Ulu Öndər Heydər Əliyevin Ordu Quruculuğu Strategiyası Müasir Azərbaycanın Tarixi Nailiyyətlərinin Təməl Daşıdır

Bakı:

24 °C

71 %

8 m/s

AZ RU EN

Ana səhifə / Arxiv / Ulu Öndər Heydər Əliyevin Ordu Quruculuğu Strategiyası Müasir Azərbaycanın Tarixi Nailiyyətlərinin Təməl Daşıdır

Ulu Öndər Heydər Əliyevin Ordu Quruculuğu Strategiyası Müasir Azərbaycanın Tarixi Nailiyyətlərinin Təməl Daşıdır

22.06.2026 [15:57]

“Ordu mövzusu, ordunun yaranması, formalaşması bizim bütün həyatımızda əsas mövzulardan biri olmalıdır, gənclərin orduda xidmət etmək üçün tərbiyələndirilməsi bizim əsas vəzifələrimizdən biri olmalıdır və bu vəzifələri biz ardıcıl surətdə həyata keçirməliyik... Xalqla ordunun birliyi həm xalqın qüdrətini, həm də ordunu daha da qüvvətli edir. Ona görə də qarşımızda duran əsas vəzifələrdən biri xalqla ordunun sağlam mənəvi birliyini təmin etməkdən ibarətdir”

Ulu Öndər Heydər Əliyev (02.02.1996-cı il, Azərbaycan Gənclərinin I Forumundakı tarixi nitqdən)

Azərbaycan xalqının çoxəsrlik dövlətçilik tarixində hərbi qüdrətin formalaşması, suverenliyin qorunması və milli təhlükəsizliyin təmini hər zaman həyati əhəmiyyət kəsb edən məsələlər olmuşdur. Lakin XX əsrin sonlarında müstəqilliyini yenidən bərpa edən ölkəmiz üçün güclü ordunun yaradılması sadəcə dövlət təsisatlarının formalaşdırılması prosesi deyil, həm də bütöv bir millətin varolma mübarizəsi idi. Həmin çətin və mürəkkəb tarixi şəraitdə xalqın təkidli tələbi ilə hakimiyyətə qayıdan Ümummilli Lider Heydər Əliyev Azərbaycan dövlətinin strateji inkişaf xəttini müəyyənləşdirərkən milli ordu quruculuğuna xüsusi diqqət yetirdi. Ulu Öndərin 1996-cı il fevralın 2-də Azərbaycan Gənclərinin I Forumunda söylədiyi tarixi kəlamlar, ölkəmizin hərbi-vətənpərvərlik doktrinasının fəlsəfi təməlini qoymaqla yanaşı, gələcək böyük tarixi Zəfərlərin də mənəvi yol xəritəsinə çevrildi.

Ulu Öndər Heydər Əliyev yaxşı bilirdi ki, nizami və qüdrətli bir ordunun formalaşması yalnız müasir texnika, silah-sursat və infrastruktur təminatı ilə bitmir. Ordunun əsas hərəkətverici qüvvəsi, onun polad sütunu və sarsılmaz dayağı yüksək döyüş ruhuna, mənəvi-psixoloji hazırlığa və dərin vətənpərvərlik hissinə sahib olan insandır — əsgər və zabitdir. Məhz buna görə də dahi şəxsiyyət gənclərin orduda xidmət etmək üçün tərbiyələndirilməsini dövlətin, cəmiyyətin və təhsil institutlarının qarşısında duran ən ümdə vəzifə kimi müəyyən edirdi. Bu strategiyanın ən mühüm xüsusiyyəti onun kampaniya xarakterli olmaması, əksinə, ardıcıl surətdə həyata keçirilməli olan fundamental bir dövlət siyasəti kimi xarakterizə edilməsidir.

Hərbi vətənpərvərlik tərbiyəsi cəmiyyətin hər bir fərdini — ailədən başlayaraq məktəbə, ali təhsil müəssisələrinə və ictimai təşkilatlara qədər hər kəsi əhatə edən sistemli bir zəncir olmalıdır. Gənclərin milli ruhda, dövlət bayrağına, torpağa və müstəqillik ideallarına sadiqlik ruhunda böyüməsi, gələcəkdə hərbi xidməti sadəcə qanuni bir mükəlləfiyyət deyil, eyni zamanda müqəddəs bir vicdan borcu və ali şərəf işi kimi qəbul etmələrinə zəmin yaratdı. Ulu Öndərin uzaqgörənliklə qurduğu bu mənəvi tərbiyə sistemi onilliklər keçdikcə öz bəhrəsini verdi və ölkədə vətən torpağının hər bir qarışını canından əziz tutmağı özünə məqsəd seçən güclü bir nəsil formalaşdı.

