Siyavuş Novruzov: Biz artıq namizədimizi müəyyən etmişik. Namizədimiz bəllidir

Bakı:

23 °C

60 %

1 m/s

Əlaqə

AZ RU EN

Ana səhifə / Müsahibə / Siyavuş Novruzov: Biz artıq namizədimizi müəyyən etmişik. Namizədimiz bəllidir

Siyavuş Novruzov: Biz artıq namizədimizi müəyyən etmişik. Namizədimiz bəllidir

07.02.2012 [12:34]

Bizim hər yerdə güclü yerli strukturlarımız və geniş seçki texnologiyalarına malik seçki qruplarımız var
Yeni Azərbaycan Partiyasının (YAP) İcra katibinin müavini, millət vəkili Siyavuş Novruzovun “www.modern.az” saytına müsahibəsini təqdim edirik:
- Siyasi oppenentləriniz artıq 2013-cü ilin prezident seçkilərinə hazırlığa start veriblər. Müxtəlif siyasi bloklar yaranır, mesajlar ötürülür, namizədlər barədə müzakirə açılır. Məsələn, eks-spiker Rəsul Quliyev artıq prezidentliyə namizəd olacağını elan edib, müsavatçılar qurultayda İsa Qəmbərin namizədliyini irəli sürməyə hazırlaşırlar. Yeni Azərbaycan Partiyası özünün namizədi barədə müzakirələrə başlayıbmı?
- Əlbəttə müzakirələr gedir. Altı ay əvvəl partiyanın Sədr müavini - İcra katibi Əli Əhmədov bildirdi ki, YAP 2013-cü il üçün partiyanı Sədri, Prezident İlham Əliyevin namizədliyini irəli sürür. Bizim hər yerdə güclü yerli strukturlarımız və geniş seçki texnologiyalarına malik seçki qruplarımız var. Biz artıq namizədimizi müəyyən etmişik. Namizədimiz bəllidir. Müxalifətə gəlincə, onlar hələ indiyə qədər namizəd müəyyən edə bilmirlər. Heç edə də bilməyəcəklər. Elə son parlament seçkilərini götürün. Marafona start verilməsinə baxmayaraq, müxalifət liderləri hələ hansı dairədən öz namizədliklərini verəcəklərini müəyyənləşdirə bilməmişdilər. Elə hardan gəldi namizədliklərini irəli sürmək o demək deyil ki, o elə uğur qazanacaq.
- Bəzən belə xəbərlər yayılır ki, hakimiyyət daxilində YAP-ın namizədilə bağlı birmənalı fikir yoxdur...
- Bu söhbətlərin heç bir əsası yoxdur. Hakimiyyət birdir, qərar da birdir. Vəssalam. Guya hansısa fərqli mövqeyin olması barədə yazılanlara gəlincə, bu hansısa qəzetlərin reytinq xətrinə yazdığı yazılardı. Elə bir məsələ yoxdur. Bunların hamısı yalan və böhtandır.
- Bəs bütün bu kimi xəbərlər sizcə nədən qaynaqlanır?
- Bu əsasən xarici kəşfiyyat orqanlarının ortaya atdığı terminlərdir. Onlar bu terminləri müəyyən müxalifət nümayəndələri və qəzetlərin vasitəsi ilə irəli sürürlər.
- Müxalifətlə iqtidar arasında siyasi münasibətləri normal sayırsınızmı?
- Dünyanın hər yerində iqtidarla müxalifət arasında mübarizə gedir və bu təbiidir. Müxalifət hakimiyyətə gəlmək istəyir, iqtidar isə hakimiyyətdə qalmaq. Burada dostluq, qardaşlıq münasibətlərindən söhbət gedə bilməz. İqtidar və müxalifət siyasi rəqiblərdir. Əgər eyni partiyada, məsələn Müsavatda başqan olmaq üçün müxtəlif qüvvələr arasında hansı gərgin mübarizə getdiyini nəzərə alsaq, o zaman düşünmək olar ki, onlarla bizim aramızda hansı münasibət var.
