Rəqəmli teleyayım yüksək keyfiyyət göstəriciləri ilə seçilir

Bakı:

14 °C

88 %

6 m/s

Əlaqə

AZ RU EN

Ana səhifə / Sosial / Rəqəmli teleyayım yüksək keyfiyyət göstəriciləri ilə seçilir

Rəqəmli teleyayım yüksək keyfiyyət göstəriciləri ilə seçilir

04.11.2016 [10:02]

İsa Məmmədov: Rəqəmli teleyayımın üstün cəhətlərindən biri də interaktivliyin tətbiqinin daha da asanlaşmasıdır
Xəbər verildiyi kimi, Azərbaycan Respublikası Milli Televiziya və Radio Şurasının (MTRŞ) müvafiq qərarına uyğun olaraq bu il noyabrın 1-dən etibarən Bakı şəhəri və Abşeron yarımadasında analoq televiziya yayımı rəqəmli yayımla əvəzlənib. Digər regionlarımızda isə bu prosesin dekabrın 1-dən reallaşdırılması nəzərdə tutulur. Yəni dekabrın 1-dən etibarən ölkəmizin bütün bölgələrində analoq yayımı rəqəmli yayım əvəzləyəcək.
Bununla bağlı MTRŞ-nin yaydığı məlumatda da bildirilir ki, 2004-cü ildən ölkəmizdə rəqəmli televiziya yayımının tətbiqinə start verilib. Həmin dövrdə Bakı şəhəri və Abşeron yarımadası ərazisində “Elettronika” tipli İtaliya istehsalı olan televiziya vericisi ilə sınaq verilişləri də həyata keçirilib, o cümlədən Şuranın Texniki şöbəsinin iştirakı ilə sınaq-ölçmə və subyektiv qiymətləndirmə işləri yerinə yetirilib. 2010-cu ildə isə artıq dördrəqəmli televiziya vericisi vətəndaşların istismarına təqdim edilib. Ötən müddət ərzində işlədilən teleyayım vericilərinin gücü artırılıb, eləcə də parametrləri müasirləşdirilib. Nəticədə ölkə əhalisinin demək olar ki, hamısı rəqəmli teleyayım ilə əhatə olunub.
Qeyd edilməlidir ki, birinci mərhələdə Bakıda və Abşeron yarımadasında, sonrakı mərhələdə isə bütün respublika ərazisində rəqəmli yayıma keçilməsi ölkəmizdə müasir informasiya texnologiyalarının inkişafı və tətbiqi, vətəndaşların informasiya təminatının keyfiyyətinin yüksəldilməsi, bununla yanaşı, teleyayımın dəqiqliyinin təminatı yönündə mühüm əhəmiyyət kəsb edir.
Məsələ ilə bağlı qəzetimizə açıqlama verən MTRŞ-nin maliyyə və texniki nəzarət şöbəsinin müdir müavini İsa Məmmədov bildirib ki, rəqəmli yayım analoq yayımdan keyfiyyət göstəricilərinə görə fərqlənir. Belə ki, rəqəmli yayımın keyfiyyət göstəriciləri daha yüksəkdir: “Bundan başqa, iki yayım arasında spektrial baxımdan da effekt fərqi mövcuddur. Rəqəmli yayımda bir kanalda 10 televiziya proqramı göstərilə bilir. Bu isə bizə kanalların boşalmasından maksimum yararlanmaq imkan verir. Kanallar boşaldıqca isə HD formatına keçilmə imkanı qazanmış oluruq. Qeyd edim ki, rəqəmli teleyayımın üstün cəhətlərindən biri də interaktivliyin tətbiqinin daha da asanlaşmasıdır. Eləcə də verilişlərin yazılması, arxivləşdirilməsi, saxlanması əvvəlki dövrdən asanlığı ilə fərqlənəcək. Rəqəmli teleyayımın ən əsas xüsusiyyətlərindən biri isə mobil qəbulun dayanıqlı olmasından ibarətdir. Analoq yayımda bu dayanıqlılığı təmin etmək bir sıra hallarda mümkün olmurdu. Əvvəlki dövrdə ekrandan təsvirlər itirdi, rəqəmli teleyayımın tətbiqi bu problemi aradan qaldıracaq. Eləcə də səs daha yüksək effektlə və keyfiyyətlə canlandırılacaq. Bir məsələni qeyd edim ki, rəqəmli yayımda ümumiyyətlə pis təsvirlər olmur. Analoq yayımda bəzi hallarda kölgələr yaranırdı, təsvirlər itirdi, konturlar şəklində əlavə təkrarlar görünürdü, əsas təsvirin yanında az kontrastlığa malik ikinci bir təsvir yer alırdı. Bu kimi problemlər rəqəmli teleyayımda yoxdur. Rəqəmli televiziya yayımının qəbulunda təkrarlar görünmür. Rəqəmli teleyayımda görüntülər ya yüksəfk keyifyyətə malik olur, ya da ümumiyyətlə olmur”.
İ.Məmmədov onu da vurğulayıb ki, rəqəmli televiziya yayımına keçid regionlarımızda hər hansı bir problem yaratmayacaq. Bölgələrdə bununla bağlı bütün infrastrukturların yaradıldığını bildirən İ.Məmmədov hazırda ölkə ərazisində 135 yayımvericinin işlədiyini diqqətə çatdırıb: “Əhalinin rəqəmli televiziya ilə əhatə dairəsi 99 faizdir. Bu baxımdan qəti şəkildə bildirmək olar ki, bölgələrimizdə verici şəbəkələrdə heç bir problem yaranmayacaq. Region kanallarımız da demək olar ki, rəqəmli yayıma keçid işlərini tamamlayıblar. Ən sonuncu Mingəçevir televiziyası idi ki, onlar da artıq öz işlərini tamamlamaq üzrədir və rəqəmli yayıma keçirlər. Regionlarımızda fəaliyyət göstərən bütün televiziyalar dekabrın 1-nə qədər rəqəmli yayıma keçmək üçün hazır vəziyyətdə olacaqlar”.
Pərviz SADAYOĞLU

Paylaş:

Baxılıb: 529 dəfə