Prezident İlham Əliyev: Hamı bilməlidir ki, şəhər nəqliyyatı həm insanların rahatlığıdır, həm bizim sağlamlığımızdır, həm də havanın təmiz olmasıdır

Bakı:

17 °C

88 %

2 m/s

AZ RU EN

Ana səhifə / Siyasət / Prezident İlham Əliyev: Hamı bilməlidir ki, şəhər nəqliyyatı həm insanların rahatlığıdır, həm bizim sağlamlığımızdır, həm də havanın təmiz olmasıdır

Prezident İlham Əliyev: Hamı bilməlidir ki, şəhər nəqliyyatı həm insanların rahatlığıdır, həm bizim sağlamlığımızdır, həm də havanın təmiz olmasıdır

20.02.2020 [08:59]

Paytaxtda nəqliyyatın fəaliyyətinin təkmilləşdirilməsi məqsədilə parkinq imkanlarının artırılması, tıxacların aradan qaldırılması, xətlərə ekoloji cəhətdən təmiz işləyən avtobusların buraxılması, təhlükəsizliyin təmin olunması qarşıya mühüm hədəflər kimi qoyulub
İndiki dövrdə dünyanın əksər iri şəhərlərində ictimai nəqliyyatla bağlı məsələlərin aktuallığı əhəmiyyətli dərəcədə artıb. Deyilənlər baxımından müstəqil Azərbaycanın paytaxtı Bakı şəhəri də istisna təşkil etmir. Bu gün Bakı respublikamızın dinamik inkişafını özündə dolğun şəkildə əks etdirir - şəhərimiz böyüyür, burada əhali artır, avtomobillərin, istehsal və xidmət müəssisələrinin sayı getdikcə çoxalır. Bütün bu və ya digər amillər isə öz növbəsində paytaxtımızda yol-nəqliyyat infrastrukturunun adekvat şəkildə yenilənməsini tələb edir. Qeyd etmək yerinə düşər ki, son illərdə bu istiqamətdə paytaxtımızda məqsədyönlü tədbirlər həyata keçirilib və nəticədə Bakıda şəhər nəqliyyatının fəaliyyəti əhəmiyyətli dərəcədə yaxşılaşıb. Bununla belə, görüləsi işlər də çoxdur. Yeri gəlmişkən, Prezident İlham Əliyev elə bu günlərdə Bakı Nəqliyyat Agentliyinin İdarə Heyətinin sədri Vüsal Kərimlini qəbul edib. Paytaxtımızda yol-nəqliyyat sahəsində reallaşdırılan yeni layihələrdən məmnunluğunu bildirən dövlətimizin başçısı vurğulayıb ki, son illər ərzində Bakı şəhərində görülmüş işlər kompleks xarakterlidir və bu işlər nəqliyyatla bağlı bütün sahələri əhatə edir.
Bəhs olunan qəbulda paytaxtda nəqliyyatın fəaliyyətinin təkmilləşdirilməsi məqsədilə parkinq imkanlarının artırılması, tıxacların aradan qaldırılması, xətlərə ekoloji cəhətdən təmiz işləyən avtobusların buraxılması, təhlükəsizliyin təmin olunması və bu kimi digər məsələlər qarşıya mühüm hədəflər kimi qoyulub. Paytaxtımızda ictimai nəqliyyatın önəminə diqqət çəkən dövlətimizin başçısı “Hamı bilməlidir ki, şəhər nəqliyyatı həm insanların rahatlığıdır, həm bizim sağlamlığımızdır, həm də havanın təmiz olmasıdır”, - deyə vurğulayıb.
Avtobus parkının 40 faiz yenilənməsi paytaxtda sərnişindaşımanın keyfiyyətinə müsbət təsir göstərib
Paytaxtımızda ictimai nəqliyyatın fəaliyyətinin yüksək səviyyədə qurulmasını təmin etmək məqsədilə görülən tədbirlər sırasında avtobus parkının müasirləşdirilməsinin önəmini ayrıca qeyd etmək lazımdır. Azərbaycan müasir dövlət kimi inkişaf edir, müxtəlif sahələrdə ən yüksək standartların tətbiqinə geniş meydan verir. Hədəf belə müəyyənləşdirilib ki, paytaxtımızın ictimai nəqliyyatı da ökəmizin daim yenilənən müasir simasına uyğun gəlməlidir. Qeyd edək ki, son beş ildə Bakıya gətirilən avtobusların əksəriyyəti dünyanın aparıcı şirkətlərinin məhsullarıdır. Avtobusların yüksək kriteriyalar əsasında seçilərək Bakıya gətirildiyinə diqqət çəkən Prezident İlham Əliyev deyib: “Onu da bildirməliyəm ki, beş il bundan əvvəl Bakıya gətirilmiş ilk xarici istehsal olan avtobuslar, hətta o avtobusların istehsal olunduğu ölkələrdə hələ xətlərə çıxmamışdı. Yəni, ən müasir avtobuslar gətirilir. Əlbəttə ki, bu, şəhər nəqliyyatının böyük dərəcədə yaxşılaşdırılması istiqamətində çox önəmli addımdır. Mənim göstərişimlə hər il dövlət büdcəsindən kifayət qədər böyük vəsait ayrılır və hər il orta hesabla 300 avtobus Bakı Nəqliyyat Agentliyinin xətti ilə şəhərimizə gətirilir. Beləliklə, biz avtobus parkını tədricən müasirləşdiririk”.