- Hakimiyyətin monolitliyi barədə sualı təsadüfən vermədik. çünki eks-spiker Rəsul Quliyevin əsas tezislərindən biri də iqtidar daxilində hansısa qüvvələrin ona dəstək verəcəyi ilə bağlı şərhlər və məlumatlardır. Sizcə burada hər hansı bir həqiqət payı varmı?
- Qətiyyətlə deyirəm ki, belə bir məsələ yoxdur. Rəsul Quliyev 1996-cı ildən artıq Azərbaycanda yoxdur. O, ölkədəki real ictimai-siyasi vəziyyəti lazımınca nə qiymətləndirə bilir, nə də onun Azərbaycanda bir tərəfdarı var. Heç bir siyasi qüvvə arasında onun dəstəyi yoxdur. Bu onun bir neçə mənasız bəyanatından başqa bir şey deyil. Rəsul Quliyev 2005-ci ildə də eyni sözləri deyirdi və hətta təyyarəyə minib gələcəyini vəd etmişdi. O zaman nəticəsi nə oldusa, indi ondan da betər olacaq.
- YAP gələnilki seçkilərə özünün hansı yeni baxışları ilə getməyə hazırlaşır?
- Seçkilərə 2 ilə yaxın müddət qalır. Amma biz bu istiqamtdə işləyirik. YAP-ın bir nömrəli funksiyası seçicilərlə işləməkdir. Biz mütəmadi olaraq bununla məşğuluq oluruq. Qeyd edim ki, YAP-ın artıq kompüterdə seçici bazası var. Azərbaycanda olan seçicilərin 90 faizinin bütün məlumatları bizim kompüter bazasında yerləşdirilib. Bu bazanın üzərində biz daim iş aparırıq. İdeyasını dəyişən varsa, o avtomatik olaraq baza sistemdən çıxarılır, hərbi xidmətdən qayıdanlar avtomatik olaraq daxil edilir. Biz ilboyu işləyirik. Yeni texnologiyalar əsasında biz bu sistemi qurmuşuq.
- Yəqin seçicilərinizin yaşadığı ərazilərdəki problemlərdən də xəbərdarsınız?
- Təbii.. Biz ərazinin öyrənilməsi praktikasından istifadə edirik. Nümayəndələrimiz tərəfindən seçicilərin problemləri mütəmadi öyrənilir. Hər məntəqəyə YAP-ın 3 fəalı təhkim olunub. Onlar problemləri toplayır. Bu problemlərdən eləsi var ki, rayon miqyasındadır, eləsi var ki respublika... Həlli mümkün olan problem dərhal həllini tapır.
- Hakimiyyətin idarəetmə sistemində qəribə bir amil diqqəti çəkir. Artıq 90-cı illərdə olduğu kimi, bütün problemlərin səbəbkarı və məsuliyyəti birbaşa Prezidentin üzərinə qoyulmur. İqtidar ayrı-ayrı məmurların nöqsanlarına, özbaşınalığına və ya səriştəsizliyinə məsuliyyəti birbaşa cavabdeh olaraq həmin məmur üzərində qoyur. Buna münasibətiniz?
- Tamamilə doğru qeyd edirsiniz. Sahəyə məmur rəhbərlik edir. Hər məsələyə görə dövlət başçısını günahkar bilmək və müraciət etmək düzgün yanaşma deyil. Birinin suyu gəlmirsə, toyuğu itirsə, buna görə Prezident cavabdehlik daşımır, o sahəyə təhkim edilmiş məmur cavabdehlik daşıyır. O baxımdan həmin məmurlar rəhbərlik etdikləri işlərə cavabdehlik daşıyırlar. Əgər o sahədə böyük problemlər varsa, dəyişiklik edilir, icra başçısı və ya aidiyyatlı strukturun rəhbəri dəyişdirilir.
- Siz parlamentin iclaslarında məmur özbaşınalığı və bürokrtatiyası ilə bağlı çıxış edirsiniz. YAP belə məmurlarla bağlı müzakirələr aparırımı?
- YAP-ın İdarə Heyətində belə məsələlər mütəmadi müzakirə olunur. Əgər hardasa ciddi problemlər varsa, partiyanın Sədrinə bu barədə məlumat çatdırılır.

Paylaş:

Baxılıb: 1328 dəfə