Brüsseldə keçirilən Avropa idman gecəsində “Bakı-2015” təqdim edilib

Bakı:

23 °C

64 %

7 m/s

Əlaqə

AZ RU EN

Ana səhifə / İdman / Brüsseldə keçirilən Avropa idman gecəsində “Bakı-2015” təqdim edilib

Brüsseldə keçirilən Avropa idman gecəsində “Bakı-2015” təqdim edilib

09.05.2015 [13:00]

Brüsseldə keçirilən Avropa idman gecəsində “Bakı-2015” birinci Avropa Oyunları təqdim olunub.
AZƏRTAC xəbər verir ki, tədbir Avropa Olimpiya Komitəsinin Avropa İttifaqı yanındakı ofisi və Almaniyanın Hessen əyalətinin birgə təşkilatçılığı ilə keçirilib.
Avropa Olimpiya Komitəsi rəhbərliyinin, Avropanın müxtəlif ölkələrinin Olimpiya komitələrinin prezidentlərinin, Avropa Parlamentinin üzvlərinin, qitənin idman ictimaiyyətinin təmsilçilərinin, habelə Almaniyanın Hessen əyalətinin ali nümayəndələrinin iştirakı ilə keçirilən idman gecəsində əvvəlcə tədbir və iştirakçılar haqqında məlumat verilib.
Sonra Avropa Olimpiya Komitəsinin prezidenti Patrik Hikki, Avropa Parlamentinin sədri Martin Şults çıxış edərək qitənin dəyərlərindən, idman ənənələrindən, potensialından, gənclərin bədən tərbiyəsi və idmana marağının daha da artırılmasının vacibliyindən bəhs ediblər. Çıxışlarda Bakıda keçiriləcək birinci Avropa Oyunlarının ən yüksək səviyyədə təşkil edilməsindan danışılıb və qitənin bu yarışlarının böyük müvəffəqiyyətlə baş tutacağına əminlik ifadə olunub.
Patrik Hikki deyib: “İlk Avropa Oyunlarına hazırlıq yüksək səviyyədədir. Mən ötən həftə Bakıda oldum. Gördüklərimdən çox böyük təəssürat almışam. Bizim hələ 5 həftəmiz var. İndidən heç bir riskimiz qalmayıb. Bütün işlər düzgün həyata keçirilib. Brüsseldə təşkil olunmuş bu gecə bütün uğurları hamıya göstərmək üçün gözəl fürsət oldu. Bakıda birinci Avropa Oyunlarının yüksək səviyyədə keçirilməsi, eləcə də atletlərin rahatlığı üçün hər cür şərait yaradılıb”.
Brüsseldə ilk Avropa Oyunlarının təqdimatında iştirakından məmnunluğunu bildirən Martin Şults deyib: “Avropa Oyunlarının keçirilməsi ədalət, tolerantlıq və qarşılıqlı hörmət kimi ali dəyərləri nümayiş etdirəcək. Oyunların yüksək səviyyədə keçirilməsi üçün kifayət qədər əmək sərf edilir. Mən Oyunların müvəffəqiyyətlə keçiriləcəyinə inanıram. İdmanın inkişafı tolerantlıq üçün çox vacibdir”.
Avropa Olimpiya Komitəsinin vitse-prezidenti Yanez Kosiyaniç bildirib: “Hesab edirəm ki, Oyunlara hazırlıq çox yüksək səviyyədədir. Bu, böyük idman hadisəsi olacaq. Birinci Avropa Oyunları yüksək keyfiyyətli və müasir standartlara cavab verəcək səviyyədə təşkil olunacaq. Bu Oyunlar təqribən bir aydan sonra başlayacaq və bununla da biz öz qitəmiz üçün gözəl bir ənənəyə start verəcəyik”.
Bu Oyunlara hazırlığın Azərbaycana nəyə qadir olduğunu sübut etmək üçün gözəl şərait yaratdığını vurğulayan Avropa Karate Federasiyasının prezidenti Antonio Espinos Ortueta deyib: “Azərbaycan Avropa Oyunlarını lazımi səviyyədə keçirmək üçün böyük işlər görüb. Yeni idman qurğuları inşa edilib. Bütün işlər yüksək keyfiyyətlə həyata keçirilib. Əminəm ki, bu Oyunlardan sonra Azərbaycan və onun gücü haqqında müxtəlif dairələrdə hələ çox danışılacaq”.
Sonra Azərbaycanın gənclər və idman naziri Azad Rəhimov çıxış edib. Nazir Prezident İlham Əliyevin rəhbərliyi ilə Azərbaycanın bütün istiqamətlərdə qazandığı nailiyyətlərin idman sahəsinə də şamil olunduğunu, beynəlxalq idman təşkilatlarının bu faktı dəfələrlə vurğuladıqlarını deyib. O, Azərbaycanın nüfuzlu beynəlxalq yarışların uğurla keçirildiyi ölkə olduğunu söyləyib.
Azad Rəhimov birinci Avropa Oyunlarına hazırlıq prosesi, Azərbaycanın birinci xanımı, Heydər Əliyev Fondunun prezidenti Mehriban Əliyevanın sədrlik etdiyi Avropa Oyunlarının Təşkilat Komitəsinin qısa müddətdə gördüyü işlər haqqında ətraflı məlumat verib. O, həmçinin birinci Avropa Oyunlarında təmsil olunacaq idman növləri və idmançılar barədə danışıb.
Sonra birinci Avropa Oyunlarından bəhs edən videoçarx nümayiş etdirilib. Videoçarxda Azərbaycanın qısa müddətdə Avropa Oyunlarının ən yüksək səviyyədə keçirilməsi üçün atdığı addımlardan, respublikamızın idman qurğularının yarışları qəbul etməyə tam hazır olmasından, Təşkilat Komitəsinin fəaliyyətindən ətraflı bəhs olunub.
Tədbir interaktiv şəraitdə davam etdirilib.

Paylaş:

Baxılıb: 1176 dəfə