4 Oktyabr - Cəbrayıl Şəhər Günü: Tarixi qayıdış və yenidənqurma

Bakı:

11 °C

93 %

10 m/s

Əlaqə

AZ RU EN

Ana səhifə / YAP xəbərləri / 4 Oktyabr - Cəbrayıl Şəhər Günü: Tarixi qayıdış və yenidənqurma

4 Oktyabr - Cəbrayıl Şəhər Günü: Tarixi qayıdış və yenidənqurma

04.10.2025 [22:10]

Bu gün Cəbrayılın və cəbrayıllıların həyatında ən əlamətdar sevincli gündür. 44 günlük Vətən müharibəsinin ilk günlərində oktyabrın 4-də 30 illik işğal həsrətinə son qoyulmaqla Cəbrayılın həyatında yeni qürurverici həyat başladı.

5 il əvvəl bu gün şanlı Azərbaycan ordusu Muzəffər Ali Baş Komandan İlham Əliyevin rəhbərliyi altında Cəbrayılda üçrəngli Azərbaycan bayrağı dalğalandırdı,Xudafərinin köksündəki Vətən həsrəti bitdi.

Cənab Prezident, Ali Baş Komandan İlham Əliyevin müvafiq sərəncamı ilə bu gün Cəbrayıl Şəhəri günü kimi qeyd edilir. Bu Günün təsis edilməsi Xalqımızın milli müstəqillik və suverenliyi uğrunda sarsılmaz mübarizəsinin və yenilməz iradəsinin, qələbə əzminin ən şərəfli səhifəsidir. Çünki Cəbrayıl 2020-ci ildə azad edilən ilk şəhər oldu. Qələbə xəbəri xalqımızın ruhunu qaldırdı, dövlət-xalq birliyini daha da möhkəmləndirdi. Həmin gün qazanılan zəfər 44 günlük müharibənin taleyini dəyişdi.

Cəbrayıl Şəhər Günü Zəfər salnaməsinin, Ümummilli Ləyaqət Simvolumuzun rəmzlərindən biridir. Bu gün təkcə Cəbrayılın deyil, Qarabağın, Şərqi-Zəngəzurun, ərazi bütövlüyü son 200 ildə tam təmin edilmiş Azərbaycanın Qələbə bayramıdır. Möhtərəm İlham Əliyevin də bildirdiyi kimi biz çox xoşbəxt günlərimizi yaşayırıq və buna layiq Xalqıq.

İşğal illərində Cəbrayılın tarixi-mədəni abidələri dağıdıldı. Sultan Məcid hamamı, Qız qalası, Divlər sarayı mağarası, Xudafərin körpüləri və yüzlərlə digər abidə erməni vandalizminə məruz qaldı. Bu gün isə onların bərpası istiqamətində işlər aparılır.

Artıq Cəbrayıl tamamilə yenidən qurulur, Cənab Prezident İlham Əliyev və Mehriban xanım Əliyevanın iştirakı ilə yeni qəsəbə və kəndlərin, yaşayış binalarının təməlləri qoyulub, məktəb, xəstəxana, sosial obyektlər inşa olunur, həyata keçirilən genişmiqyaslı quruculuq işləri yüksək zövq və keyfiyyətlə aparılır. Böyük Qayıdış proqramı çərçivəsində yüzlərlə ailə artıq Cəbrayıla köçürülüb. Şəhərin 2040-cı ilə qədər inkişaf planı hazırlanıb və mərhələli şəkildə həyata keçirilir. Cəbrayıl rayonu əvvəlkindən daha görkəmli, müasir və cazibədar cənnət məkana çevrilir.Cəbrayıllılar 30 il həsrətində olduqları doğma evlərinə qayıtmağın qürur və sevincini yaşayırlar.

Cəbrayıl Şəhəri Gününün qeyd olunması hər bir azərbaycanlı üçün həm qürur, həm də məsuliyyətdir. Bu gün xalqımızın qəhrəmanlığını, şəhidlərin fədakarlığını xatırladır və gələcək nəsillərə vətən sevgisini aşılayır.

Cəbrayıl rayonunun və işğal olunmuş digər ərazilərin azad edilməsində canını fəda etmiş əziz şəhidlərimizə Allahdan rəhmət diləyir, öz sağlamlığını itirmiş qazilərimizə şəfa diləyir, bütün əsgər və zabitlərimizə dərindən minnətdarlığımızı bildiririk.

Gündüz Alıkişiyev,

YAP Tərtər rayon təşkilatının məsləhətçisi

Paylaş:

Baxılıb: 545 dəfə