Azərbaycan dinlərarası Dialoq və Multikultural dəyərlərin etibarlı məkanıdır

Bakı:

25 °C

73 %

3 m/s

Əlaqə

AZ RU EN

Ana səhifə / YAP xəbərləri / Azərbaycan dinlərarası Dialoq və Multikultural dəyərlərin etibarlı məkanıdır

Azərbaycan dinlərarası Dialoq və Multikultural dəyərlərin etibarlı məkanıdır

21.09.2026 [18:14]

Azərbaycan tarixən müxtəlif dinlərin, millətlərin və mədəniyyətlərin qarşılıqlı hörmət və etimad şəraitində birgə yaşadığı məkan kimi tanınmışdır. Əsrlər boyu formalaşmış tolerantlıq ənənələri bu gün də ölkəmizin ictimai həyatında mühüm yer tutur. Məhz buna görə Azərbaycan beynəlxalq aləmdə dinlərarası dialoqun, multikultural dəyərlərin və humanitar əməkdaşlığın etibarlı məkanı kimi qəbul edilir.

Müstəqillik illərində dövlət tərəfindən həyata keçirilən siyasət nəticəsində ölkəmizdə dini etiqad azadlığı tam təmin olunmuş, müxtəlif dini konfessiyaların fəaliyyət göstərməsi üçün əlverişli şərait yaradılmışdır. Tarixi məscidlərin, kilsələrin və sinaqoqların bərpası, dini icmaların fəaliyyətinə göstərilən dəstək Azərbaycanda mövcud olan tolerantlıq mühitinin bariz göstəricisidir. Bu siyasət cəmiyyətdə qarşılıqlı hörmətin, milli birliyin və vətəndaş həmrəyliyinin möhkəmlənməsinə xidmət edir.

Azərbaycanın dinlərarası dialoq sahəsində qazandığı uğurlar beynəlxalq səviyyədə də yüksək qiymətləndirilir. Bakı şəhəri artıq müxtəlif beynəlxalq forumların, konfransların və dini liderlərin görüşlərinin keçirildiyi mühüm mərkəzlərdən birinə çevrilmişdir. Bu tədbirlər müxtəlif dinlərin və mədəniyyətlərin nümayəndələri arasında qarşılıqlı anlaşmanın dərinləşdirilməsinə, sülh və əməkdaşlıq ideyalarının təşviqinə mühüm töhfə verir.

Bu baxımdan Prezident İlham Əliyevin Türk Dövlətləri Təşkilatının müsəlman dini idarə rəhbərləri Şurasının üzvlərindən və müşahidəçilərindən, Yəhya Bakuvi Beynəlxalq Konfransının həmtəşkilatçılarından və Qafqaz Xalqları Ali Dini Şurasının üzvlərindən ibarət nümayəndə heyətini qəbul etməsi xüsusi əhəmiyyət daşıyır. Görüş zamanı Azərbaycanın dinlərarası dialoq, multikulturalizm və tolerantlıq sahəsində əldə etdiyi nailiyyətlər, eləcə də regionda sülh və əməkdaşlığın möhkəmləndirilməsi istiqamətində görülən işlər vurğulanmışdır. Dövlət başçısı ölkəmizdə dini və milli müxtəlifliyin cəmiyyətin zənginliyi kimi qəbul edildiyini, bu dəyərlərin qorunmasının dövlət siyasətinin əsas istiqamətlərindən biri olduğunu qeyd etmişdir.

Görüş çərçivəsində Türk dünyasında mənəvi həmrəyliyin gücləndirilməsi, dini qurumlar arasında əməkdaşlığın genişləndirilməsi və ortaq dəyərlərin təşviqi məsələləri də müzakirə olunmuşdur. Bu qəbul Azərbaycanın təkcə regional deyil, həm də qlobal miqyasda dinlərarası və mədəniyyətlərarası dialoqun inkişafına verdiyi töhfənin növbəti göstəricisi kimi dəyərləndirilə bilər.

Müasir dünyada dini və etnik zəmində qarşıdurmaların müşahidə olunduğu bir dövrdə Azərbaycanın təqdim etdiyi multikulturalizm modeli xüsusi aktuallıq kəsb edir. Ölkəmiz fərqli dinlərin və xalqların nümayəndələrinin sülh və qarşılıqlı hörmət şəraitində yaşaya biləcəyini öz nümunəsində nümayiş etdirir. Bu model həm regionda sabitliyin möhkəmlənməsinə, həm də beynəlxalq əməkdaşlığın inkişafına mühüm töhfə verir.

Azərbaycan bundan sonra da dinlərarası dialoqun, tolerantlığın və multikultural dəyərlərin təşviqi istiqamətində səylərini davam etdirəcək, müxtəlif xalqlar və mədəniyyətlər arasında etimadın və əməkdaşlığın güclənməsinə öz töhfəsini verməkdə davam edəcəkdir.

Aytən Məmmədli

YAP Ağstafa rayon təşkilatının əməkdaşı

Paylaş:

Baxılıb: 216 dəfə