Bütövlükdə, son beş ildə paytaxtımızda 855 avtobus yenilənib. Bunlardan 600-ü dövlət başçısının tapşırığı əsasında xarici ölkələrdən gətirilib. O cümlədən şəhərdə sərnişindaşıma xidməti göstərən şirkətlər tərəfindən 295 müasir avtobus alınaraq xətlərə buraxılıb. Yaxın üç ildə isə avtobus parkının yenilənməsini 100 faizə çatdırmaq nəzərdə tutulub.
Öz növbəsində avtobus parkının 40 faiz yenilənməsi paytaxtda sərnişindaşımanın keyfiyyətinə müsbət təsir göstərib. Bəhs olunan qəbulda da bildirildiyi kimi, 2019-cu ildə Bakı şəhərində fəaliyyət göstərən 2200 avtobusla 801 milyon sərnişin daşınıb. İctimai nəqliyyatdan istifadə edən sərnişinlərin sayının artması paytaxt sakinlərinin və şəhərimizin qonaqlarının ictimai nəqliyyata inamını ifadə edir.
Xətlərə buraxılan avtobuslar yüksək ekoloji tələblərə cavab verir
Paytaxtımızda avtobus parkının yenilənməsindən söhbət açarkən vacib bir məqamı da xüsusi olaraq vurğulamaq lazımdır. Söhbət xətlərə buraxılan avtobusların yüksək ekoloji tələblərə cavab verməsindən gedir. Məlumdur ki, respublikamızda dünya miqyasında meydana çıxan yeni çağırışlara uyğun olaraq “yaşıl iqtisadiyyat” quruculuğuna böyük önəm verilir. Bu strateji xəttə uyğun olaraq Bakı Nəqliyyat Agentliyinin və özəl şirkətlərin qarşısına ekoloji məsələlərlə bağlı ciddi tələblər qoyulub. Tələb ondan ibarətdir ki, Bakıya gətirilən avtobuslar ekoloji baxımdan da müasir standartlara yüksək səviyyədə cavab verməlidir. Çünki benzinlə və dizel yanacağı ilə işləyən avtobuslar şəhərdə orta sürətlə hərəkət etdiyi üçün ətraf mühitə daha çox ziyan vurur.
Bəhs olunan qəbulda Bakı Nəqliyyat Agentliyinin İdarə Heyətinin sədri Vüsal Kərimli dövlətimizin başçısına məlumat verərək deyib ki, Bakıya gətirilən yeni avtobuslar ətraf mühitə daha az zərər verən sıxılmış təbii qazla (STQ) işləyir. Müqayisə üçün bildirək ki, dünyanın bir sıra böyük şəhərlərində STQ ilə az sayda avtobus işləyir. Məsələn, Vyanada STQ ilə işləyən avtobuslar, ümumiyyətlə, yoxdur. Berlində bu istiqamətdə pilot layihənin tətbiqinə başlanılıb. Moskvada 6475 avtobusdan 319-u, İstanbulda 3070 avtobusdan 239-u STQ ilə işləyir. Bakıda isə 2200 avtobusdan 600-ü artıq STQ ilə fəaliyyət göstərir. Prezident İlham Əliyev ölkəmizə ekoloji cəhətdən təmiz işləyən avtobusların gətirilməsini müsbət hal kimi dəyərləndirib. “Əlbəttə, növbəti illərdə avtobus parkının təzələnməsi istiqamətində əlavə tədbirlər görüləcək və eyni zamanda, şadam ki, hazırda ölkəmizə gətirilən yeni avtobuslar ekoloji cəhətdən çox təmizdir. Çünki sirr deyil ki, havanı ən çox çirkləndirən nəqliyyat vasitələridir. Sənaye müəssisələri, ticarət obyektləri deyil, - bunun statistikası var, - nəqliyyat vasitələridir. Ona görə həm iki ildən sonra Azərbaycanda istehsal olunacaq “Avro-5” markalı benzinin bazara daxil olması bu sahədə çox böyük irəliləyişə səbəb olacaq, eyni zamanda, sıxılmış qazla və elektrik enerjisi ilə işləyən avtobusların ölkəmizə gətirilməsi, bunun üçün müvafiq infrastrukturun yaradılması zəruridir. Ona görə bu istiqamətdə əlavə addımlar atılmalıdır”, - deyə dövlətimizin başçısı vurğulayıb.
Yol infrastrukturunun yenilənməsi ictimai nəqliyyatın funksionallığının artmasında çox mühüm amil qismində çıxış edir
Bəhs olunan qəbulda Prezident İlham Əliyev paytaxtımızda ictimai nəqliyyatın funksionallığının artmasını şərtləndirən amillərin geniş spektrinə diqqət çəkib. Dövlət başçımız xüsusi olaraq vurğulayıb ki, əsas məsələ tıxacların azaldılmasıdır. Bu gün paytaxtımızın mənzərəsinə istinadən deyə bilərik ki, son illərdə yol infrastrukturunun yenilənməsi tıxacların azalmasında və ictimai nəqliyyatın funksionallığının artmasında çox mühüm amil qismində çıxış edir.
