Deyilən sözdən imtina və jurnalistləri ittiham etmək peşəkar siyasətçiyə xas olmayan xüsusiyyətdir

Bakı:

10 °C

87 %

7 m/s

AZ RU EN

Ana səhifə / Siyasət / Deyilən sözdən imtina və jurnalistləri ittiham etmək peşəkar siyasətçiyə xas olmayan xüsusiyyətdir

Deyilən sözdən imtina və jurnalistləri ittiham etmək peşəkar siyasətçiyə xas olmayan xüsusiyyətdir

13.11.2010 [09:48]

MDB-nin İcraçı katibi Sergey Lebedev Bakıda Dağlıq Qarabağ münaqişəsi ilə bağlı söylədiyi fikirləri təkzib edib və onun fikirlərinin guya təhrif olunduğunu bildirib
Bu gün dünyada peşəkar siyasətçilər dövlətlərarası münasibətlərin qurulması, əməkdaşlığın genişləndirilməsi, təhlükəsizliyin təmin olunması istiqamətində atdıqları addımlarla insanların hörmətini, inamını qazanır. Amma fəaliyyəti dövründə xüsusi peşəkarlıq nümayiş etdirmiş bir siyasətçinin sonradan dediyi sözlərdən imtina etməsi, hətta, öz günahını yumaq üçün jurnalistləri günahlandırması həmin inamı və etimadı tamamilə sındırmış olur. çox təəssüflər olsun ki, belə bir hal hələ də mövcud olmaqdadır...
Qeyd edək ki, noyabrın 11-də MDB İcraçı katibi Sergey Lebedev Ermənistan xarici işlər naziri Edvard Nalbandyana məktub göndərərək Bakıda verdiyi açıqlama zamanı Dağlıq Qarabağ münaqişəsi ilə bağlı söylədiyi fikirləri təkzib edib və onun fikirlərinin guya təhrif olunduğunu bildirib. Məktubda deyilir: “Bununla bağlı sizə məlumat vermək istərdim ki, bəzi informasiya agentliklərinin mənim adımdan “Biz işğal olunmuş ərazilərin azad olunması, Azərbaycanla Naxçıvan, Qarabağla Ermənistan arasında dəhlizin yaradılması məsələlərini müzakirə edirik” fikri həqiqətə uyğun deyil. Fürsətdən istifadə edərək MDB-nin möhkəmləndirilməsi maraqları naminə Ermənistan rəhbərliyi ilə sıx tərəfdaşlığa səmimi və konstruktiv əhval-ruhiyyədə olmağımda sizi əmin edirəm”.
Əslində isə, S.Lebedev mətbuata açıqlamasında bildirib: “özünüz görürsünüz ki, Rusiya rəhbərliyi bu münaqişənin həlli üçün hansı səylər göstərir. üçtərəfli görüşlərə başlanıb, bu, artıq iki ildir davam edir, axırıncı görüş Həştərxanda keçirilib. Siz bilirsiniz ki, əsirlər və cəsədlərin dəyişdirilməsi ilə bağlı konkret razılaşmalar əldə olunub və s. Bu, yalnız kiçik addımdır, lakin biz bunun ardınca digər addımların olması üçün əlimizdən gələni edirik. Yəni, müzakirə olunan bu məsələlər barədə - işğal olunmuş ərazilərin azad olunması və müvafiq olaraq Azərbaycanla Naxçıvan, Qarabağla Ermənistan arasında dəhlizin yaradılması və s., əlavə olaraq digər humanitar məsələlər - bütün bunlar müzakirə olunur, mən bunu bilirəm...”.
Maraqlıdır ki, S.Lebedevi bu sözləri işlətməyə heç kim vadar etməmişdi və ona bu istiqamətdə məqsədli suallar da verilməmişdi.
Xatırladaq ki, Azərbaycan torpaqlarının Ermənistan tərəfindən işğal faktı BMT, ATƏT, Avropa Şurası, İslam Konfransı Təşkilatı və digər nüfuzlu beynəlxalq təşkilatların, həmçinin, ATƏT Minsk qrupunun həmsədrləri olan ABŞ, Rusiya və Fransanın rəsmi sənədlərində öz əksini tapıb. Bəs, görəsən bütün dünyanın qəbul etdiyi və səsləndirdiyi ifadənin təkrar olunmasında problemli nə var ki, S.Lebedevi Nalbandyana izahat yazmağa məcbur edib?
Görəsən, MDB-nin İcra katibi kimi məsul vəzifə tutan şəxsin təzyiq qarşısında öz sözünü geri götürməsinin bir qurum kimi MDB-nin nüfuzuna mənfi təsir göstərdiyini S.Lebedev nəzərə alıbmı?
Son olaraq xatırlatmaq yerinə düşər ki, kimlərinsə təzyiqi altında öz fikrindən imtina etmək və sənin dediklərini sözbəsöz təkrarlayan mətbuatı günahlandırmaq peşəkar siyasətçiyə xas olmayan xüsusiyyətdir. Yəqin ki, dediyi fikirlərdən imtina etməyin siyasətçinin nüfuzuna xələl gətirən hal olduğunu cənab Lebedev bilməmiş deyil.
RAMİL

Paylaş:

Baxılıb: 978 dəfə