AZƏRTAC və Qərb Universiteti nəzdində məktəb Beynəlxalq Yer Kürəsi Gününə həsr olunmuş müsabiqəyə yekun vurublar

Bakı:

24 °C

66 %

3 m/s

AZ RU EN

Ana səhifə / Sosial / AZƏRTAC və Qərb Universiteti nəzdində məktəb Beynəlxalq Yer Kürəsi Gününə həsr olunmuş müsabiqəyə yekun vurublar

AZƏRTAC və Qərb Universiteti nəzdində məktəb Beynəlxalq Yer Kürəsi Gününə həsr olunmuş müsabiqəyə yekun vurublar

22.04.2016 [10:06]

Məlum olduğu kimi, aprelin 22-də bütün dünyada Beynəlxalq Yer Kürəsi Günü qeyd olunur. Bu günü planetimizdə həyat üçün zəruri olan təmiz su, torpaq və hava bayramı da adlandırmaq olar. Azərbaycan Dövlət İnformasiya Agentliyi (AZƏRTAC) də bu bayramdan kənarda qalmayıb. O, Qərb Universiteti nəzdində tam orta məktəb ilə birlikdə Beynəlxalq Yer Kürəsi Gününə həsr olunmuş müsabiqə təşkil edib.
Aprelin 21-də müsabiqəyə yekun vurulub. Aşağı və yuxarı sinif şagirdləri münsiflər heyətinə 50-dən çox iş, o cümlədən ekologiya, bitki və heyvanlara qayğıkeş münasibət, ətraf mühitin mühafizəsi mövzusunda rəsmlər və əl işləri təqdim ediblər.
Qərb Universiteti nəzdində məktəbin rəhbərliyindən və AZƏRTAC-ın Uşaq Portalının əməkdaşlarından ibarət münsiflər heyəti altı qalibi müəyyən edib.
Dördüncü sinif şagirdi Cəlal Məmmədov orijinal ideyaya və işini bacarıqla yerinə yetirdiyinə görə birinci yerə layiq görülüb: o, Yerin Qırmızı kitab formasında xəritəsini hazırlayıb, nəsli kəsilməkdə olan heyvan növlərinin gildən hazırlanmış fiqurlarını ora sancıb. İkinci yeri dördüncü sinif şagirdi Fərəh Əmrahova, üçüncü yeri ikinci sinif şagirdi Aytən Əliyeva tutublar. Fərəh Əmrahova hazırladığı əlvan Yer kürəsini kağız güllər və göyərçinlərlə bəzəyib. Aytən Əliyevanın ortadan bölünən və içərisində bütün flora və fauna aləmi yerləşdirilən qlobusu qeyri-adiliyi ilə hamını heyrətləndirib.
Züleyxa Bədəlova (7-ci sinif), Kiyani Murad (4-cü sinif), Diana Tyurina (3-cü sinif) müvafiq olaraq 4-cü, 5-ci və 6-cı yerləri tutublar. Diana Tyurinanın əl işi yaddaqalan olub. O, kartondan və parlaq rəngli kağızlardan ağac və çiçəklərlə haşiyələnmiş Şəhər-bağ hazırlayıb.
AZƏRTAC-ın həmkarlar ittifaqı komitəsi adından müsabiqənin qalib və iştirakçılarına diplomlar, fəxri fərmanlar və hədiyyələr təqdim olunub.
Tədbir müxtəlif siniflərin şagirdlərinin çıxışları ilə yadda qalıb. Onların ifasında Yer Kürəsi Gününə həsr olunmuş şeir və mahnılar səslənib, təbiət haqqında təqdimatlar olub.
AZƏRTAC-ın Uşaq Portalının rəhbəri Nigar Hüseynova müsabiqəyə təqdim etdikləri işlərə görə uşaqlara, habelə məktəbin rəhbərliyinə, müsabiqə iştirakçılarının müəllimlərinə və valideynlərinə təşəkkür edib.
Məktəbin direktoru Liana Bağırova tədbir iştirakçılarına ekspozisiya haqqında danışaraq, təbiətin mühafizəsində hər bir insanın rolunu vurğulayıb. O, həmçinin müsabiqənin keçirilməsinə dəstək göstərdiyinə görə AZƏRTAC-ın həmkarlar ittifaqı komitəsinə təşəkkür edib.
Beynəlxalq Yer Kürəsi Gününün tarixi ABŞ sakini Con Mortonun adı ilə bağlıdır. Con Sterlinq Morton XIX əsrin sonunda Nebraska ştatının preriya ərazisinə köçüb. O vaxtlar bu yerlərdə evlər tikmək üçün onsuz da tək-tük olan ağaclar kəsilirdi. Morton yaşıllaşdırmaya həsr olunmuş gün təşkil etməyi və daha çox ağac əkənlər üçün mükafat təsis olunmasını təklif edib. Həmin günü Ağac Günü adlandırıblar. 1882-ci ildə Nevraska ştatı Ağac Gününü rəsmi bayram elan edib. Mortonun doğum günündə - aprelin 20-də qeyd edilən bu bayram sonralar “Yer Kürəsi Günü” adlandırılıb.
Beynəlxalq Yer Kürəsi Günü bəşəriyyətin diqqətini Yerin ekoloji sisteminin kövrəkliyinə cəlb etmək və insanları ümumi evimiz olan Yer planetinə münasibətdə daha diqqətli olmağa həvəsləndirmək məqsədi daşıyır. Ənənəyə görə, həmin gün planetimizin bütün sakinləri həyət və küçələrin abadlaşdırılmasında və yaşıllaşdırılmasında iştirak edir, müxtəlif ekoloji aksiya və tədbirləri dəstəkləyirlər.

Paylaş:

Baxılıb: 828 dəfə