10-cu sanksiya paketi gəlir...

Bakı:

23 °C

78 %

6 m/s

Əlaqə

AZ RU EN

Ana səhifə / Dünya / 10-cu sanksiya paketi gəlir...

10-cu sanksiya paketi gəlir...

19.01.2023 [11:03]

Aİ hansı qadağaları tətbiq edəcək?

Nicat Dilqəmli

Rusiya-Ukrayna müharibəsi səbəbindən Rusiyaya qarşı tətbiq edilən qadağaların əhatə dairəsi genişləndirilir. Müharibənin ilk günlərindən hava blokadasına məruz qalan Rusiya qarşıdakı mərhələlərdə daha ciddi sanksiyalarla üzləşdi. Siyahının uzanması - qadağalar paketlərinin sayının artması - isə, sözsüz ki, Rusiya iqtisadiyyatına ciddi şəkildə zərbə vurur. Şimal qonşumuz bu gün də yeni sanksiyalarla üz-üzədir. Belə ki, Avropa İttifaqı (Aİ) Rusiyaya qarşı onuncu sanksiyalar paketini tətbiq etmək niyyətindədir. Yeni paket əsasən bu günə qədər qəbul edilmiş məhdudiyyətlərdəki “boşluqların doldurulmasına” həsr olunacaq. Bu barədə Avropa Komissiyasının rəhbəri Ursula fon der Lyayen məlumat verib.

Onuncu paketdə nələr var?

Polşa və Litva diplomatlarının sözlərinə görə, Varşava və Vilnüs Aİ-nin Rusiyanın nüvə sektoruna məhdudiyyətlər qoymasını istəyir. Bununla belə, onlar etiraf edirlər ki, yeni sanksiyalarla bağlı konsensusa nail olmaq getdikcə çətinləşir. Yeni paketlə “SWIFT” beynəlxalq ödəniş sistemindən çıxarılan bankların və fəaliyyəti məhdudlaşdırılan Rusiya KİV-lərinin sayının artırılması gözlənilir. “Reuters”in yazdığına görə, Belarusa qarşı da qadağaların tətbiqi müzakirə mövzusudur. Buna səbəb isə Belarus ərazisində sanksiyalardan yan keçməyə imkan yaradan “boşluq”ların aşkar edilməsidir.

Ukrayna isə Aİ-ni Rusiyanın dövlət nüvə enerjisi şirkəti olan “Rosatom”u növbəti sanksiyalara daxil etməyə çağırıb. Bu təklif Macarıstan tərəfindən əngəllənmişdi. Onu da qeyd edək ki, Macarıstanın Rusiyada dörd nüvə reaktoru tikilib. Budapeşt isə daha iki reaktoru istismara verməyi planlaşdırır. Bu iki reaktorun da “Rosatom” tərəfindən tikiləcəyi bildirilir.

Adlarının çəkilməsini istəməyən yüksək vəzifəli diplomatlar Belçikanın Rusiya ilə almaz ticarətini “sonlandırmağa” çalışacaqlarını da qeyd ediblər.

Bəzi mənbələrdə onuncu sanksiyalar paketinin cari ilin fevral ayının sonlarına hazır olacağı qeyd edilir.

Xarici KİV-lərin məlumatına görə, hazırda Aİ sanksiyaları 1300 nəfərə yaxın insanı və “qara siyahı”ya düşən 120 təşkilatı əhatə edir. Eyni zamanda, Rusiya hərbi-sənaye kompleksi, 200-ə yaxın fiziki şəxs və dörd telekanal da sanksiyalara məruz qalıb. Sanksiyalar əsasən ticarət, nəqliyyat, enerji, bank, media və müdafiə sahələrinə şamil edilir. Bundan başqa, üçüncü paketdə yer alan viza siyasəti ilə Aİ Rusiya Prezidentini, Baş Nazir Mişustini, xarici işlər naziri Lavrovu, daxili işlər naziri Kolokolsevi və bir sıra digər siyasətçiləri, məmurları da siyahıya əlavə edib. Ekspertlər hakimiyyətdə təmsil olunan şəxslərin sanksiyalara məruz qalmasının çox nadir hadisə olduğunu diqqətə çatdırırlar.

Görünən odur ki, tətbiq edilməsi planlaşdırılan onuncu paket Rusiyanın çəmbərini daha da daraldacaq.

Paylaş:

Baxılıb: 719 dəfə