Yeni Azərbaycan Partiyası- 34 illik şərəfli tarix, milli birlik və güclü dövlətçilik yolu

Yeni Azərbaycan Partiyası- 34 illik şərəfli tarix, milli birlik və güclü dövlətçilik yolu

Azərbaycanın müasir siyasi tarixində elə hadisələr var ki, onların əhəmiyyəti yalnız baş verdiyi dövrlə məhdudlaşmır, sonrakı nəsillərin taleyinə, dövlətin inkişaf istiqamətinə və xalqın gələcəyinə də öz təsirini göstərir. 1992-ci il noyabrın 21-də Yeni Azərbaycan Partiyasının təsis edilməsi məhz belə tarixi hadisələrdən biridir. Bu gün Azərbaycan dövlətçilik tarixində milli iradənin, siyasi uzaqgörənliyin, xalqın birliyinin və güclü liderlik amilinin təcəssümü kimi xüsusi yer tutur.

1990-cı illərin əvvəllərində Azərbaycan olduqca mürəkkəb və taleyüklü bir dövr yaşayırdı. Dövlət müstəqilliyini yenicə bərpa etmiş ölkəmiz ciddi siyasi, iqtisadi və sosial çətinliklərlə üzləşmişdi. Ermənistanın hərbi təcavüzü, torpaqlarımızın işğalı, siyasi qeyri-sabitlik, idarəçilikdə yaranmış böhran və cəmiyyətdə hökm sürən narahatlıq xalqı çıxış yolu axtarmağa vadar edirdi. Belə bir şəraitdə Azərbaycanın müstəqilliyini qoruyacaq, dövlətçiliyini möhkəmləndirəcək, xalqı vahid məqsəd ətrafında birləşdirəcək güclü siyasi qüvvəyə ciddi ehtiyac yaranmışdı.

Məhz həmin tarixi şəraitdə Azərbaycanın tanınmış ziyalıları, nüfuzlu ictimaiyyət nümayəndələri və ölkənin müxtəlif bölgələrindən olan vətəndaşlar Ümummilli Lider Heydər Əliyevə müraciət edərək yeni siyasi partiyanın yaradılmasını təklif etdilər. 1992-ci il oktyabrın 16-da 91 nəfər ziyalının imzaladığı müraciət bu prosesin başlanğıcı oldu. Oktyabrın 24-də Heydər Əliyev ziyalıların müraciətinə cavab verərək yeni siyasi təşkilatın yaradılmasına və ona rəhbərlik etməyə razılığını bildirdi.

Beləliklə, 1992-ci il noyabrın 21-də Naxçıvan şəhərində Azərbaycanın müxtəlif bölgələrini təmsil edən 550 nəfər nümayəndənin iştirakı ilə Yeni Azərbaycan Partiyasının təsis konfransı keçirildi. Konfransda partiyanın yaradılması haqqında qərar qəbul edildi, Proqramı və Nizamnaməsi təsdiqləndi. Ulu Öndər Heydər Əliyev yekdilliklə Yeni Azərbaycan Partiyasının Sədri seçildi. Həmin il dekabrın 18-də partiya dövlət qeydiyyatına alındı.

Bu hadisə sadəcə yeni siyasi təşkilatın yaranması deyildi. Bu, Azərbaycan xalqının öz gələcəyinə sahib çıxmaq, müstəqil dövlətçiliyini qorumaq və ölkəni böhranlı vəziyyətdən çıxarmaq istiqamətində atdığı mühüm tarixi addım idi.

Yeni Azərbaycan Partiyasının yaranması və inkişafı bilavasitə Ümummilli Lider Heydər Əliyevin adı ilə bağlıdır. Onun zəngin dövlətçilik təcrübəsi, siyasi müdrikliyi, qətiyyətli mövqeyi və xalqına bağlılığı partiyanın ideoloji əsaslarının formalaşmasında həlledici rol oynadı.

Ulu Öndər Heydər Əliyev Azərbaycanın müstəqilliyini qorumağı, milli maraqları üstün tutmağı, dövlətçilik ənənələrini yaşatmağı və ölkənin gələcək inkişafını təmin etməyi əsas siyasi prioritetlər kimi müəyyənləşdirmişdi. Onun rəhbərliyi ilə Yeni Azərbaycan Partiyası qısa müddətdə ölkənin aparıcı siyasi qüvvəsinə çevrildi.

1993-cü ildə xalqın təkidli tələbi ilə Heydər Əliyevin siyasi hakimiyyətə qayıdışı Azərbaycan tarixində yeni mərhələnin başlanğıcı oldu. Ölkədə dövlət idarəçiliyinin möhkəmləndirilməsi, siyasi sabitliyin təmin olunması, iqtisadi islahatların həyata keçirilməsi və beynəlxalq əlaqələrin genişləndirilməsi istiqamətində mühüm addımlar atıldı. Azərbaycan parçalanmaq və dövlət müstəqilliyini itirmək təhlükəsindən xilas olaraq inkişaf yoluna qədəm qoydu.Ulu Öndərin müəyyən etdiyi siyasi kurs Azərbaycan dövlətçiliyinin möhkəm təməlinə çevrildi. Onun siyasi irsi, dövlətçilik fəlsəfəsi və milli inkişaf strategiyası bu gün də ölkəmizin gələcək hədəflərinin müəyyənləşdirilməsində mühüm əhəmiyyət daşıyır.