Heydər Əliyev dühasının irəli sürdüyü ən böyük ideoloji tezislərdən biri də xalqla ordunun sarsılmaz, sağlam mənəvi birliyinin təmin olunması idi. Dahi lider bu birliyi həm xalqın ümumi qüdrətini artıran, həm də ordunu yenilməz edən əsas amil kimi dəyərləndirirdi. Dünyanın hərbi tarixi sübut edir ki, xalqından təcrid olunmuş, onun dəstəyini və sevgisini qazanmayan heç bir ordu uzunmüddətli və strateji uğurlara imza ata bilməz. Ordu xalqın övladlarından təşkil olunur, xalq isə öz növbəsində ordunu mənəvi cəhətdən qidalandırır. Bu mənada, müasir Azərbaycan dövlətinin qurucusunun hərbi quruculuq sahəsində qoyduğu miras təkcə hərbi hissələrin bərpasından ibarət deyildi, bu, xalqın milli mənliyini ordunun döyüş ruhuna köçürən daxili bir güc mərkəzinin yaradılması prosesi idi.

Xalq və ordu birliyi sadəcə maddi-texniki təminatda və ya qanunvericilik səviyyəsində tənzimlənən münasibətlər sistemi deyil, hər şeydən əvvəl mənəvi, psixoloji və emosional bir bütövlükdür. Əsgər ön cəbhədə, səngərdə düşmənlə üz-üzə dayanarkən arxasında bütöv bir millətin duasını, inamını və sevgisini hiss etdikdə onun döyüş ruhu qat-qat artır, qorxu və tərəddüdləri yox olur. Eyni zamanda, xalq da öz ordusunun peşəkarlığına, gücünə və vətənpərvərliyinə əmin olduqda gələcəyə daha böyük ümidlə baxır, öz dövlətinə olan inamını daha da möhkəmləndirir. Bu sarsılmaz təməl, Azərbaycan ordusunu regionun və dünyanın ən güclü ordularından birinə çevirən ən böyük qüvvədir.

Ulu Öndər Heydər Əliyevin 1990-cı illərin ortalarında əsasını qoyduğu bu daxili hərbi-mənəvi strategiya, XXI əsrdə onun layiqli davamçısı, Azərbaycan Respublikasının Prezidenti, Müzəffər Ali Baş Komandan İlham Əliyev tərəfindən uğurla davam etdirildi, inkişaf etdirildi və müasir dünyanın ən mütərəqqi hərbi standartlarına uyğunlaşdırıldı. Ali Baş Komandanın rəhbərliyi ilə həyata keçirilən genişmiqyaslı islahatlar həm ordumuzun texnoloji üstünlüyünü təmin etdi, həm də xalq-ordu birliyini polad bir iradəyə çevirdi. Tarix Heydər Əliyev ideyalarının nə qədər uzaqgörən və sarsılmaz olduğunu 2020-ci ilin payızında — 44 günlük Vətən müharibəsində bütün dünyaya nümayiş etdirdi.

Ulu Öndərin vaxtilə bəhs etdiyi o sağlam mənəvi birlik 44 günlük müqəddəs savaşda özünün ən pik nöqtəsinə çatdı. Azərbaycan xalqı yaşından, sosial statusundan və siyasi baxışlarından asılı olmayaraq, Ali Baş Komandanın və ordunun ətrafında bir yumruq kimi birləşdi. Səfərbərlik idarələrinin qarşısına könüllü yazılmaq üçün axışan on minlərlə gənc, məhz Ulu Öndərin arzuladığı və uğrunda mübarizə apardığı o vətənpərvər nəslin nümayəndələri idi. Arxa cəbhənin ön cəbhəyə göstərdiyi mənəvi və maddi dəstək, hər bir vətəndaşın özünü bir əsgər kimi hiss etməsi düşmənin yalnız hərbi istehkamlarını deyil, həm də ideoloji dayaqlarını darmadağın etdi. Bu birlik, Azərbaycanın ərazi bütövlüyünün bərpası və suverenliyimizin tam təmin olunması ilə nəticələnən tarihi Zəfərin əsas hərəkətverici qüvvəsi oldu və "Dəmir Yumruq" möhkəm Xalq-Ordu-Prezident birliyinin rəmzinə çevrildi.

Bu gün müstəqil Azərbaycan Respublikası öz tarixinin ən qüdrətli dövrünü yaşayır. Şanlı bayrağımızın Qarabağın və Şərqi Zəngəzurun hər bir guşəsində, uca zirvələrdə qürurla dalğalanması Ulu Öndər Heydər Əliyevin ruhunun şad olduğunun ən böyük sübutudur. Zaman dəyişir, nəsillər bir-birini əvəz edir, lakin Ümummilli Liderin ordu, gənclik və mənəvi birlik haqqında formalaşdırdığı fundamental prinsiplər öz aktuallığını və strateji əhəmiyyətini heç vaxt itirmir. Bu tarixi kəlamlar bir daha xatırladır ki, ordumuzu qorumaq, gənclərimizi vətənpərvərlik ruhunda tərbiyə etmək və xalqla ordunun mənəvi birliyini göz bəbəyi kimi saxlamaq bizim hər birimizin həm vətəndaşlıq, həm də gələcək nəsillər qarşısında müqəddəs borcumuzdur, çünki güclü ordu güclü dövlət deməkdir, güclü dövlət isə əbədi müstəqilliyimizin yeganə təminatçısıdır.

Kərimli Elvin

Yap Ordubad Rayon Təşkilatının əməkdaşı

Paylaş:

Baxılıb: 266 dəfə