Gürcüstanda medianın özünütənzimləmə qurumları şəbəkəsinin növbəti toplantısı keçirilir

Bakı:

28 °C

57 %

3 m/s

Əlaqə

AZ RU EN

Ana səhifə / Sosial / Gürcüstanda medianın özünütənzimləmə qurumları şəbəkəsinin növbəti toplantısı keçirilir

Gürcüstanda medianın özünütənzimləmə qurumları şəbəkəsinin növbəti toplantısı keçirilir

17.06.2016 [10:05]

İyunun 16-da Gürcüstanın Kaxetiya bölgəsində medianın özünütənzimləmə qurumları şəbəkəsinin növbəti toplantısı işə başlayıb.
Mətbuat Şurasından AZƏRTAC-a bildiriblər ki, tədbir Avropa İttifaqının və Avropa Şurasının birgə layihəsi əsasında keçirilir. İki gün davam edəcək toplantıda Azərbaycan tərəfdən Milli Məclisin deputatı, Mətbuat Şurasının sədri Əflatun Amaşov və Şuranın İdarə Heyətinin üzvü, Demokratik Jurnalistlər Liqasının sədri Yadigar Məmmədli iştirak edirlər.
Tədbirdə şəbəkəyə üzv təşkilatların ötən müddətdə gördükləri işlər barədə hesabatlar dinlənilib. Əflatun Amaşov özünütənzimləmə orqanlarında etik dilemmalar mövzusunda məruzə edib, rəhbərlik etdiyi qurumun timsalında mövcud sahədə meydana çıxan problemlərdən söz açıb. O bildirib ki, 2007-ci ildən sonra Azərbaycanda internet sürətlə inkişaf etməyə başladı. Müvafiq olaraq internet media orqanlarının sayı əhəmiyyətli dərəcədə artdı. Təbii ki, operativlik baxımından yeni tələblər meydana çıxdı. Lakin bu tələblər peşə prinsiplərinə də fərqli yanaşma zərurətini yaratdı. Mətbuat Şurası vəziyyətə adekvat davranmalı idi. Vəziyyətə adekvat davranmaq, cəmiyyətin və medianın mənafeyini uzlaşdırmaq media ictimaiyyətinin özünün də ictimai sifarişi kimi diqqət çəkdi: “Əlbəttə, ilk baxışdan ənənəvi media üçün etik tələblərin onlayn mediaya da asanlıqla tətbiq edilə biləcəyini düşünmək mümkündür. Ancaq bir qədər öncə məsuliyyətdən danışdım. Ənənəvi KİV fəaliyyətini peşə etikasına əsasən qurur. Eyni zamanda, burada qanunlara da riayət var. Yəni qanunlar, belə demək mümkünsə, peşə etikasının qarantı rolunda çıxış edir. Nəhayət, böyük ölçüdə peşə etikasına riayət edən media orqanı qanunlara da riayət etmiş sayılır. Bu müstəvidə fərqliliklərə çox az təsadüf edilir. Ancaq internet media üçün belə bir məsuliyyət yükü yoxdur. Ona görə də onları etik prinsiplərə əməl etməyə çağırmaq bəzən çətin olur. Nəticədə bir çox hallarda təkcə etik pozuntuların yox, elə qanun pozuntularının da çox hissəsi internet medianın üzərinə düşür”.
Yadigar Məmmədli media təbliğatındakı spesifik cəhətlərlə bağlı çıxış edib. Bu xüsusda o, Azərbaycanla xarici ölkələr arasındakı oxşar və fərqli xüsusiyyətlərə toxunub.
Toplantıda özünütənzimləmə şəbəkəsinə yeni üzvlərin cəlb edilməsi, etik standartların qorunması ilə bağlı beynəlxalq monitorinqin nəticələri, habelə onlayn media ilə əlaqədar şikayətlərin araşdırılması xüsusiyyətləri və s. məsələlər müzakirəyə çıxarılıb.
Toplantıya Serbiya, Monteneqro, Albaniya, Bosniya və Herseqovina, Kosovo və Makedoniyadan da media nümayəndələri qatılıblar.
Tədbir iyunun 17-də mövzu ətrafında müzakirələrlə davam edəcək.

Paylaş:

Baxılıb: 721 dəfə