Müstəqil düşüncə və güclü gələcək

Bakı:

10 °C

87 %

5 m/s

Əlaqə

AZ RU EN

Ana səhifə / YAP xəbərləri / Müstəqil düşüncə və güclü gələcək

Müstəqil düşüncə və güclü gələcək

23.01.2026 [19:29]

Dünya sürətlə dəyişir və bu dəyişikliklərin mərkəzində artıq təkcə dövlətlər deyil, gənclər dayanır. Qlobal proseslər, texnoloji yeniliklər, siyasi və iqtisadi çağırışlar gənclərin düşüncəsinə, seçimlərinə və gələcək planlarına birbaşa təsir edir. Məhz belə bir dövrdə cənab Prezident İlham Əliyevin 20 yanvar 2026-cı ildə Davosda “Euronews” televiziyasına verdiyi müsahibə gənclər üçün sadəcə siyasi müsahibə deyil, həm də gələcəyə dair mühüm mesajlar toplusu kimi dəyərləndirilir.

Gənclərin gözü ilə baxdıqda, müsahibədə səsləndirilən əsas fikirlərdən biri müstəqillik və öz gücünə inanmaq ideyasıdır. Ölkə Bşçısı dəyişən dünya nizamından danışaraq vurğulayır ki, bu gün hər bir ölkə, eləcə də hər bir insan öz taleyinin əsas memarı olmalıdır. Bu yanaşma gənclər üçün xüsusi məna daşıyır. Çünki müasir dövrdə uğur qazanmaq üçün yalnız diplom və formal biliklər kifayət etmir. Öz üzərində çalışmaq, bacarıqları inkişaf etdirmək və təşəbbüskar olmaq əsas şərtə çevrilib.

Müsahibədə Azərbaycanın milli maraqlara əsaslanan müstəqil siyasət kursu gənclərə bir nümunə kimi təqdim olunur. Bu mövqe gənclərə öyrədir ki, həyatın müxtəlif mərhələlərində təzyiqlər və çətinliklər olsa belə, prinsiplərə sadiq qalmaq və düzgün mövqe seçmək vacibdir. Gənclər üçün bu, yalnız siyasi mesaj deyil, həm də şəxsi həyat fəlsəfəsidir: başqalarının diktəsi ilə yox, öz düşüncən və dəyərlərinlə hərəkət etmək.

Cənab Prezidentin regional sülh və sabitliklə bağlı fikirləri gənclər arasında ümid yaradan məqamlar sırasındadır. Sülh şəraitində yaşamaq gənclərə daha çox imkan, daha geniş üfüqlər və daha az risk deməkdir. Təhsil almaq, karyera qurmaq, dünyaya inteqrasiya etmək məhz sabit və təhlükəsiz mühitdə mümkündür. Gənclər bu sülhün qorunmasının yalnız dövlətin deyil, cəmiyyətin hər bir üzvünün, xüsusilə də gənc nəslin məsuliyyəti olduğunu dərk etməlidir.

Enerji təhlükəsizliyi və yaşıl enerji ilə bağlı səsləndirilən fikirlər gənclərin gələcək perspektivlərinə birbaşa toxunur. Ekologiya, iqlim dəyişiklikləri və alternativ enerji mənbələri bu gün gənclərin ən çox maraq göstərdiyi mövzulardandır. Cənab Prezidentin bu sahədə Azərbaycanın rolunu vurğulaması gənclərə göstərir ki, ölkənin gələcəyi məhz innovasiya, elm və müasir texnologiyalarla bağlıdır. Bu isə gənclərin qarşısında yeni peşə və inkişaf istiqamətləri açır.

Gənclərin gözü ilə bu müsahibənin ən vacib mesajlarından biri də məsuliyyət anlayışıdır. Güclü dövlət yalnız güclü liderlərlə deyil, savadlı, fəal və məsuliyyətli vətəndaşlarla formalaşır. Ölkə Bşçısının çıxışı gəncləri passiv müşahidəçi yox, cəmiyyətin fəal üzvü olmağa səsləyir. Öz ölkəsinin taleyinə biganə qalmayan, bilik və bacarığını vətənin inkişafına yönəldən gənclik gələcəyin əsas təminatıdır.

Nəticə etibarilə, cənab Prezident İlham Əliyevin Davosda “Euronews” televiziyasına verdiyi müsahibə gənclər üçün gələcəyə baxış, motivasiya və məsuliyyət çağırışıdır. Bu müsahibə göstərir ki, dəyişən dünyada uğur qazanmağın yolu müstəqil düşüncədən, davamlı inkişafdan və milli dəyərlərə sadiqlikdən keçir. Azərbaycan gəncliyi bu mesajları düzgün dəyərləndirərək həm öz həyatında, həm də ölkənin gələcəyində mühüm rol oynaya bilər.

Əfsun Məmmədova

YAP Ağcabədi rayon təşkilatının gənc fəalı

Paylaş:

Baxılıb: 379 dəfə