Tibb Universitetində Bilik günü qeyd olunub

Bakı:

15 °C

72 %

8 m/s

Əlaqə

AZ RU EN

Ana səhifə / Sosial / Tibb Universitetində Bilik günü qeyd olunub

Tibb Universitetində Bilik günü qeyd olunub

16.09.2015 [10:05]

Sentyabrın 15-də Azərbaycan Tibb Universitetində (ATU) Bilik gününə həsr olunmuş təntənəli mərasim keçirilib.
AZƏRTAC xəbər verir ki, mərasimdə rektor, akademik Əhliman Əmiraslanov çıxış edərək tələbələri yeni tədris ilinin başlanması münasibətilə təbrik edib, onlara uğurlar arzulayıb.
Ə.Əmiraslanov ölkəmizdə Bilik gününün keçirilməsi ənənəsinin əsasının Ulu öndər Heydər Əliyev tərəfindən qoyulduğunu xatırladaraq deyib: “Azərbaycanda elmi biliklərin, təhsil sisteminin, səhiyyənin ardıcıl inkişafı Ümummilli liderimizin qlobal inkişafa doğru aparan uzaqgörən siyasətinin tərkib hissəsini, bu siyasətin əsas özəyini təşkil edir. Məqsədyönlü şəkildə aparılan islahatlar sayəsində bu inkişaf, bu tərəqqi tezliklə öz bəhrəsini verdi və arzu olunan səviyyəyə çatdırıldı. Son 12 il ərzində ölkəmizdə elmin inkişafına, təhsil sisteminin, səhiyyənin tərəqqisinə dövlət qayğısı siyasəti Prezident İlham Əliyev tərəfindən yeni müstəvidə davam etdirilərək böyük vüsət alıb”.
Rektor bildirib ki, bugünkü nailiyyətlərin əldə edilməsi uzun illərdən bəri Azərbaycan Tibb Universiteti əməkdaşlarının apardıqları elmi axtarışların, gərgin əməyin, çəkilən zəhmətin sayəsində mümkün olub.
Azərbaycan Tibb Universitetinin bu zirvəyə çatmaq üçün 85 illik şərəfli bir yol keçdiyini qeyd edən Ə.Əmiraslanov bu tarixin ən yaddaqalan məqamları haqqında da məlumat verıb. Bildirib ki, 1996-cı ildə ATU-nun Londonda çıxan Dünya Təhsil Birliyinin reyestrinə daxil edilməsi bu ali tibb təhsili ocağının beynəlxalq aləmdəki nüfuzunu xeyli artırıb.
Qeyd olunub ki, ATU-da yaradılmış 4 klinika elmi texnologiyaların ən son innovativ avadanlıqları ilə təchiz olunub. Beynəlxalq standartlara uyğun olan bu təchizat universitetdə elmin və təhsilin yüksək səviyyədə aparılmasına geniş imkanlar verir.
ATU-nun tələbəsi adını qazanmış gəncləri təbrik edən Nəsimi rayon İcra Hakimiyyətinin başçısı Asif Əsgərov bu təhsil ocağının nəinki respublikada, ümumiyyətlə regionda fəaliyyət göstərən universitetlər arasında seçildiyini söyləyib.
Səhiyyə nazirinin müavini Elsevər Ağayev isə Azərbaycanda və dünyanın hər bir yerində təhsilin böyük önəm daşıdığını bildirərək deyib: “85 il yaddaqalan bir tarixdir. Hazırda biz bu tarix boyunca əldə olunan nailiyyətlərin şahidiyik. İndi Azərbaycanda tibb təhsili islahatlar dövrünü yaşayır. Əgər 2000-ci ildə açıq ürək əməliyyatı bizə çətin bir əməliyyat kimi görünürdüsə, indi ATU-nun klinikalarında bundan da mürəkkəb əməliyyatlar uğurla icra olunur”.
YAP Nəsimi rayon təşkilatının sədri, Milli Məclisin deputatı Məlahət İbrahimqızı isə tələbəlik illəri ilə bağlı xatirələrini söyləyib, ATU-nun kollektivini həm Bilik günü, həm də 85 illik yubiley münasibətilə təbrik edib.
Daha sonra akademik Dilqəm Tağıyev ATU-nun ötən illər ərzində qazandığı uğur və nailiyyətlər haqqında fikirlərini bölüşüb.
Bu il qəbul imtahanlarında 700 bal toplayaraq ən yüksək nəticə ilə ATU-nun müalicə-profilaktika fakültəsinə qəbul olunan tələbə Nurlan Məcidov isə müəllimlərinin etimadını doğruldacağını bildirib.
Toplantıda universitetin professor-müəllim heyəti, tələbələr və valideynlər iştirak ediblər.
Sonda bu il ATU-nun I kursuna qəbul olunan bir qrup gəncə tələbə biletləri təqdim edilib.

Paylaş:

Baxılıb: 759 dəfə