Bakı Dövlət Universiteti tələbə həmkarlar ittifaqı komitəsi (BDU THİK) bu ali məktəbdə “İlin ən yaxşı tələbəsi” müsabiqəsini keçirib.
AzərTAc xəbər verir ki, dekabrın 24-də BDU-da müsabiqənin yekununa həsr edilən tədbir olub.
Müvafiq qurumların nümayəndələrinin, müəllim və tələbələrin iştirak etdikləri tədbirdə BDU-nun rektoru, Milli Məclisin deputatı, akademik Abel Məhərrəmov müasir dünyada elmin, təhsilin mühüm rolunu vurğulayıb. Azərbaycan Prezidenti İlham Əliyevin bu sahənin inkişafına böyük önəm verdiyi bildirilib.
BDU-da elmin, təhsilin inkişafı istiqamətində həyata keçirilən tədbirlərdən, qazanılan uğurlardan danışan rektor gənclərə tövsiyələrini verib, onları vətənpərvərliyə, təhsildə daha yüksək nailiyyətlər qazanmağa çağırıb.
THİK-in sədri Daşqın Qənbərov rəhbərlik etdiyi qurumun fəaliyyətindən, həmçinin, ölkəmizdə gənclərə göstərilən diqqət və qayğıdan danışıb.
Sonra müsabiqənin nəticələri barədə məlumat verilib, qaliblər mükafatlandırılıblar.