Müxalifət şantajçı siması ilə yenidən ortaya çıxır

Bakı:

13 °C

88 %

7 m/s

Əlaqə

AZ RU EN

Ana səhifə / Daxili siyasət / Müxalifət şantajçı siması ilə yenidən ortaya çıxır

Müxalifət şantajçı siması ilə yenidən ortaya çıxır

04.10.2012 [02:44]

Əli Həsənov: Bu gün hansısa insanın əməllərinə görə hakimiyyəti ittiham etmək, günahlandırmaq məntiqsizdir
Milli Məclisin üzvü Gülər Əhmədova və fəaliyyəti dayandırılmış Azərbaycan Beynəlxalq Universitetinin rektoru Elşad Abdullayevlə bağlı videogörüntülərin müzakirələri hələ də davam edir. Qeyd edək ki, məsələ ilə bağlı artıq cinayət işi açılıb və araşdırmalar aparılır. Bundan başqa, videomateriala Azərbaycan hakimiyyəti, Yeni Azərbaycan Partiyası birmənalı mövqe nümayiş etdirib, müvafiq orqanlar isə lazımi tədbirlər həyata keçirirlər.
Videogörüntü ilə bağlı Azərbaycan Prezidenti Administrasiyası İctimai-siyasi məsələlər şöbəsinin müdiri Əli Həsənov münasibət bildirib. Ə.Həsənov KİV-ə müsahibəsində deyib ki, bu, gözlənildiyi kimi rezonans doğurdu, Azərbaycan cəmiyyətində müəyyən müzakirələrə yer açdı. Əli Həsənov bildirib ki, təəssüf doğurucu hal odur ki, hansı mahiyyət kəsb etməsindən asılı olmayaraq, Azərbaycanın bəzi müxalifət dairələri, belə halları axtaran insanlar ondan hakimiyyətə, Prezident İlham Əliyevin komandasına qarşı istifadə etməyə çalışırlar: “Dəridən-qabıqdan çıxaraq bunu etmək istəyirlər, bütün imkanlarını, intellektlərini, ətraflarını, ixtiyarlarında olan KİV-ləri, beynəlxalq və daxili əlaqələrini işə salaraq bundan hakimiyyətə qarşı istifadə etməyə cəhd edirlər. Bu, antidövlət, antimillət mahiyyəti kəsb etsə də, bundan hakimiyyətə qarşı istifadə etmək istəyirlər”.
Bütün dövrlərdə, bütün hakimiyyətlərdə Elşad Abdullayev kimi müxtəlif əyri yollarla sərvət toplamaq istəyən və bəzən buna nəsib olan insanların olduğunu diqqətə çatdıran Ə.Həsənov qeyd edib ki, belələri əyri yollarla topladıqları sərvəti kimlərinsə vasitəsi ilə özünə mənsəb qazanmaq, hansısa hakimiyyət strukturunda təmsil olunmaq istəyiblər, bunların puluna sahib çıxıb, ona şərik olmaq, o puldan müəyyən qədər ələ keçirmək istəyən insanlar da olub. İctimai-siyasi məsələlər şöbəsinin müdiri qeyd edib ki, bu insanlar da zaman-zaman ifşa edilib, cəzalarını alıblar.
Müxalifətin bu məsələyə birtərəfli, şantaj xarakterli münasibətinə toxunan Ə.Həsənov qeyd edib ki, Azərbaycan cəmiyyətində parlamentin qeyri-legitimliyini sübut edən heç bir fakt yoxdur. Onun sözlərinə görə, hətta Elşad Abdullayevin videosunun özü də onu göstərir ki, onun kimi qeyri-qanuni yollarla parlamentə can atan insanlar öz məqsədlərinə nail olmayıblar: “Onlar kiminlə danışıq aparıblar, bunun bugünkü parlamentə heç bir dəxli yoxdur. Onlarla Gülər Əhmədova kimi, ondan da yüksək ranqlı, hakimiyyətə daha yaxın olan insan tapa, işə qoşa bilərdilər. Amma bu faktın özünün baş tutmaması onun göstəricisidir ki, bu parlamentə Elşad Abdullayev kimi təsadüfü, əyri yollarla can atan adamlar düşməyib, düşə də bilməz”.
Yayılan videogörüntünün prokurorluq tərəfindən araşdırıldığını söyləyən Ə.Həsənov videonun gerçəkliyinə də cəmiyyətdə heç kimdə şübhə olmadığını deyib. Onun sözlərinə görə, bu çəkilişin nə dərəcədə montaj olub-olmadığı araşdırılandan sonra Azərbaycan qanunlarının tələblərinə uyğun müvafiq addımlar atılacaq: “Heç kimə güzəşt yoxdur. Biz nə iqtidar partiyasının üzvünə, nə də hansısa şəxslə yaxınlığına, qohumluğuna, hansısa şəkildə bağlılığına görə kiməsə münasibət bildirmirik. Azərbaycan hakimiyyətinin təməlini Ümummilli liderimiz qanunlara söykənərək qoyub. Azərbaycanda qanunçuluq hər bir insan üçün onun davranış normalarının əsasında dayanır. Qanunu pozan hər bir insan cəzasını almalı, qanunu pozmayana isə cəza verilməməlidir. O anlamda düşünürəm ki, bu yoxlamanın axırını gözləməliyik”.
Ə.Həsənov bildirib ki, müxalifət belə hallardan hakimiyyətə qarşı istifadə etmək fikrinə düşməsin. PA rəsmisi deyib ki, bu fikrə düşsələr də, bunun heç bir əsası yoxdur: “Azərbaycan hakimiyyəti bütün dövrlərdə şəffaf idarəçilik həyata keçirib. Bu gün hansısa insanın əməllərinə görə hakimiyyəti ittiham etmək, günahlandırmaq məntiqsizdir. Heç bir cəmiyyət, o cümlədən, Azərbaycan cəmiyyəti hansısa yollarla pul toplamaq, pul toplamağa nail olub, onu müxtəlif yollarla hakimiyyətə istiqamətləndirib nə isə qazanmaq istəyən insanlardan sığortalanmayıb. Amma belələrinin əməllərinin qarşısının alınması o deməkdir ki, hakimiyyət belələri ilə eyni mövqeni bölüşmür, onlar cəzalarını alacaqlar”.
Pərviz SADAYOĞLU

Paylaş:

Baxılıb: 2007 dəfə