Sərt cərimələr tətbiq olunacaq

Bakı:

29 °C

56 %

3 m/s

Əlaqə

AZ RU EN

Ana səhifə / İqtisadiyyat / Sərt cərimələr tətbiq olunacaq

Sərt cərimələr tətbiq olunacaq

14.06.2023 [10:32]

Taksi xidmətinin keyfiyyəti yüksələcəkmi?

İnzibati Xətalar Məcəlləsinə təklif olunan dəyişikliklərdə ölkədə taksi sifarişi operatorları tərəfindən nəqliyyat sahəsində qanunvericiliyin pozulmasına görə yeni cərimələr tətbiq edilməsi nəzərdə tutulur. Bunlar Milli Məclisin İqtisadi siyasət, sənaye və sahibkarlıq komitəsinin iclasında müzakirəyə çıxarılan İnzibati Xətalar Məcəlləsinə təklif edilən dəyişiklikdə əksini tapıb.

Cərimələrin artırılmasını şərtləndirən amillər

Milli Məclisin İqtisadi siyasət, sənaye və sahibkarlıq komitəsinin iclasında müzakirəyə çıxarılan İnzibati Xətalar Məcəlləsinə təklif edilən dəyişiklikdə qanunvericiliyin tələblərini pozan taksi operatorlarına münasibətdə cəzaların sərtləşdir?lməsinin nəzərdə tutulması heç də təsadüfi deyil. Bu sahədə çoxsaylı nöqsanların olduğunu deyə bilərik ki, bütün bunlar da daha sərt cəza tədbirlərinin görülməsi zərurəti yaradır. Hazırda ölkəmizin taksi bazarının 5 xarici şirkətin (“Uber”, “Bolt”, “Yango”, “Maxim”, “Uklon Umico”) inhisarında olduğunu deyə bilərik. Həmin şirkətlər milli qanunvericiliyin tələblərinə məhəl qoymayaraq taksi bazarında qeyri-sağlam rəqabət mühiti formalaşdırıblar. Bununla da bazara yerli şirkətlərin daxil olmasına ciddi maneələr yaranıb.

Hazırda qiymətlərin aşağı olması taksi bazarında müşahidə edilən yeganə müsbət cəhətdir. Əslində isə bu sahədə bir xaos yaşanır. Qiymətlərin aşağı olması belə müştəri məmnunluğu yaratmır. Taksi xidmətindən həm dövlət qurumları, həm sərnişinlər, həm də sürücülər narazılıq edirlər. O cümlədən dövlət qurumları qanunvericiliyin tələblərinin gözlənilmədiyini bildirirlər və operator şirkətləri qaydalar çərçivəsində fəaliyyət göstərməyə çağırırlar. Sərnişinlər avtomobillərin köhnə, nasaz olmasından, xidmətin aşağı keyfiyyətindən, nağdsız ödəmə imkanları yaradılmamasından, bir sıra hallarda şərtlərin pozulmasından narazılıq edirlər. Sürücülərdə etirazlar yaradan əsas məsələ isə operatorların aldıqları komissiyanın yüksək olmasıdır. Həmin komissiya müştəriyə bəyan olunan ümumi gediş haqqının15-20 faizinə çatır. Halbuki əksər ölkələrdə komissiya məbləği ümumi gediş haqqının 10 faizindən yuxarı olmur. Belə qənaət hasil olur ki, biznes fəaliyyəti üçün ölkəmizi seçən operatorlar burada taksi fəaliyyətindən daha çox sürücülərin istismar edilməsi ilə məşğul olurlar.

Xarici şirkətlərin taksi bazarında fəaliyyətində narahatlıq yaradan ən mühüm amillərdən biri respublikamız və Azərbaycan vətəndaşları barədə məlumatların ölkə hüdudlarından kənara sızdırılması ehtimalı ilə bağlıdır. Mütəxəssislərin qənaətinə görə, bir sıra anti-Azərbaycan dairələr belə məlumatları əldə etmək üçün müxtəlif vasitələrə əl atırlar. Bununla bağlı çoxsaylı faktlar da aşkarlanıb. Anti-Azərbaycan dairələrin xarici taksi şirkətləri ilə müəyyən işbirliyinə qoşulması riskləri kifayət qədər böyükdür. Mövcud qanunvericiliyin pozulması buna imkan yaradır.

Bununla bağlı narahatlıq bir qədər bundan əvvəl Rəqəmsal İnkişaf və Nəqliyyat Nazirliyində Azərbaycanda fəaliyyət göstərən taksi şirkətlərinin nümayəndələri ilə keçirilən görüşdə də ifadə olunub. Bəhs olunan görüşdə xüsusi olaraq vurğulanıb ki, əksər şirkətlərin məlumat bazası xarici ölkələrdə yerləşir və bu da “Fərdi məlumatlar haqqında” Qanuna ziddir. Qanuna əsasən, ölkəmizdə fərdi məlumatların informasiya sistemləri dövlət qeydiyyatından keçməlidir. Yalnız bundan sonra fərdi məlumatların toplanılmasına və işlənilməsinə icazə verilir. Ayrı-ayrı operator şirkətlərin qanunvericiliyin tələblərindən yayınmaları milli maraqlarımıza təhdidlər yaradır və bunun qarşısı mütləq alınmalıdır.

Sərt cərimələr hansı hallarda tətbiq olunacaq?

İnzibati Xətalar Məcəlləsinə təklif olunan yeni maddəyə əsasən, sərt cərimələr “Avtomobil nəqliyyatı haqqında” qanunla müəyyən edilmiş tələblərin pozulması hallarında tətbiq olunacaq. Belə ki,

-“Fərdi məlumatlar haqqında” Azərbaycan Respublikasının Qanununa uyğun olaraq, fərdi məlumatların informasiya sistemlərinin dövlət qeydiyyatından keçirilməməsinə və fərdi məlumatların mühafizəsi ilə bağlı tələblərə riayət olunmamasına;

- hər bir taksi sifarişi üzrə siyahısı müvafiq icra hakimiyyəti orqanının müəyyən etdiyi orqan (qurum) tərəfindən təsdiq edilən məlumatların, o cümlədən sürücünün iş və istirahət rejimlərinə riayət olunmasına nəzarət məqsədi ilə sürücü barədə məlumatların müvafiq icra hakimiyyəti orqanının müəyyən etdiyi orqanın (qurumun) informasiya sisteminə real vaxt rejimində ötürülməsinin təmin edilməməsinə;

-“Avtomobil nəqliyyatı haqqında” Azərbaycan Respublikasının Qanununa uyğun olaraq avtomobil nəqliyyatı ilə sərnişin və yük daşımalarına icazənin verilməsi üçün tələb olunan sənədlərin daşıyıcılarda olmasına nəzarət edilməməsinə,

- icazəsi olmayan daşıyıcıya taksi sifarişi xidmətinin göstərilməsinə görə vəzifəli şəxslər on min beş yüz manat məbləğində, hüquqi şəxslər iyirmi min manat məbləğində cərimə ediləcək.

Eyni zamanda, layihəyə əsasən, icazə olmadan taksi sifarişi operatoru kimi fəaliyyət göstərilməsinə görə vəzifəli şəxslər iyirmi min manat məbləğində, hüquqi şəxslər qırx min manat məbləğində cərimə ediləcək. Bu Qanun qəbul ediləcəyi təqdirdə 2023-cü il oktyabrın 1-dən qüvvəyə minəcək.

Mübariz FEYİZLİ

Paylaş:

Baxılıb: 704 dəfə