Seçkilərə hazırlaşan Ermənistanda siyasi xaos davam edir

Bakı:

24 °C

88 %

2 m/s

Əlaqə

AZ RU EN

Ana səhifə / Dünya / Seçkilərə hazırlaşan Ermənistanda siyasi xaos davam edir

Seçkilərə hazırlaşan Ermənistanda siyasi xaos davam edir

18.05.2021 [09:13]

Məlum olduğu kimi, 20 iyun tarixində növbədənkənar parlament seçkilərinin keçiriləcəyi elan edilən məğlub Ermənistanda siyasi böhran davam etməkdədir. Erməni mediasının yazdığına görə, qanunverici orqan buraxıldıqdan sonra da bəzi müxalif siyasi qüvvələrin hakimiyyəti əlində saxlayan Nikol Paşinyan iqtidarına qarşı ittihamları davam edir. Digər tərəfdən, seçkilərə gedən müxalif qüvvələr arasında da seçkiyə və hakimiyyətə münasibətdə fərqli mövqelər müşahidə edilir.
Qeyd edək ki, parlamentdəki müxalifətin növbədənkənar parlament seçkiləri keçirilməsi ilə bağlı Paşinyanın planına sona qədər əməl etməsi də birmənalı qarşılanmır. Belə ki, “Çiçəklənən Ermənistan” və “Maariflənən Ermənistan” partiyaları parlamentdə keçirilən baş nazir seçkilərində iştirak etməyib. Son nəticədə 2 dəfə baş naziri seçə bilməyən parlament buraxılmış hesab olunub. Amma Paşinyan hökuməti kimi, mövcud parlament də seçkilərə qədər öz fəaliyyətini davam etdirəcək.
Erməni mediasının yazdığına görə, Ermənistan müxalifətində seçkiqabağı ittifaq və blokların yaradılması prosesi də davam edir.
Bu arada, “İravunk” qəzeti yazır ki, seçki siyahılarının 26 may tarixinə qədər mərkəzi seçki komissiyasına təqdim edilməli olmasına baxmayaraq, bəzi siyasi qüvvələr hələ də axtarışdadırlar: “Ermənistanın keçmiş baş naziri Hrant Baqratyanın “Azatutyun” partiyası, Zaruhi Bostancıyanın “Yerkir Tsirani” partiyası və digərləri heç bir siyasi qüvvə ilə blok yaratmaq barədə razılığa gələ bilmir”.
Xatırladaq ki, bu qüvvələr “Vətənin xilası naminə hərəkat”a daxil olan partiyalardandır və hərəkatın süqutundan sonra heç bir ittifaqa qoşulmayıblar.
Yerli medianın digər məlumatına görə, Paşinyanın komandası seçki qanunvericiliyini pozaraq artıq regionlarda seçkiqabağı kampaniyaya başlayıb. “Past” qəzeti yazır ki, hakim komandanın bölgələrdən seçilmiş nümayəndələri son bir həftə ərzində N.Paşinyanın göstərişi ilə regional seçki dairələrində olur: “Bölgələrdən gələn məlumatlara görə, hakim fraksiyanın deputatları regionlarda heç də yaxşı qarşılanmırlar. Mənbələrimiz artıq hakimiyyət nümayəndələrinin müsbət nəticə verməyən bir neçə görüş keçirdiyini bildirirlər”.
Beləliklə, seçkiyə gedən Ermənistanda siyasi xaos davam edir. Yerli ekspertlərin fikrincə, bəzi siyasi qüvvələrin fəaliyyəti nəticəsində müxalifətdəki parçalanma və Paşinyanın seçkilərdə inzibati resurslardan istifadə cəhdləri məğlub ölkədə qeyri-müəyyən vəziyyət yaradıb.
Qaşqay ZİYƏDDİNOĞLU

Paylaş:

Baxılıb: 916 dəfə