Ermənistanda qeyri-müəyyənlik hökm sürür

Bakı:

27 °C

69 %

8 m/s

Əlaqə

AZ RU EN

Ana səhifə / Dünya / Ermənistanda qeyri-müəyyənlik hökm sürür

Ermənistanda qeyri-müəyyənlik hökm sürür

13.04.2021 [09:00]

Siyasi böhran dövrünü yaşayan ölkədə müxalifət “taym-aut” götürür, hakimiyyətdə isə parçalanma və daxili çəkişmələr davam edir
Məğlub Ermənistan artıq seçkiqabağı dövrə qədəm qoysa da, ölkədə siyasi böhran davam edir. Ermənistan mediasının yazdığına görə, növbədənkənar parlament seçkilərinin keçiriləcəyinin elan edilməsindən sonra cəmiyyətdə qeyri-müəyyənlik bir qədər də artıb. Müxalifətin “Nikolsuz seçki” şüarına baxmayaraq, “Vətənin xilası naminə hərəkat”da təmsil olunan bəzi partiyaların seçkilərdə iştiraka “can atması” vəziyyəti daha da qəlizləşdirib. Eyni zamanda, siyasi partiyalardan verilən açıqlamalar mövcud hakimiyyətin dövründə seçkidə iştirak etmək istəyənlərin çox olduğunu göstərir.
Məsələn, eks-prezident Levon Ter-Petrosyanın partiyasının seçkilərdə iştirak etmək üçün hərəkətə keçdiyi barədə xəbərlər yayılıb. Belə ki, “Sputnik-Ermənistan”ın yazdığına görə, seçkilərə hazırlıq məqsədilə “Erməni milli konqresi” partiyası mayın 1-də qurultay keçirəcək. Məlumata görə, qurultayda “Erməni milli konqresi” partiyası növbədənkənar parlament seçkilərində iştirak edib-etməyəcəyini müəyyənləşdirəcək: “Əgər fors-major hal baş verməzsə, böyük ehtimalla Ter-Petrosyanın partiyası seçkilərdə müstəqil şəkildə iştirak edəcək”.
Yerli mətbuat Paşinyanın istefasına çalışan “Vətənin xilası naminə hərəkat”ın da fəaliyyətində dəyişiklik nəzərə çarpdığını yazır. Daxili ziddiyyətlərlə üzləşən müxalifət regionlarda nəzərdə tutulan aksiyaları təxirə salıb. “Hraparak” qəzeti yazır ki, Sevan şəhərində keçirilən mitinqdən sonra hərəkat taym-aut götürmək qərarına gəlib. Regionlarda aksiyalar planlaşdırılsa da, partiyaların seçkilərə qatılacağı bəlli olana qədər səfərlərin və görüşlərin dayandırılması barədə qərar verilib.
Bu arada “İravunk” qəzeti yazır ki, seçkiqabağı vəziyyət hakim komandada da parçalanma və qarşıdurma yaradıb. Belə ki, hökumətin saxta təbliğatı ilə məşğul olan “İctimaiyyətlə əlaqələr və məlumat mərkəzi” yenidən direktorsuz qalıb. Qəzet yazır ki, direktor Lili Minasyan baş nazirin aparatının rəhbəri Arsen Torosyanla qarşıdurma səbəbindən vəzifəsindən uzaqlaşdırılıb. “İravunk” digər maraqlı detalları da açıqlayıb: “Mövcud baş nazirin rəhbəri olduğu “Vətəndaş müqaviləsi” partiyasında “təmizləmə” işlərinə başlanıb. Xüsusilə partiya L.Minasyan başda olmaqla parlamentin sədri Ararat Mirzoyanın kadrları sayılan şəxslərdən xilas olmaq istəyir”.
Qəzet yazır ki, ümumiyyətlə, A.Mirzoyanı sıralarından təcrid edən hakim komanda, Paşinyanın gözlənilən istefasından sonra, parlament seçkiləri ərəfəsində spikerin bəzi “oyunlar oynaya” biləcəyindən narahatdır.
Bu arada Yerevanda etiraz aksiyaları da davam edir. Belə ki, müharibədə itkin düşənlərin yaxınları aprelin 12-də hökumət binasının qarşısında aksiya keçiriblər. “FaktInfo”nun yaydığı məlumata görə, müdafiə nazirliyinin binasını bir neçə gün mühasirədə saxlayan vətəndaşlar oradan qənaətbəxş cavab ala bilmədikləri üçün hökumət binasına üz tutublar.
Göründüyü kimi, məğlub Ermənistanda seçkiqabağı mərhələdə yenə də qeyri-müəyyənlik hökm sürür. Siyasi böhran dövrünü yaşayan ölkədə erməni müxalifəti taym-aut götürür, hakimiyyətdə isə parçalanma və daxili çəkişmələr baş verir. Məğlub ölkədəki mövcud vəziyyət seçkilərə qədər siyasi böhranın daha da dərinləşəcəyindən xəbər verir.
Qaşqay ZİYƏDDİNOĞLU

Paylaş:

Baxılıb: 915 dəfə