"Xocalı Soyqırımını Tanıtma" İctimai Birliyi müraciət ünvanlayıb

Bakı:

25 °C

57 %

5 m/s

Əlaqə

AZ RU EN

Ana səhifə / Siyasət / "Xocalı Soyqırımını Tanıtma" İctimai Birliyi müraciət ünvanlayıb

"Xocalı Soyqırımını Tanıtma" İctimai Birliyi müraciət ünvanlayıb

23.12.2009 [09:19]

“Azərbaycan ictimaiyyəti Dağlıq Qarabağa ayrılmış 8 milyon dollar məbləğində maliyyə yardımını nəzərdə tutan qararın ABŞ prezidenti tərəfindən imzalanmayacağına əmin olmaq istəyir”
Azərbaycan Respublikası “Xocalı Soyqırımını Tanıtma” İctimai Birliyinin İdarə Heyəti ABŞ Konqresinin Dağlıq Qarabağ separatçılarına maliyyə yardımı ayrılması barədə qəbul etdiyi qərara etiraz olaraq, ABŞ-ın Azərbaycandakı səfirliyinə, Amerika Birləşmiş Ştatlarının prezidenti cənab Barak Obamaya, ABŞ Dövlət Departamentinə, ABŞ Konqresinə müraciət ünvanlayıb: “Möhtərəm cənab Prezident! ABŞ Nümayəndələr Palatasının və Senatın Dağlıq Qarabağın separatçı erməni rejiminə 8 milyon dollar ayırması xəbərini hədsiz təəssüf və kədər hissilə qarşıladıq. özünü demokratiyanın və insan hüquqlarının müdafiəçisi kimi tanıdan ABŞ-ın bu kobud səhvi yaxın gələcəkdə ona çox baha başa gələcək. Nəzərinizə çatdırırıq ki, 1988-1994-cü illərdə Ermənistanın Azərbaycana qarşı hərbi təcavüzü nəticəsində 20 faizdən çox ərazimiz işğal olunub, bir miyondan artıq müsəlman-türk soydaşımız ev-eşiyindən didərgin düşüb, maddi-mədəniyyət abidələrimiz-məscidlər dağıdılıb. 1992-ci il fevralın 26-da baş vermiş Xocalı soyqırımı Sonqmi, Xatın faciələri ilə müqayisə oluna bilər. Xocalı soyqırımının törədilməsində Ermənistanın indiki hakimiyyəti yaxından iştirak edib. Ermənistan-Azərbaycan, Dağlıq Qarabağ münaqişəsinin Azərbaycanın ərazi bütövlüyü çərçivəsində həlli üçün səy göstərməli olan ABŞ-ın növbəti dəfə Dağlıq Qarabağa maliyyyə yardımı ayırması başa düşülən deyil. Son 17 ildə ABŞ Dağlıq Qarabağdakı qondarma rejimə 200 milyon dollardan artıq yardım ayırıb. Məlumdur ki, bu yardımlar təyinatı üzrə-humanitar məqsədlər üçün xərclənməyib. ABŞ hökümətinin Ermənistana 2 milyard dollardan artıq yardım ayırması, Cənubi Qafqazda Azərbaycan kimi əhəmiyyətli bir strateji müttəfiqlə münasibətlərin pozulmasına gətirib çıxaracaq. ATƏT-in Minsk qrupunun həmsədri kimi ABŞ-ın növbəti “şıltaqlığı” Azərbaycan ictimaiyyəti tərəfindən narahatlıqla qarşılanmışdır. Yəqin ki, Siz mənşəcə şotland olan, ABŞ-ın Arkanzas ştatında vəkil işləmiş mərhum Samyuel A.Uimzin “Ermənistan-terrorçu xristian ölkənin gizlinləri” kitabını oxumamısınız. O, öz əsərində belə yazıb: “Azərbaycan dövləti erməni hücumlarından yaxa qurtarandan sonra özünü erməni terrorçularından qorumağa başladı. Konqres Azərbaycanı cəzalandırmaqla buna reaksiya verdi. Birləşmiş Ştatların lobbiləşmiş Konqresindəki erməni lobbisi Azərbaycana yardımın müxtəlif növlərini qadağan edən qanunlar qəbul etdi. Azərbaycana nöqsan tutulurdu ki, guya o, Ermənistanı blokadada saxlayır, göndərilən hərbi avadanlığın Ermənistana çatmasına mane olur. 1992-ci ildə Konqres Azadlığı Müdafiə Aktını qəbul edərək, onun 907-ci maddəsi ilə Ermənistanı “qeyri-qanuni” blokadaya almasını aradan qaldırana qədər Azərbaycanı xarici yardımın müxtəlif növlərindən məhrum etdi. özlərini erməni adlandıran balaca, lakin, hay-küyçü qrupun siyasi təzyiqinə əsasən hərəkət etmək Konqresə başucalığı gətirmir. Erməni faktlarını yoxlamağın vaxtı çoxdan çatmışdır”.
Cənab Barak Obama!
Biz, bu kitabı oxumağı Sizə məsləhət görürük. Ən azından ona görə ki, bu kitabı ABŞ qanunvericiliyinin keşiyində dayanan, müsəlman təəssübkeşliyindən uzaq olan bitərəf və işinin peşəkarı olan Samyuel A.Uimz qələmə alıb. Bu kitab çap olunan ərəfədə o, müəmmalı şəkildə qətlə yetirilib. Sizi əmin edirəm ki, bu qətldə də “erməni barmağının olması şübhəsizdir.
2009-cu ildə ABŞ-ın Florida ştatının Tamp şəhərində Xocalı Assosiasiyası yaradılıb. Bu təşkilatı yaradan milliyyətcə gürcü olan Feliks Sersvadzedir. Onun babası ötən əsrin əvvəllərində Azərbaycanda yaşayıb. O, Azərbaycan xalqının humanistliyinin dəfələrlə şahidi olub. Erməni daşnakları tərəfindən Xocalı soyqırımının törədildiyini eşidən cənab Feliks Sersvadze şəhidlərin ruhuna və ABŞ qanunvericiliyinə hörmət əlaməti olaraq Xocalı Assosiasiyasını qeydiyyatdan keçirməyə səy göstərir. Xahiş edirik ki, bu təşkilatın normal fəaliyyət göstərməsi üçün köməklik göstərəsiniz.
Azərbaycan ictimaiyyəti Dağlıq Qarabağa ayrılmış 8 milyon dollar məbləğində maliyyə yardımını nəzərdə tutan qərarın ABŞ prezidenti tərəfindən imzalanmayacağına əmin olmaq istəyir. İnanırıq ki, Siz və ABŞ höküməti Dağlıq Qarabağ münaqişəsinin tezliklə və sülh yoluyla həlli, 17 ildir ki, öz yurdlarından qaçqın düşmüş, hüquqları pozulmuş Azərbaycan vətəndaşlarının Qarabağa qayıtmaları üçün öz pozitiv səy və fəaliyyətinizi daha da artıracaqsınız”.

Paylaş:

Baxılıb: 1258 dəfə