Nərimanov rayonunda Yeni Azərbaycan Partiyasının prezidentliyə namizədinin xeyrinə imzatoplama prosesi uğurla başlayıb

Bakı:

15 °C

77 %

1 m/s

AZ RU EN

Ana səhifə / YAP xəbərləri / Nərimanov rayonunda Yeni Azərbaycan Partiyasının prezidentliyə namizədinin xeyrinə imzatoplama prosesi uğurla başlayıb

Nərimanov rayonunda Yeni Azərbaycan Partiyasının prezidentliyə namizədinin xeyrinə imzatoplama prosesi uğurla başlayıb

14.08.2013 [09:08]

Rayon sakinləri böyük həvəslə cənab İlham Əliyevin namizədliyi üçün öz imzalarını verirlər
Ölkəmizin ən güclü siyasi qüvvəsi olan Yeni Azərbaycan Partiyası (YAP) prezident seçkiləri kampaniyası çərçivəsində uğurlu fəaliyyət göstərməkdədir. Artıq partiyamızın Sədri, dövlət başçısı İlham Əliyevin prezidentliyə namizədliyi Mərkəzi Seçki Komissiyası tərəfindən təsdiq edilib. Avqustun 13-dən etibarən isə namizədin qeydə alınması üçün seçki qanunvericiliyinə əsasən tələb olunan imza toplanılması prosesinə başlanıb.
Ümumiyyətlə, YAP Azərbaycanın ən böyük siyasi təşkilatı olmaqla bərabər, həm də xalqımıza xidmət edən güclü siyasi təşkilatdır. YAP bu gün təkcə Azərbaycanda deyil, ölkəmizin hüdudlarından kənarda da qəbul olunan nüfuzlu siyasi güc mərkəzidir. Məhz güclü siyasi təşkilatın beynəlxalq aləmdə nüfuzlu siyasi partiyalar tərəfindən qəbul edilməsinin səbəbi də onun xalqına söykənməsi, xalqdan qidalanmasıdır. Bu mənada Yeni Azərbaycan Partiyasının ümumxalq partiyası hesab olunması təsadüfi deyil.
21 illik fəaliyyəti dövründə partiyamız Heydər Əliyev yolu ilə irəliləyərək, çox böyük və şərəfli yol keçib. Cəmiyyətin avanqard siyasi qüvvəsi kimi Yeni Azərbaycan Partiyası xalqımızın qarşısında duran vəzifələrin yerinə yetirilməsinə özünün layiqli töhfəsini verib və bu yolu əzmkarlıqla davam etdirən Prezident İlham Əliyevin rəhbərliyi ilə ləyaqətlə xalqa xidmət göstərir. Partiyamız yarandığı vaxtdan xalqımıza xidmət onun başlıca amalıdır. Ümummilli liderimiz Heydər Əliyevin müəyyənləşdirdiyi dövlətçilik prinsiplərinə söykənən Yeni Azərbaycan Partiyası ölkəmizin ən qabaqcıl nümayəndələrini öz sıralarında birləşdirərək, müstəqil Azərbaycan dövlətinin qurulması yolunda geniş, çoxşaxəli fəaliyyət göstərib. Partiyanın V qurultayında da qəbul olunmuş qərarlar xalqımızın rəyini, arzu və istəklərini özündə ifadə edir.
Bu mənada qarşıdan gələn prezident seçkilərinə hazırlıq işləri də YAP üçün böyük önəm kəsb edir. Xatırladaq ki, yarandığı vaxtdan partiyamız bütün seçkilərdə qələbə qazanıb. Bu qələbələri şərtləndirən əsas amillərdən biri də YAP-ın seçki kampaniyalarına yüksək səviyyədə hazırlıqlı olmasıdır. Hazırki seçki kampaniyasına da partiyamız ciddi şəkildə hazırlaşıb. Qeyd edək ki, dünəndən etibarən YAP rayon və şəhər təşkilatlarında müəyyənləşdirilmiş qaydada partiya fəalları imzatoplama prosesinə başlayıblar.
İmzatoplama prosesi YAP Nərimanov rayon təşkilatı tərəfindən də uğurla həyata keçirilir. Rayon təşkilatının sədri Təmraz Tağıyev bildirib ki, imza toplamaq üçün müəyyənləşdirilmiş şəxslər 18 saylı Nərimanov-Nizami, 19 saylı Nərimanov birinci və 20 saylı Nərimanov ikinci seçki dairələrində bu prosesi həyata keçirirlər. “Biz təxminən 1000 nəfərə yaxın şəxsdən imza toplamalıyıq. İnanıram ki, bu prosesi tezliklə yekunlaşdıracağıq. Çünki imza toplayacaq şəxslərə müvafiq təlimatlar verilib və onların əksəriyyəti bu işdə təcrübəlidirlər. Fikrimcə, qısa müddətdə bu proses başa çatdırılacaq” - deyə, T.Tağıyev bildirib.
Qeyd edək ki, dünən imzatoplama prosesinə başlayan şəxslər vətəndaşların YAP-ın namizədi, dövlət başçısı İlham Əliyevin xeyrinə böyük məmnuniyyətlə imza verdiklərini bildirdilər. Bu prosesi izləyərkən həqiqətən də, cənab İlham Əliyevin namizədliyinin qeydə alınması üçün insanların öz imzalarını böyük həvəslə verdiklərinin şahidi olduq. Həmsöhbətimiz olan Nərimanov rayon sakini Xalis Osmanov YAP-ın namizədi üçün imza verməsini belə əsaslandırdı: “Mən cənab İlham Əliyevin xeyrinə imza verməyimi özümə borc bilirəm. Çünki məhz Prezident İlham Əliyevin siyasəti nəticəsində ölkəmiz sürətlə inkişaf edir, əhalinin rifahı yüksəlir. Ona görə də, YAP-ın nümayəndələri mənə imza vermək üçün müraciət edəndə böyük məmnuniyyətlə qəbul etdim. Mənim ailə üzvlərim də cənab İlham Əliyevin xeyrinə öz imzalarını verirlər”.
Nərimanov rayonunun gənc sakini Nərminə Yunusova da cənab İlham Əliyevin xeyrinə öz imzasını könüllü olaraq verdiyini deyir. Bir gənc olaraq ölkəmizdə gəncliyin inkişafı üçün əhəmiyyətli işlərin görüldüyünü deyən N.Yunusovanın sözlərinə görə, Azərbaycanda uğurlu gənclər siyasəti həyata keçirilir. “YAP-ın Sədri, dövlət başçısı İlham Əliyev Öz fəaliyyətində daim gənclərə diqqət və qayğı göstərir. Onun həyata keçirdiyi siyasət nəticəsində gəncliyimiz daim inkişaf edir. Mən cənab İlham Əliyevin namizədliyinin xeyrinə imza atmaqla özümün sabahıma imza atmış oluram” - deyə, N.Yunusova qeyd edib.
Ümumiyyətlə, Nərimanov rayonu üzrə imzatoplama prosesinin qısa müddətdə başa çatacağı şübhəsizdir. İnsanların könüllü olaraq, böyük həvəslə cənab İlham Əliyevin namizədliyinin xeyrinə imzalarını verməsi bunu deməyə tam əsas verir.
Nardar BAYRAMLI

Paylaş:

Baxılıb: 1529 dəfə