Yeni Azərbaycan Partiyası – dünənin, bu günün və sabahın partiyası

Ulu Öndər Heydər Əliyevin siyasi fəaliyyətində mühüm yer tutan “dünənin, bu günün və sabahın partiyası” ideyası Yeni Azərbaycan Partiyasının keçdiyi tarixi yolu və gələcək hədəflərini özündə əks etdirir.Partiya yarandığı gündən etibarən dövlət müstəqilliyinin qorunması, milli maraqların müdafiəsi, hüquqi dövlət quruculuğu, sosial rifahın yüksəldilməsi, vətəndaş həmrəyliyinin möhkəmləndirilməsi və Azərbaycanın beynəlxalq nüfuzunun artırılması istiqamətində fəaliyyət göstərib.Yeni Azərbaycan Partiyasının inkişafında mühüm mərhələlərdən biri də 2005-ci ildə cənab İlham Əliyevin partiyanın Sədri seçilməsi oldu. Bu, partiyanın fəaliyyətində yeni dövrün başlanğıcı kimi tarixə düşdü.

Bu gün Yeni Azərbaycan Partiyası Prezident, partiyanın Sədri cənab İlham Əliyevin rəhbərliyi ilə öz fəaliyyətini müasir dövrün çağırışlarına uyğun davam etdirir. Dövlət başçısının həyata keçirdiyi məqsədyönlü siyasət nəticəsində Azərbaycan iqtisadi, siyasi, hərbi və diplomatik sahələrdə mühüm nailiyyətlər əldə edib.

Xüsusilə 44 günlük Vətən müharibəsində qazanılan tarixi Zəfər Azərbaycan xalqının milli birliyinin, dövlətimizin gücünün və Ali Baş Komandanın qətiyyətli rəhbərliyinin parlaq təcəssümü oldu. 2023-cü ilin sentyabrında həyata keçirilən lokal antiterror tədbirləri nəticəsində ölkəmizin suverenliyinin bütün ərazilərimizdə bərpa edilməsi müasir tariximizin ən mühüm hadisələrindən birinə çevrildi.

Bu gün azad edilmiş torpaqlarımızda genişmiqyaslı bərpa və quruculuq işləri aparılır, Böyük Qayıdış Proqramı çərçivəsində doğma yurdlarına qayıdan vətəndaşlarımız üçün yeni həyat qurulur. Qarabağ və Şərqi Zəngəzurda həyata keçirilən layihələr Azərbaycanın iqtisadi qüdrətinin, siyasi iradəsinin və gələcəyə hesablanmış inkişaf strategiyasının göstəricisidir.

Bütün bu nailiyyətlər müstəqil Azərbaycanın güclənməsinə, beynəlxalq mövqelərinin möhkəmlənməsinə və xalqımızın milli qürur hissinin daha da yüksəlməsinə xidmət edir.

Partiya fəalı kimi mənim mövqeyim və məsuliyyətim

Yeni Azərbaycan Partiyasının fəalı olaraq hesab edirəm ki, partiya üzvü olmaq yalnız siyasi təşkilata mənsubiyyət deyil, eyni zamanda dövlətə, xalqa, milli maraqlara və ölkəmizin gələcəyinə qarşı məsuliyyət daşımaq deməkdir.

Hər bir partiya fəalı öz fəaliyyəti, ictimai mövqeyi, vətəndaşlarla ünsiyyəti və gördüyü işlərlə təmsil etdiyi siyasi təşkilatın nüfuzuna töhfə verməlidir. Ulu Öndər Heydər Əliyevin zəngin irsinin öyrənilməsi və təbliği, gənc nəslin vətənpərvərlik ruhunda yetişdirilməsi, milli-mənəvi dəyərlərimizin qorunması, dövlətçilik ənənələrimizin yaşadılması hər birimizin üzərinə düşən mühüm vəzifələrdəndir.

Bizim əsas məqsədimiz güclü, müstəqil, suveren və inkişaf edən Azərbaycanın gələcəyinə töhfə vermək, xalqımızın əldə etdiyi tarixi nailiyyətləri qorumaq və gələcək nəsillərə daha qüdrətli dövlət miras qoymaqdır.

Yeni Azərbaycan Partiyasının 34 illik tarixi göstərir ki, xalqın etimadına, milli maraqlara və güclü dövlətçilik ideyasına söykənən siyasi iradə böyük uğurların əsasını təşkil edir. Bu şərəfli tarix həm də gələcək nəsillər üçün mühüm siyasi və mənəvi məktəbdir.

21 Noyabr – Yeni Azərbaycan Partiyasının təsis edildiyi gün münasibətilə bütün partiya üzvlərini, rayon təşkilatlarının fəallarını və bu siyasi yolun dəyərlərinə sadiq olan hər kəsi ürəkdən təbrik edirəm.

Ulu Öndər Heydər Əliyevin siyasi irsinə sədaqət, Prezident İlham Əliyevin rəhbərliyi ilə Azərbaycanın davamlı inkişafına dəstək və milli maraqlarımızın qorunması yolunda hər birimizə uğurlar arzulayıram.

Yeni Azərbaycan Partiyası – milli birliyimizin, siyasi iradəmizin və güclü dövlətçilik amalımızın ifadəsidir!

Pirverdiyeva Gülüş

YAP Qusar rayon təşkilatının fəalı