İşğalçı Ermənistan informasiya təxribatlarını davam etdirir

Bakı:

19 °C

77 %

6 m/s

Əlaqə

AZ RU EN

Ana səhifə / Siyasət / İşğalçı Ermənistan informasiya təxribatlarını davam etdirir

İşğalçı Ermənistan informasiya təxribatlarını davam etdirir

25.09.2020 [08:34]

Ekspertlərin qeyd etdikləri kimi, özünün terrorçu və cinayətkar əməllərindən diqqəti yayındırmağa çalışan Ermənistanın məqsədi beynəlxalq ictimai rəyi manipulyasiyaya məruz qoymaqdır
Məlum olduğu kimi, öz siyasətində işğalçılığı, faşist ideologiyasını əsas götürən Ermənistan terror dövlətidir. İşalçı ölkədə dövlət səviyyəsində terrorçuların himayə edilməsi, həmçinin faşistlərə abidələrin ucaldılması deyilənləri bir daha təsdiqləyir. Ermənistanın işğal etdiyi Azərbaycan ərazilərini terror yuvasına çevirməsi də inkaredilməz faktdır. Son vaxtlar işğal edilmiş ərazilərə”erməniəsilli ailələr” adı altında Yaxın Şərq ölkələrindən, o cümlədən Livan, İraq və Suriyadan terrorçuların, hətta PKK yaraqlılarının gətirilməsi barədə faktlar da beynəlxalq və yerli mətbuatın əsas mövzusuna çevrilib. Zaman-zaman Azərbaycana qarşı müxtəlif təxribatlara əl atan Ermənistan tərəfi bu faktları ört-basdır etmək üçün son dövrlər guya ölkəmizə Suriyadan döyüşçülərin gəldiyi barədə dezinformasiya yaymaqla məşğul olur.
Məsələyə münasibət bildirən Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Elman Məmmədov deyib ki, bu kimi təxribatları Ermənistanın işğal edilmiş ərazilərə Yaxın Şərq ölkələrindən terrorçuların gətirilməsi barədə faktların ifşa olunması qarşısında əl atdığlı uğursuz cəhd hesab etmək olar: “Belə ki, son günlər xarici ölkələrin mətbuatında Azərbaycanın işğal edilmiş Dağlıq Qarabağ və ətraf 7 rayonuna Livandan ASALA terror təşkilatının üzvləri ilə yanaşı, İraq və Suriyadan PKK terrorçularının da gətirilməsi barədə xəbərlərə rast gəlmək mümkündür. Məsələn, Türkiyənin “Sabah” və “Habertürk” qəzetləri, Misirin “Qahirə24” saytı, Rusiyanın “gazeta.ru” informasiya portalı Paşinyan hökumətinin terrorçularla işbirliyini ortaya qoyub. Həmin materiallarda qeyd olunur ki, PKK terror təşkilatı və onun Suriyadakı qolu olan PYD-nin (YPG) döyüşçüləri Ermənistana, oradan da işğal altındakı Dağlıq Qarabağa göndərilib. Hətta Türkiyə mətbuatında belə bir məlumat yer alıb ki, Suriyada fəaliyyət göstərən PYD yaraqlılarının tərkibində döyüşən erməni terrorçularından ibarət batalyonlar da Ermənistana göndərilib”.
Deputat vurğulayıb ki,Ermənistan bu ilin iyul ayında Azərbaycanın dövlət sərhədində törətdiyi təxribatdan sonra danışıqlar prosesini pozaraq, yeni hərbi əməliyyatlarda Yaxın Şərqdən gətirilən terrorçulardan istifadə etmək məqsədi güdür.
Milli Məclisin deputatı Müşfiq Cəfərov isə deyib ki,beynəlxalq ictimaiyyətin diqqətini işğalçı və terrorçu fəaliyyətindən yayındırmaq üçün Ermənistan vaxtaşırı bu cür dezinformasiyalar yayır: “Bu səylər PKK terror təşkilatı və onun Suriyadakı qolu PYD-nin döyüşçülərinin Ermənistana, oradan da işğal altındakı Dağlıq Qarabağa göndərilməsini ört-badır etmək məqsədi daşıyır. Növbəti erməni təxribatını Türkiyənin Yaxın Şərq üzrə mütəxəssisi, jurnalist Ləvənt Kamal ifşa edib. Dezinformasiyada adıçəkilən “Həmzə” briqadasının komandiri ilə danışan jurnalist onun öz döyüşçülərinin Azərbaycana göndərilməsi barədə bütün iddiaları rədd etdiyini və bu iddianın Türkiyə Ordusu mənbələrindən də təkzib olunduğunu yazıb”.
“Göründüyü kimi, düşmənlərimizin bütün əməlləri kimi, bu təxribatları da qısa müddətdə ifşa olunur. Əvəzində işğalçı Ermənistanın terrorçularla işbirliyi hətta bu ölkənin yerli mətbuatında da özünə yer tapır. Belə ki, erməni mediasında Paşinyan hökumətinin PKK terrorçuları ilə əməkdaşlığının Ermənistanın gələcəyini təhlükə altına ala biləcəyi barədə xəbərdarlıqlara da rast gəlinir. Bunlara baxmayaraq, Azərbaycana qarşı Ermənistan tərəfinin növbəti informasiya təxribatına yol verməsi həm də ölkəmizin regionda və dünyada artan nüfuzuna xələl gətirmək məqsədi daşıyır”, - deyə M.Cəfərov bildirib.
Qaşqay ZİYƏDDİNOĞLU

Paylaş:

Baxılıb: 343 dəfə