Bütövlükdə son 16 ildə ölkəmizdə yol infrastrukturunun yenilənməsi ilə bağlı statistika kifayət qədər zəngindir. Bəhs olunan dövrdə respublika miqyasında 16 min kilometr yol çəkilməsi, yüzlərlə körpünün, yol qovşağının istifadəyə verilməsi böyük nailiyyətdir. O cümlədən paytaxtımızda da yol infrastrukturunun müasir tələblər səviyyəsində yenidən qurulmasını təmin etmək üçün çoxlu sayda layihələr reallaşdırılıb. Bəhs olunan qəbulda dövlətimizin başçısının qeyd etdiyi kimi, o da həqiqətdir ki, əgər son 10-12 il ərzində Bakıda böyük yol infrastrukturu layihələri icra edilməsəydi, bu gün şəhər nəqliyyatı tıxacdan tərpənə bilməzdi.
Son illərdə paytaxtımızda çoxlu sayda yollar yüksək səviyyədə yenidən qurulub, hərəkətin intensivliyini təmin etmək məqsədilə müxtəlif ünvanlarda müasir yol qovşaqları, körpülər, yeraltı və yerüstü keçidlər inşa olunub. Bakı ətrafında hələ keçmiş sovet dönəmində nəzərdə tutulan, ancaq müxtəlif bəhanələrlə çəkilməsi ildən-ilə təxirə salınan dairəvi yolun inşası uğurla tamamlanıb. Bir vaxtlar şəhərdən hava limanına gedən yol dördzolaqlı sayılsa da, əslində, ikizolaqlı idi və bu yol boyunca bir neçə dairə mövcud idi. Ancaq bu gün həmin yolun üzərində bir dənə də dairə yoxdur və hava limanından şəhərə çox rahat gəlmək üçün bütün imkanlar var. Eyni zamanda, hava limanına digər avtomobil yolunun çəkilişi də böyük əhəmiyyət daşıyır. Əvvəllər Zığ istiqamətindən hava limanına, ümumiyyətlə, yol yox idi. Qısa müddətdə həmin istiqamətdən hava limanına yüksək standartlar səviyyəsində yeni yol çəkildi və hazırda həmin yol da paytaxt sakinlərinə, şəhərimizin qonaqlarına xidmət göstərir. Eyni zamanda, Bakıərtafı qəsəbələrdə də yolların təmiri intensiv şəkildə davam etdirilir. 2019-cu ildə şəhərətrafı qəsəbələrdə 10 yol layihəsinin icrası yüksək səviyyədə tamamlanıb. 2020-ci ildə isə Bakı şəhərinin 12 rayonunun ərazisində kənd və qəsəbə yollarının tikintisi və təmiri nəzərdə tutulub.
Şəhərdə yol-nəqliyyat infrastrukturunun təkmilləşdirilməsi baxımından münasib parkinq yerlərinin yaradılması da vacib məsələdir. Etiraf etmək lazımdır ki, paytaxtımızda bu sahədə vəziyyət hələlik arzuedilən səviyyədə deyil. Bir sıra ünvanlarda avtomobilləri parklamaq üçün yerlər yoxdur və yaxud azdır. Digər hallarda isə sürücülər intizamsızlıq edərək avtomobillərini parklama üçün nəzərdə tutulan yerlərdə deyil, elə yol kənarlarındaca saxlamağa üstünlük verirlər ki, bu da ictimai nəqliyyatın normal fəaliyyətinə ciddi əngəllər yaradır. Prezident İlham Əliyev bildirib ki, biz burada da hər şeyə ədalətli yanaşmalıyıq. Parkinq imkanları olmalıdır ki, sonra biz vətəndaşlardan bu qaydalara riayət etmələrini tələb edək. “Parkinq olan yerdə maşınları münasib olmayan yerlərdə saxlayıb, həm piyadalara maneə törədirlər, həm də nəqliyyata problem yaradırlar. Ancaq kifayət qədər böyük imkanlar, yəni, parkinq yerləri olmalıdır ki, biz sürücülərə bu tələbləri irəli sürək. Burada da heç bir qanun pozuntusu olmamalıdır”, - deyə dövlətimizin başçısı vurğulayıb.
Paytaxt sakinlərini yaxın perspektivdə şəhər nəqliyyatı ilə bağlı daha bir yenilik gözləyir. Söhbət 2020-ci ilin birinci yarısında bütün marşrut xətlərində işləyən avtobuslarda ödənişin kart sistemi ilə aparılmasını təmin etməkdən gedir. Bu isə öz növbəsində kölgə iqtisadiyyatının, qeyri-formal iş rejiminin aradan qaldırılmasına, sürücülərin 8 saatdan artıq işləməsinin qarşısının alınmasına, ictimai nəqliyyatdakı dövriyyənin şəffaflaşmasına imkan yaradacaq.
Mübariz