarımızın psixoloji hazırlıqları ilə bağlı ola biləcəyini söyləyib: “İki il öncə Bakıda keçirilmiş Avropa çempionatında gimnastımız Aliyə Qarayeva qızıl medal qazanmışdı. Bu səbəbdən, o, psixoloji təzyiqlə üzləşə bilər. Amma idmançılarımız yarışa yüksək səviyyədə hazırlaşıblar. Ona görə də bu maneəni aradan qaldırmağa müvəffəq olacağımızı düşünürəm”.
AGF-nin baş katibi Fərid Qayıbov isə təşkilati işlərdən danışıb. Onun sözlərinə görə, Bakı şəhəri bədii gimnastika üzrə 25-ci Avropa çempionatına tam hazırdır.
Milli komandamızın baş məşqçisi Marina Vasilyeva bədii gimnastlarımızın yüksək nəticələr göstərəcəklərinə ümidvar olduğunu vurğulayıb. O, milli komandamızın üzvləri - Aliyə Qarayeva ilə yanaşı, Anna Qurbanovanın da dünyada lider gimnastlardan olduğunu söyləyib: “Bilirik ki, Avropa çempionatında böyük ənənələrə malik Rusiya, Ukrayna, Belarus kimi ölkələrin gimnastları çıxış edəcəklər. Amma biz də yaxşı hazırlıq keçmişik. 7 aydır ki, müntəzəm və plana uyğun hazırlıq prosesi keçirik. A.Qarayeva iki il öncə Avropa çempionu olub. Anna Qurbanova da onun kimi, dünyanın lider gimnastlarındandır. Onlarla yanaşı, Zeynəb Cavadlıya ümidlərimiz böyükdür”.
Qeyd edək ki, 3 gün davam edəcək Avropa çempionatı Heydər Əliyev adına İdman-Konsert Kompleksində təşkil olunacaq. Nüfuzlu yarışa 32 ölkənin 186 bədii gimnastı qatılacaq. Fərdi proqramda 31 ölkədən 75 idmançı, yeniyetmələrin qrup hərəkətləri üzrə komanda mübarizəsində isə 17 kollektiv 6 dəst medalın müqəddəratını həll edəcək.
Fərdi proqramda ölkəmizi Aliyə Qarayeva, Anna Qurbanova və Zeynəb Cavadlı, qrup komandalarının mübarizəsində isə Səbinə Abbasova, Nigar Əbdülsəlimova, Yevgeniya Jidkova, Aelita Xələfova, Kamilə Məmmədova və Lalə Məhərrəmova təmsil edəcəklər.

Paylaş:

Baxılıb: 1516 dəfə